ពី​ព្រំដែន​ខេត្តស្ទឹងត្រែង​មាន​សេចក្តីរាយការណ៍​មក​ថា កងកម្លាំង​ទាហាន​ឡាវ​បាន​បញ្ជូន​កម្លាំង​ជា​ច្រើន​រយ​នាក់​ដើម្បី​រារាំង​ការ​សាងសង់​ប៉ុស្តិ៍​របស់​ភាគី​ខ្មែរ​នៅ​លើ​បូរណភាព​ទឹកដី​ខ្មែរ​នៅ​ចំ​ក្នុង​ឃុំ​អូរ​ស្វាយ ស្រុក​ថា​ឡា​បរិ​វ៉ា​ត់ ខេត្តស្ទឹងត្រែង ប៉ុន្តែ​កងកម្លាំង​ខ្មែរ​នៅ​តែ​ឈរជើង​យ៉ាង​រឹង​មាំ​និង​ត្រៀមលក្ខណៈ​រួច​ហើយ ដើម្បី​ការពារ​ទឹកដី​ខ្លួន​។

ប្រភព​បន្ត​ថា ភាព​តានតឹង​បាន​កើតឡើង​រយៈពេល​ខ្លី​កាលពី​ថ្ងៃ​ទី​០២ ខែមេសា ឆ្នាំ​២០១៧ ហើយ​ថា​ក្រោយ​កើត​មាន​សភាពការណ៍​យោធា​តានតឹង តំណាង​ភាគី​ទាំង​ពីរ​បាន​ជួប​ចរចា​គ្នា​កាលពី​ថ្ងៃ​ទី​០៣ ខែមេសា​ម្សិលមិញ ប៉ុន្តែ​ពុំ​ទទួល​បាន​ល​ទ្ឋ​ផល​ជា​ដុំ​កំភួន​នោះ​ទេ ។

យ៉ាងណា​មក​ទល់​នឹង​វេលា​ម៉ោង​២​រសៀល​ថ្ងៃ​ទី​០៤ ខែមេសា​នេះ​សភាពការណ៍​នៅ​ព្រំដែន​ខ្មែរ​-​ឡាវ​ចំណុច​មាន​ជម្លោះ មិន​មាន​អ្វី​ប្រែប្រួល​ទេ ប៉ុន្តែ​កងកម្លាំង​ទាំង​ពីរ​នៅ​តែ​ប្រុង​ជើង​ការណ៍​រៀង​ៗ​ខ្លួន ។

ភាព​តានតឹង​រវាង​កងកម្លាំង​ទាំង​ពីរ​បាន​កើតឡើង​តាំងពី​ដើមខែ​មីនា ឆ្នាំ​២០១៧ បន្ទាប់​ពី​ទាហាន​ឡាវ​បាន​សង់​ប៉ុស្តិ៍​នៅ​ចំណុច​ដុ​ង​ក្រឡ​ចាស់​បង្គោល​លេខ ០៣៣ ហើយ​ត្រូវ​បាន​កងកម្លាំង​ខ្មែរ​ហាមឃាត់ តែ​ភាគី​ឡាវ​បាន ប​ញ្ឍ​ប់​ការ​សាងសង់​ប៉ុស្តិ៍​រយៈពេល​ប៉ុន្មាន​ថ្ងៃក្រោយ​ការ​ចរចា​គ្នា​ប៉ុណ្ណោះ ពោល​នៅ​ថ្ងៃ​ទី​២៧ ខែមីនា ឆ្នាំ​២០១៧ ទាហាន​ឡាវ​បាន​បន្ត​ស្ថាបនា​ប៉ុស្តិ៍ នៅ​ចំណុច​ច្រក​ទ្វារ​អន្តរជាតិ​ណ​ង​ណុ​ក​ខៀន ខេត្ត​ចម្ប៉ា​សាក់ ឈម​នឹង​ច្រក​ត្រពាំង​ក្រៀល ខេត្តស្ទឹងត្រែង​របស់​ខ្មែរ ។

ក្រោយមក​ភាគី​កងកម្លាំង​ខ្មែរ​បាន​សាងសង់​ប៉ុស្តិ៍​នៅ​លើ​ទឹកដី​របស់​ខ្លួន ស្ថិត​ក្នុងភូមិ​សាស្ត្រ​ឃុំ​អូរ​ស្វាយ ស្រុក​ថា​ឡា​បរិ​វ៉ា​ត់ ខេត្តស្ទឹងត្រែង បែរជា​ទាហាន​ឡាវ​មក​ហាមឃាត់ ធ្វើ​ឲ្យ​មាន​សភាពការណ៍​យោធា​តានតឹង​កើតឡើង​តែ​ម្តង​៕

 

 

Comments

comments