ប្រធានគណបក្ស «ខ្មែរឈ្នះ» លោក សួង សុភ័ណ្ឌ ត្រូវបានសមត្ថកិច្ចចាប់ខ្លួន និងកំពុងឃុំខ្លួននៅស្នងការដ្ឋាននគរបាលរាជធានីភ្នំពេញ រង់ចាំចាត់ការតាមនីតិវិធីច្បាប។
បើតាមប្រភពបានបញ្ជាក់ថា ការចាប់ខ្លួន លោក សួង សុភ័ណ្ឌ ដែលគេស្គាល់ថាធ្លាប់ជាសកម្មជនបក្សប្រឆាំងនិងបឹងកក់ គឺបានធ្វើឡើងនៅរសៀលថ្ងៃទី១៤ សីហា ២០២០នេះ ដោយត្រូវបានគេអះអាងថាពាក់ព័ន្ធនឹងបទល្មើសជាក់ស្តែង(ការញុះញង់បំភ្លៃការពិតលើបញ្ហាព្រំដែន)។
បើតាមតំណាងអយ្យការអមសាលាដំបូងរាជធានីភ្នំពេញ លោក គុជ គឹមឡុង បានបញ្ជាក់ប្រាប់ប្រព័ន្ឋផ្សព្វផ្សាយក្នុងស្រុកថា លោក សួង សុភ័ណ្ឌ ពិតជាត្រូវបានចាប់ខ្លួនមែន ក្នុងបទល្មើសជាក់ស្តែងទាក់ទងនឹងការញុះញង់បំភ្លៃការពិតលើបញ្ហាព្រំដែន និងការចោទប្រកាន់មួលបង្កាច់ទម្លាក់កំហុស លើគណៈកម្មាធិការចម្រុះកិច្ចការព្រំដែនថា ប្រព្រឹត្តបទល្មើសក្បត់ជាតិ»។
ជាការកត់សម្គាល់ លោក សួង សុភ័ណ្ឌ ក្លាយជាជនទី២ហើយ ដែលត្រូវសមត្ថកិច្ចរាជរដ្ឋាភិបាលចាប់ខ្លួន ដោយត្រូវជាប់ចោទពីបទល្មើសជាក់ស្តែងញុះញង់បំភ្លៃការពិតលើបញ្ហាព្រំដែននៅភាគខាងកើតប្រទេសកម្ពុជាបន្ទាប់ពីលោក រ៉ុង ឈុន ប្រធានសហភាពសហជីពកម្ពុជា និងជាអតីតប្រធានសមាគមគ្រូបង្រៀនកម្ពុជាឯករាជ្យ ត្រូវបានសមត្ថកិច្ចចាប់ខ្លួនទាំងយប់កាលពីថ្ងៃទី០១ សីហា ២០២០ ក្នុងបទល្មើសស្រដៀងគ្នានេះ ៕
