បើគ្មានអ្វីប្រែប្រួលនោះទេ នៅក្នុងសប្តាហ៍នេះ សាលារាជធានីភ្នំពេញនឹងចាប់ផ្តើមកាប់បំផ្លាញចោលនូវដើមឈើធំៗចំនួន៣ដើមក្នុងចំណោមដើមឈើប្រមាណ៥០ដើម ដែលមានអាយុជាង៣០០ឆ្នាំ នៅផ្លូវភ្លោះក្បែរសួនកាណាឌីយ៉ានិងមន្ទីរពេទ្យព្រះអង្គឌួង។
ការកាប់បំផ្លាញដើមឈើធំៗនិងមានអាយុកាលជាង៣០០ឆ្នាំខាងលើនេះ គឺអាជ្ញាធរលើកឡើងថា ដើម្បីការពារសុវត្ថិភាពដល់ប្រជាពលរដ្ឋដែលធ្វើដំណើរតាមដងផ្លូវ ព្រោះដើមឈើចំណាស់ៗទាំងនោះនឹងអាចមានហានិភ័យនៅថ្ងៃណាមួយ ។
បើតាមប្រធានអង្គភាពសួនច្បារ និងរុក្ខជាតិនៃមន្ទីរសាធារណការ និងដឹកជញ្ជូនរាជធានីភ្នំពេញ លោក សំ សាមុត បានប្រាប់ប្រព័ន្ឋផ្សព្វផ្សាយក្នុងស្រុកកាលពីចុងសប្តាហ៍មុនថាដើមឈើធំៗនៅសួនកាណាឌីយ៉ាមុខពេទ្យព្រះអង្គឌួងនេះ មានប្រមាណ៥០ដើម និងមានអាយុកាលប្រមាណជាង ៣០០ឆ្នាំមកហើយ ហើយថាក្រោយពីកាប់យកចេញហើយ អាជ្ញាធររាជធានីភ្នំពេញ នឹងដាំដើមឈើថ្មីជំនួសវិញ។ ចំណែកដើមឈើដែលនៅសល់ ក្រៅពី៣ដើមនេះ អង្គភាពរបស់លោក នឹងកាត់លះមែកចេញផងដែរ ដើម្បីកាត់បន្ថយទម្ងន់ដើមឈើ៕
