ភ្នំពេញ ៖ ឡេ​លាយ​ភាគច្រើន ដែល​មាន​លក់​នៅ​លើ​ទីផ្សារ​សព្វថ្ងៃ​នេះ គ្មាន​គុណភាព​នោះ​ទេ ហើយ​អាច​បង្ក​គ្រោះថ្នាក់​ធ្ងន់ធ្ងរ ពីព្រោះ​តែ​វា​មាន​លាយ​សារធាតុ​ជា​ច្រើន​បញ្ចូល​គ្នា ដូច​ជា​ពពួក steroids, hydroquinone និង tretinoin ។ សារធាតុ​ទាំង​អស់នេះ អាច​ធ្វើ​ឲ្យ​អ្នក​ប្រើប្រាស់​ប្រឈម​ទៅ​នឹង​បញ្ហា​ជា​ច្រើន ដូច​ជា ការ​អាល្លែកហ្ស៊ី បញ្ហា ស​ស្លេក កើត​ជំងឺមហារីក​ស្បែក ធ្វើ​ឲ្យ​ខូចខាត​ដល់​ថ្លើម និង​ពុល​ដល់​សរីរាង្គ​នានា​ជាដើម​។

ប្រសិនបើ​អ្នក​កំពុង​ប្រើ​ឡេ​លាយ​ឲ្យ​ស្បែក​ស​លឿនទាំងនោះ សូម​បោះ​វា​ចោល​ជា​បន្ទាន់​! ព្រោះថាឡេ​លាយ គឺជា​ការ​លាយ​បញ្ចូល​គ្នា​នូវ​សារ​ធាតុគីមី​យ៉ាងច្រើន ដើម្បី​ជួយ​កែខៃ​ស្បែក​ឲ្យ​ស ស្រស់ថ្លា និង​ភ្លឺ​រលោង​។ ឡេ​លាយ ជា​ឧស្សាហ៍កម្ម​ដែល​ធ្វើ​ឲ្យ​ថៅកែ​ចំណេញ​ប្រាក់​រាប់​លាន​ដុល្លារ ប៉ុន្តែ តើ​អ្នកមាន​ដឹង​ទេ​ថា ឡេ​លាយ បែរជា​ធ្វើ​ឲ្យ​អ្នក​ប្រើប្រាស់​ប្រឈម​ទៅ​នឹង​បញ្ហា​ធ្ងន់ធ្ងរ​ជា​ច្រើន ចំពោះ​សុខភាព និង​ស្បែក​របស់​គេ​នៅ​ថ្ងៃ​អនាគត ?

ស្រប​ពេល​បច្ចុប្បន្ន​នេះ យើង​អាច​សង្កេត​ឃើញ​ថា មាន​មនុស្ស​មួយ​ចំនួន​បាន​រង​នូវ​ផល​ប៉ះពាល់​ទាំង​ធ្ងន់ ទាំង​ស្រាល ដោយសារ​តែ ការ​លាប​ផលិតផល​ឡេ​លាយ​ ។ ផលិតផល​ឡេ​លាយ​ទាំងនោះ មាន​ដាក់​លក់​ស្ទើរតែ​នៅ​គ្រប់​ទីកន្លែង​ក្នុង​ទីផ្សារ​ប្រទេស​កម្ពុជា ជា​ពិសេស នៅ​ក្នុង​បណ្តាញ​សង្គម​ហ្វេ​ស​ប៊ុ​ក​ផ្ទាល់​តែ​ម្តង ផលិតផល​ឡេ​លាយ​ជា​ច្រើន ដែល​សុទ្ធសឹងតែ ត្រូវ​បាន​អ្នកលក់​អះអាង​ថា ពេល​លាប​នៅ​លើ​ស្បែក ទៅ​នឹង​ឆាប់​ស​ក្នុង​រយៈពេល​ដ៏​ខ្លី ក៏​ប៉ុន្តែ​ឡេ​លាយ​ទាំង​អស់នោះ គេ​មិនដឹង​ថា​តើ​ត្រូវ​បាន​គេ​លាយ​យ៉ាងដូចម្តេច និង​មាន​ប្រ​ភ​មកពីណា​ពិតប្រាកដ​នោះ​ទេ​ ។

