ទីបំផុតទៅម្ចាស់សណ្ឋាគារ Le Palais Hotel ដែលមានទីតាំងស្ថិតនៅកោះ Phangan ប្រទេសថៃ
ថ្នាក់ដឹកនាំសណ្ឋាគារ Le Palais Hotel នៅលើកោះ Phangan បានធ្វើការសុំទោសដែលចំពោះការយករូបចម្លាក់ប្រាសាទខ្មែរមកដាក់លម្អនៅក្នុងទីកន្លែងរបស់ខ្លួន ។
បើតាម បាងកកប៉ុស្តិ៍ចេញផ្សាយនៅព្រឹកថ្ងៃទី០៥ តុលា ២០២០នេះ ម្ចាស់សណ្ឋាគារខាងលើជាប្តីប្រពន្ឋមានដើមកំណើតខ្មែរ សញ្ជាតិបារាំង តែមិនបង្ហាញឈ្មោះ បានបញ្ជាក់ថាការយករូបចម្លាក់និងសង់យកលំនាំរចនាបថអង្គរនោះ ក៍ព្រោះតែខ្លួនចង់បង្ហាញពីភាពថ្កុំថ្កើងនៃអារ្យធម៌ខ្មែរតែប៉ុណ្ណោះ ។
គិតត្រឹមម៉ោង១២និង៣៧នាទីថ្ងៃត្រង់ថ្ងៃចន្ទដដែលនេះ មិនទាន់មានប្រតិកម្មតបណាមួយនៅឡើយទេពីមន្ត្រីរាជរដ្ឋាភិបាលខ្មែរ ពិសេសមន្ត្រីក្រសួងវប្បធ៌មនិងវិចិត្រសិល្បៈ ។
កាលពីចុងសប្តាហ៍មុន ក្រោយបែកធ្លាយរូបភាពសណ្ឋាគារខាងលើតាមបណ្តាញសង្គមហ្វេសប៊ុក អ្នកនាំពាក្យក្រសួងវប្បធម៌ និងវិចិត្រសិល្បៈ លោក ឡុង ប៉ុណ្ណាស៊ីរីវត្ថ បានប្រាប់ប្រព័ន្ឋផ្សព្វផ្សាយក្នុងស្រុកថា ករណីនេះក្រសួងវប្បធម៌ និងវិចិត្រសិល្បៈ កំពុងសិក្សាតាមទិដ្ឋភាពច្បាប់ និងទិដ្ឋភាពជាក់ស្តែង ក្នុងករណីសណ្ឋាគារ Le Palais Hotel បានសាងសង់ដោយយកតាមលំនាំនៃរចនាបថប្រាសាទខ្មែរដូចជាប្រាសាទបាយ័ន ប្រាសាទអង្គរវត្ត និងប្រាសាទបន្ទាយស្រីជាដើម។
បើតាមអ្នកនាំពាក្យដដែល ម្ចាស់សណ្ឋាគារនេះ មិនបានសុំច្បាប់អនុញ្ញាតពីប្រទេសកម្ពុជានោះទេ។ ក្នុងករណីនេះ កម្ពុជានឹងធ្វើការដោះស្រាយតាមរយៈផ្លូវទូតជាមួយនឹងប្រទេសថៃ៕
