ដីសាធារណៈដែលមានតម្លៃជិត៣លានដុល្លារ ហើយត្រូវបានភរិយាមន្ត្រីសាលារាជធានីភ្នំពេញម្នាក់សង់របងព័ទ្ធចង់យកធ្វើជាកម្មសិទ្ធិឯកជននោះ ត្រូវបានអាជ្ញាធរសម្រេចវ៉ៃកម្ទេចចោលមកធ្វើជាទ្រព្យសម្បត្តិសាធារណៈវិញហើយ។
ហេតុការណ៍នេះ បានធ្វើឲ្យមជ្ឈដ្ឋានមួយចំនួននិងប្រពលរដ្ឋក្បែរខាងដីសាធារណៈរបស់រដ្ឋនោះមានការសាទរកាលពីថ្ងៃទី០៩ កញ្ញា ២០២០ ។
ស្ថិតនៅផ្លូវលេខ១៨១៨តភ្ជាប់ពីផ្លូវលេខ៥៩៧ ទៅកាន់ផ្លូវលេខ១៨០០ ទួលពពែ សង្កាត់ទួលសង្កែ២ ខណ្ឌឫស្សីកែវ ។
ដីនោះមានទំហំទទឹង២០ម៉ែត្រ ត្រូវបានមន្ត្រីខិលខូចបិទយកប្រវែង១៣០ម៉ែត្រគុណនឹង២០ម៉ែត្រ ។
បើតាមអ្នករកស៊ីទិញលក់ដី បានប៉ាន់ប្រមាណថា ដីទំហំ២៦០០ម៉ែត្រក្រឡាដែលគេបិទយកធ្វើជាកម្មសិទ្ធិឯកជននោះ មានតម្លៃប្រមាណ២លាន៦សែនដុល្លារឯណោះ ។
មិនទាន់ដឹងថា តើភរិយាមន្ត្រីសាលារាជធានីភ្នំពេញនោះមានឈ្មោះអ្វីនោះទេ ហើយក៍មិនទាន់ដឹងថាប្តីរបស់គាត់ដែលគេអះអាងថាជាមន្ត្រីសាលារាជធានីភ្នំពេញនោះមនឈ្មោះអ្វី និងកាន់តំណែងអ្វីនោះដែរ ប៉ុន្តែគេដាក់ការសង្ស័យថា ប្តីរបស់ស្ត្រីនោះ ទំនងជាមានតួនាទីមុនតូចនោះដែរ ហើយហេងសយលោកប្តីនោះមានអំណាចថែមទៀត ។
យ៉ាងណា នៅរសៀលថ្ងៃទី១០ កញ្ញា ២០២០នេះ «អង្រុត» មិនអាចរកការសុំអត្ថាធិប្បាយបញ្ជាក់បន្ថែមបានទេពីអ្នកនាំពាក្យរដ្ឋបាលសាលារាជធានីភ្នំពេញ ៕