ជាក់ស្តែង​នារី​ម្នាក់​នៅ​ខេត្តបាត់ដំបង បាន​ប្រតិកម្ម​ជាមួយ​ឡេ​លាយ ហើយ​ស្បែក​បាន​ប្រែ​ក្លាយទៅជា​ស្បែក​ដែល​គួរ​អោយ​ខ្លាច ។ សំរាប់​ការ​បកស្រាយ​តាម​វេជ្ជបណ្ឌិត​បាន​ឲ្យ​ដឹង​ថា គាត់​បាន​ប្រតិកម្ម​ជាមួយ​និង​ឡេ​លាយ​ដែល​គាត់​កំពុង​ប្រើប្រាស់​ប្រចាំ​ថ្ងៃ​ ។ ដូច្នេះ​សំរាប់​បងប្អូន​ដែល​ចង់​សរ ចូរ​ប្រុង​ប្រយ័ត្ន​! ហេតុការណ៍​នេះ​បាន​កើតឡើង​កាលពី​ថ្ងៃ​ទី​១៥ ខែកញ្ញា ឆ្នាំ​២០១៦ ។

តាម​គ្រូពេទ្យ​ឯកទេស​ជំនាញ​រោគ​សើ​ស្បែក​បាន​បញ្ជាក់​ប្រាប់​បណ្តាសារ​ព័ត៌មាន​ឲ្យ​ដឹង​ថា ឡេ​លាយ ផ្សំ​ឡើង​ពី​សារជាតិ​អាស៊ីតខ្លាំង និង​វត្ថុ​ធាតុគីមី​មួយ​ចំនួន ដែល​នឹង​នាំ​ឲ្យ​ស្បែក​ឆាប់​ស​តែ​ស្បែក​នោះ​នឹង​ខូច​ទៅ​វិញ ហើយនឹង​ប៉ះពាល់​ដល់​សុខភាព​យ៉ាងធ្ងន់ធ្ងរ នា​ពេល​ខាង​មុខ​ ។ ឡេ​លាយ​លាប​ស្បែក អាច​ធ្វើ​ឲ្យ​ស្បែក​របស់​អ្នក​ឡើង​កន្ទួល​ក្រហម រមាស់ រលាក ហើយ​ប្រសិនបើ​ស្បែក​របស់​អ្នក​ឆាប់​មាន​ប្រតិកម្ម អ្នក​នឹង​អាច​រង​ផល​ប៉ះពាល់​ធ្ងន់ធ្ងរ​ជាង​នេះ ​។

គ្រូពេទ្យ​ឯកទេស​បាន​បន្ត​ថា សារធាតុ ដែល​មាននៅ​ក្នុង​ឡេ​លាយ​បង្ក​ឱ្យ​មាន​បញ្ហា​ប្រតិកម្ម​លើ​ស្បែក ដូច​ជា​បណ្ដាល​ឱ្យ​កើតជា​រមាស់​កន្ទួល ឬ​ខូច​ស្បែក​។ អ្នកខ្លះ​មាន​បញ្ហា​រមាស់​ដល់​ថ្នាក់​អេះ​ចេញ​ឈាម និង​ឡើង​កន្ទួល​ធំ​ៗ ដែល​ឡេ​លាយ​អាច​ជ្រាប​ចូល​ដល់​កោសិកា​ខាងក្នុង ប៉ះទង្គិច​ដល់​សុខភាព​ស្បែក និង​សុខភាព​រាង​កាយ ​។ ដូច្នេះ អ្នក​គួរ​ប្រើ​ផលិតផល​ដែល​មានគុណ​ភាពល្អ និង​ចុះបញ្ជី​ការ​ត្រឹមត្រូវ​ទទួលស្គាល់​ដោយ​ក្រសួង​សុខាភិបាល ។

