ប្រធាន​គណៈកម្មការ​ហិរញ្ញវត្ថុ​និង​សវន​កម្ម​នៃ​រដ្ឋសភា​លោក​បណ្ឌិត ជាម យៀ​ប បាន​និយាយ​ថា សមាសភាព​គណបក្ស​សង្គ្រោះ​ជាតិ​(CNRP) នៅ​ក្នុង គណៈកម្មាធិការ​ជាតិ​រៀបចំ​ការ​បោះ​ឆ្នោត​(​គ​.​ជ​.​ប​) អាច​រក្សា​នៅ​ដដែល បើសិនជា​អ្នក​ទាំងនោះ​ចុះចូល​ជាមួយ​គណបក្ស​ប្រជាជន​កម្ពុជា​។

យ៉ាងណា​ក៍ដោយ បើ​តាម​លោក​តំណាងរាស្ត្រ​មក​ពី​គណបក្ស​ប្រជាជន​កម្ពុជា (CPP) រូប​នេះ​បាន​ត្រូវ​ប្រ​ព័​ន្ឋ​ផ្សព្វផ្សាយ​ក្នុងស្រុក​ស្រង់​សម្តី​របស់​លោក​ចុះ​ផ្សាយ​ទៀត​ថា​«​តាម​ការ​ឯកភាព​របស់​គណបក្ស​ជាប់​ឆ្នោត​ទាំង​ពីរ​ឬ​កន្លង​មក គឺ​សមាសភាព គណៈកម្មាធិការ​ជាតិ​រៀបចំ​ការ​បោះ​ឆ្នោត គជ​ប ទាំង​៩​រូប នឹង​ត្រូវ​រលាយ​ជា​ស្វ័យប្រវត្តិ នៅ​ពេល​បក្ស​ណាមួយ​ត្រូវ​រំលាយ​។​»​។

លោក ជាម យៀ​ប មិន​អាច​រក​ការ​សុំ​បញ្ជាក់​បន្ថែម​បាន​ទេ​នៅ​យប់​ថ្ងៃ​ទី​១៨ ខែតុលា​នេះ ក៍ប៉ុន្តែ​អ្នកនាំពាក្យ​គណបក្ស​ប្រជាជន​កម្ពុជា លោក សុខ ឥ​សាន ក៍​ត្រូវ​បាន​ប្រ​ព័​ន្ឋ​ផ្សព្វផ្សាយ​ស្រង់​សម្តី​លោក​ចុះ​ផ្សាយ​ពាក់​ព័​ន្ឋ​បញ្ហា​គ​.​ជ​.​ប ប្រសិនបើ​CNRP ត្រូវ​រំលាយ​ដោយ​បញ្ជាក់​ថា បញ្ហា​ទាក់ទង​គ​.​ជ​.​ប គឺ​មានច្បាប់​មួយ​ដោយឡែក ហើយ​ថា​សមាសភាព គ​.​ជ​.​ប ទាំងនោះ​បាន​លាលែង​ចេញពី​សមាជិក​គណបក្ស​រួច​ហើយ​មុន​ចូល​កាន់​តំណែង​។ ដូចនេះ​លោក​ថា ទោះ​គណបក្ស​សង្គ្រោះ​ជាតិ​ត្រូវ​រំលាយ​ក៏​សមាសភាព​គ​.​ជ​.​ប​នៅ​រក្សា​ដដែល​។

ការ​លើក​ឡើង​របស់​លោក ជាម យៀ​ប ខាងលើ​នេះ បាន​ធ្វើ​ឡើង​បន្ទាប់​ពី​មជ្ឈដ្ឋាន​មួយ​ចំនួន​បាន​ចោទសួរ​គ្នា​ទៅ​វិញ​ទៅ​មក​អំពី​វាសនា គ​.​ជ​.​ប ប្រសិនបើ​តុលាការ​កំពូល​សម្រេច​រំលាយ​គណបក្ស​សង្គ្រោះ​ជាតិ​តាម​បណ្តឹង​របស់​ក្រសួងមហាផ្ទៃ ។ អ្នកខ្លះ​ថា គ​.​ជ​.​ប ក៍​ត្រូវ​រលាយ​ដោយ​ស្វ័យប្រវត្តិ ខ្លះ​ថា​មិន​រលាយ​ដោយសារ​សមាជិក​គ​.​ជ​.​ប​ទាំងអស់​រក្សា​តួនាទី​អ​ព្យា​ក្រឹត្យ បើ​ទោះបីជា​សមាសភាព​០៩​រូប​មក គឺ​០៤​រូប​មក​ពី​គណបក្សកាន់អំណាច (CPP) ០៤​រូប​មក​ពី​បក្ស​ប្រឆាំង​(CNRP)​និង​០១​រូប​មក​ពី​សង្គម​ស៊ី​វិល​នោះ​ក្តី ។

យ៉ាងណា​ក្តី​ការ​លើក​ឡើង​របស់​លោក​បណ្ឌិត ជាម យៀ​ប ខាងលើ​នេះ​ដែរ ក៍​មិន​ទាន់​មាន​ប្រតិកម្ម​នៅឡើយ​ដែរ​ពី​មន្ត្រីជាន់ខ្ពស់​គណបក្ស​សង្គ្រោះ​ជាតិ គិត​ត្រឹម​វេលា​ម៉ោង​១០​និង​១៩​នាទី​យប់​ថ្ងៃ​ទី​១៨ ខែតុលា ឆ្នាំ​២០១៧​នេះ ។

សមាសភាព​គ​.​ជ​.​ប​ទាំង​០៩​រូប​ដែល​រដ្ឋ​សភាជាតិ​បាន​បោះ​ឆ្នោត​ជា​កញ្ចប់​ផ្តល់​សុពលភាព​កាលពី​ខែមេសា ឆ្នាំ​២០១៥​នោះ​រួម​មាន​៖​ខាង​CPP គឺ​លោក ស៊ិ​ក ប៊ុ​ន​ហុ​ក លោក​ឌុ​ច សុ​ន លោក​មាន ស​ទិ និង​លោក ឯម សូ​ផាត រីឯ​ខាង​CNRP​នោះ​វិញ​រួម​មាន​៖​លោក គួ​យ ប៊ុ​ន​រឿ​ន លោក រ៉ុ​ង ឈុ​ន លោក ហ៊ីង ធី​ប្ញ​ទ្ឋិ និង​លោកស្រី តែ ម៉ា​នី​រ៉ុ​ង ។ ចំណែក​០១​រូប​ទៀត​ដែល​មក​ពី​សង្គម​ស៊ី​វិល​នោះ គឺ​លោក ហង្ស ពុ​ទ្ឋា ៕

Comments

comments