ជនសង្ស័យជាបក្ខពួកចោរឆក់ម្នាក់ ត្រូវបានសមត្ថកិច្ចចូលទៅឃាត់ខ្លួននិងវ៉ៃខ្នោះដល់ក្នុងផ្ទះ គឺប៉ុន្មានម៉ោងបន្ទាប់ពីជននេះនិងបក្ខពួកម្នាក់ទៀត បានធ្វើសកម្មភាពឆក់ខ្សែ.កពីបុរសម្នាក់កំពុងបោសសំរាមនៅមុខផ្ទះ ។
បុរសសង្ស័យដែលត្រូវសមត្ថកិច្ចឃាត់ខ្លួន ត្រូវគេអះអាងថាឈ្មោះ ឃាង វណ្ណៈ អាយុ២៨ឆ្នាំ មុខរបរមិនពិតប្រាកដ ស្នាក់នៅផ្ទះក្នុងបុរីហុកឆេង ភូមម័ល សង្កាត់ដង្កោ ខណ្ឌដង្កោ និងមានស្រុកកំណើតនៅភូមិទួលពង្រ សង្កាត់ចោមចៅ ខណ្ឌពោធសែនជ័យ រាជធានីភ្នំពេញ ។
ក្នុងការឃាត់ខ្លួនជនសង្ស័យនៅថ្ងៃទី០៨ តុលា ២០២០នេះដែរ សមត្ថកិច្ចដកហូតវត្ថុតាងដែលជាមធ្យោបាយប្រព្រឹត្តបទល្មើស គឺម៉ូតូមួយគ្រឿងម៉ាក ហុងដាPCX ពណ៌ស ស៊េរីឆ្នាំ២០១៩ ពាក់ស្លាកលេខ 1IK-5814 ។
សូមបញ្ជាក់ថា កាលពីម៉ោងជាង៦ព្រឹកថ្ងៃទី០៧ តុលា ២០២០ ខណៈដែលបុរសម្នាក់មិនទាន់ស្គាល់អត្តសញ្ញាណកំពុងតែបោសសំរាមនៅមុខផ្ទះម្តុំផ្សារដេប៉ូ ស្ថិតក្នុងសង្កាត់ផ្សារដេប៉ូទី១ ខណ្ឌទួលគោក ស្រាប់តែលេចមុខបក្ខពួកជនសង្ស័យជិះម៉ូតូខាងលើ បានមកពីក្រោយឆក់ខ្សែ.កពីបុរសកំពុងបោសសំរាមនោះ ជិះគេចខ្លួនបាត់ស្រមោល ហើយបើតាមវីដេអូឃ្លីបដែលគេបង្ហោះចែកចាយផ្អើលបណ្តាញសង្គមហ្វេសប៊ុកកាលពីថ្ងៃម្សិលមិញ ពេលនោះគេឃើញជនរងគ្រោះ ហាក់ដូចស្រឡាំងកាំងឈរភាំងតែម្តង ។
បច្ចុប្បន្ន ជនសង្ស័យដែលត្រូវកងកម្លាំងនគរបាលព្រហ្មទណ្ឌកំរិតស្រាលរាជធានីភ្នំពេញ សហការជាមួយកម្លាំងនគរបាលប៉ុស្តិ៍ដង្កោឃាត់ខ្លួន កំពុងត្រូវបានសមត្ថកិច្ចកំពុងកសាងសំណុំរឿងបញ្ជូនទៅតុលាការចាត់ការតាមច្បាប់ ៕