បើ​តាម​ការ​លើក​ឡើង​របស់​ក្រសួងសុខាភិបាល​បាន​ឲ្យ​ដឹង​ថា សព្វ​ថ្ងៃនេះ​ពពួក​ឡេ​លាយ​ទាំងនោះ​មិន​ត្រូវ​បាន​ផលិត​តាម​ក្បួនខ្នាត​ត្រឹមត្រូវ​នោះ​ទេ​ ។ វា​គឺជា​ការ​ច្នៃ​ដោយ​អ្នកលក់​ផ្ទាល់ ច្នៃ​ដោយ​អ្នក​លាយ​ម្សៅ អ្នកលក់​គ្រឿងសម្អាង ឬ​ក៏​អ្នក​ដែល​ផលិត​ផលិតផល​ក្លែងក្លាយ ដោយ​គាត់​ធ្វើ​ម៉េច ឲ្យ​ឃើញ​ស​លឿន ប៉ុន្តែ​គាត់​មិន​បាន​គិត​ពី​ផលវិបាក​របស់​អ្នក​ប្រើប្រាស់​នោះ​ទេ​ ។

ក្រសួងសុខាភិបាល​ក៏​បាន​ស្នើ​ឲ្យ​ប្រជាពលរដ្ឋ​មានការ​ប្រុង​ប្រយ័ត្ន​ខ្ពស់ និង​ចៀសវាង​ការ​ប្រើ​ឡេ​លាយ​លាប​ស្បែក ព្រោះថា មិន​ដែល​ណា​ទៅ​លាប​ឡេ​ភ្លាម ស​ភ្លាម មើល​តែ​ដាក់​ទឹក​ក្តៅ​កោសជ្រូក​ចឹ​ង យូរ​ៗ​ទៅ​ខ្ទេចខ្ទី​អស់ហើយ​ ។ សបាន​មួយ​ភ្លែត​ហ្នឹង អាស៊ីត ហើយ​ដាក់​វត្ថុ​សម្រាប់​ធ្វើ​ឲ្យ​ស្បែក​ស មួយ​ភ្លែត​ទៅ​វា​ពុល ធ្វើ​ឲ្យ​រលាក​ស្បែក​ថ្ងៃក្រោយ​ទៅ ។

បច្ចុប្បន្ន​ក្រសួង​កំពុង​បន្ត​យុទ្ធនាការ​បង្ក្រាប​ជា​រៀងរាល់ថ្ងៃ​ចំពោះ​ចរាចរណ៍​ឡេ​លាយ​សម្រាប់​លាប​ស្បែក​ឲ្យ​ស និង​រៀបចំ​ប្រព័ន្ធ​ចុះបញ្ជី​ការ តាម​អន​ឡាញ​ដើម្បី​កំណត់​ពី​ប្រភព​នាំ​ចូល​ឡេ​លាប​ស្បែក​ត្រឹមត្រូវ​ផង​ដែរ​ ។

អ្នកជំនាញ​បាន​អំពាវនាវ ឱ្យ​មិត្ត​ៗ​នារី​ដែល​ចង់​ប្រើប្រាស់​ឡេ​ដើម្បី​ជួយ​ដល់​សុខភាព​ស្បែក សូម​ជ្រើសរើស​ផលិតផល​ដែល​មាន​ស្លាក​សញ្ញា ឈ្មោះ​ផលិតផល និង​ប្រភព​ផលិត​ច្បាស់លាស់ ព្រមទាំង​មានការ​ទទួល​ពិនិត្យ​សារធាតុ​ផ្សំ​ត្រឹមត្រូវ​ពី​ក្រសួង​សុខ​ភិ​បាល ដើម្បី​ចៀស​ផុត​ពី​បញ្ហា​ទាំងឡាយ ដូចដែល​អ្នកជំនាញ​បាន​លើក​ឡើង ៕

Comments

comments