សារ​ព្រមាន​មួយ​បាន​បញ្ជូន​ឲ្យ​ដល់​អ្នកស្រុក​រស់នៅ​លើ​ដែន​កោះ​ហា​វ៉ៃ សហរដ្ឋអាមេរិក បាន​បង្ហាញ​អោយ​មានការ​ប្រុង​ប្រយ័ត្ន​អំពី​មី​ស៊ី​ល​ផ្លោង ធ្វើ​អោយ​ម្នាក់​ៗ ស្ថិត​ក្នុង​ភាព​ភិតភ័យ អស់​រយៈពេល​ប្រហែល​៣០​នាទី នៅ​ថ្ងៃ​សៅរ៍​នេះ រហូត​ដល់​អាជ្ញាធរ​កោះ​ហា​វ៉ៃ ចេញ​មក​ប្រកាស​ថា សារ​នោះ​មន្ត្រី​ប្រកាស​អាសន្ន​ម្នាក់​បញ្ជូន​ច្រឡំ​ទេ ។

សារ​ចូល​ទៅ​រដ្ឋ​ហា​វ៉ៃ ព្រមាន​ថា «​ប្រកាស​អាសន្ន​! មី​ស៊ី​ល​ឆ្លង​ទ្វីប នឹង​ផ្លោង​ចូល​កោះ​ហា​វ៉ៃ ។ ស្វែងរក​ទីជម្រក​បន្ទាន់! នេះ​មិនមែន​ជា​ការ​ហ្វឹកហាត់​ទេ» ។

បើ​តាម​សាក្សីឃើញ​ហេតុ​ការណ៍ និយាយ​ថា ពេល​ទទួល​បាន​សារ​ភ្លាម ប្រជាជន​នៅ​ភាគ​ខាងលិច​កោះ​ហា​វ៉ៃ បាន​រត់​ចេញពី​អគារ​ទៅ​រក​ជំរំ នៅ​លេ​ន​ដ្ឋា​ន និង​បន្ទប់ក្រោមដី និង​ខ្លះ​ទៀតទៅ​រក​កន្លែង​ចត​រថយន្ត គេ​ឮ​សូរ​សំឡេង​ក្មេង​ៗ​យំ ។

មនុស្ស​ជា​ច្រើន​នៅ​ក្នុង​លេ​ន​ដ្ឋា​ន​និង​ផ្លូវ​រូង​ក្នុង​ដីលាក់ខ្លួន​មិន​ហ៊ាន​ចេញ​ទៅ​ខាងក្រៅ​វិញ​ទេ រហូត​ដល់​ពួក​គេ ទទួល​បានការ​បញ្ជាក់​ពី​អាជ្ញាធរ​ថា ​អ្វី​ៗ​ទាំងអស់​មាន​សុវត្ថិភាព ។

អ្នកស្រី Ashly Trask អាយុ​៣៩​ឆ្នាំ រស់នៅ​កោះ Kauai បាន​និយាយ​ថា «​មនុស្ស​គ្រប់​គ្នារ​ត់រក​កន្លែង​លាក់ខ្លួន ព្រោះ​គិត​ថា វា​ពិតប្រាកដ​ណាស់​» ។

អ្នកស្រី បន្ត​ថា «​វា​ពិតជា​ភ័យ​ស្លន់ស្លោមែន អ្នក​រាល់គ្នា​ដឹង​ថា មាន​ពេល​ប្រហែល​១៥​នាទី​ប៉ុណ្ណោះ រហូត​មី​ស៊ី​ល​ផ្លោង​មក​ដល់ ហើយ​គ្មាន​នរណា​ម្នាក់​ដឹង​ថា មី​ស៊ី​ល​នុយក្លេអ៊ែរ​ផ្ទុះ​ចំទីណា​នោះ​ទេ ។

ប្រហែលជា​៣០​នាទី​ក្រោយមក ទើប​អាជ្ញាធរ​កោះ​ហា​វ៉ៃ ថ្លែង​ថា ការ​ជូនដំណឹង​នេះ គឺជា​កំហុស​មួយ ។ ភ្លាម​នោះ​ អភិបាល​រដ្ឋ​ហា​វ៉ៃ បាន​ធ្វើការ​សុំ​ទោស​ចំពោះ​ពលរដ្ឋ​ហា​វ៉ៃ ដោយ​លោក​បាន​និយាយ​ថា បុគ្គលិក​ម្នាក់ បាន​ចុច​ប៉ូ​តុង​ច្រឡំ​ ផ្ញើ​សារ​ចូល​ទៅ​អ្នក​ប្រើប្រាស់​ទូរស័ព្ទ​ដៃ​ចល័ត នៅ​លើ​កោះ​ហា​វ៉ៃ ។

ជុំវិញ​រឿង​នេះ សហរដ្ឋអាមេរិក បាន​ប្រកាស​ថា នឹង​បើក​ការ​ស៊ើបអង្កេត​ឲ្យ​បាន​ល្អិតល្អន់​បំផុត ។

ដោយសារ​តែ​សក្តានុពល​មី​ស៊ី​ល​របស់​កូរ៉េ​ខាងជើង ដែល​អាច​បាញ់​ទៅ​ដល់​ទឹកដី​ខ្លះ​របស់​សហរដ្ឋអាមេរិក ពិសេស​កោះ​ហា​វ៉ៃ នៅ​ជិត​ជាង​រដ្ឋ​ដទៃ ទើប​អាជ្ញាធរ​បំពាក់​ប្រព័ន្ធ​ប្រុង​ប្រយ័ត្ន​មួយ សម្រាប់​ប្រកាស​អាសន្ន ដល់​អ្នក​រស់នៅ​ក្នុង​កោះ​ហា​វ៉ៃ ។

កន្លង​ទៅ កាលពី​ខែ​អំឡុង​ធ្នូ ២០១៧ ដែនដី​កោះ​មួយ​នេះ ធ្លាប់​បាន​សាកល្បង បន្លឺ​សំឡេង​ប្រកាស​អាសន្ន ឲ្យ​បានដឹង​មុន ពី​ការ​បាញ់​មី​ស៊ី​ល​នុយក្លេអ៊ែរ​ផ្សេង​ៗ ម្តង​រួច​មក​ហើយ ៕

Comments

comments