ខេត្តឧត្ដរមានជ័យ ៖ ក្មេងប្រុសអភ័ព្វម្នាក់ អាយុ៧ខែ ត្រូវឪពុកចុងចិត្តកំណាចចាប់កាច់បំបាក់ដៃ និងបំបាក់ជើងចោលដោយគ្មានអាណិតអាសូរ ករណីបង្កអំពើហិង្សាក្នុងគ្រួសារនេះកើតឡើងជាង២សប្ដាហ៍ ប៉ុន្តែទើបបែកធ្លាយតាមបណ្តាញហ្វេសប៊ុកម្សិលមិញនេះ ។
ក្រោយបែកធ្លាយអំពើហិង្សាបង្ហាញពីអំពើឃោរឃៅនិងទារុណកម្មទៅលើកុមារ កាលពីថ្ងៃទី១២ ខែឧសភា ឆ្នាំ២០២០ ក្រុមការងារការពារកុមារ CPU បានចាប់ផ្តើមធ្វើការស៊ើបអង្កេត ដោយមានកិច្ចសហប្រតិបត្តិការជាមួយនគរបាលខេត្តឧត្តរមានជ័យ និងក្រសួងមហាផ្ទៃ រហូតដល់កម្លាំងសមត្ថកិច្ចធ្វើការចាប់ខ្លួនឪពុកចុង ដើម្បីសួរនាំ ។
ហេតុការណ៍បង្កអំពើហិង្សាក្នុងគ្រួសារ ចាប់កាច់បំបាក់ដៃបំបាក់ជើងទៅលើក្មេងរងគ្រោះ បានកើតឡើងកាលពីថ្ងៃទី២៨ ខែមេសា ឆ្នាំ២០២០ នៅក្រុងសំរោង ខេត្តឧត្តរមានជ័យ ប៉ុន្តែទើបបែកធ្លាយ នៅថ្ងៃទី១២ ឧសភានេះ ។
លោកឧត្ដមសេនីយ៍ទោ ម៉ែន លី ស្នងការនគរបាលខេត្តឧត្ដរមានជ័យ បានប្រាប់ដឹងថា នៅព្រឹកថ្ងៃទី១៣ ខែឧសភា ឆ្នាំ២០២០ ដោយមានការអនុញ្ញាតពីព្រះរាជអាជ្ញាអមសាលាដំបូងខេត្តឧត្តរមានជ័យ សមត្ថកិច្ចជំនាញរបស់ស្នងការដ្ឋាននគរបាលខេត្ត បានកោះហៅឈ្មោះ ធួន ផាណា ភេទប្រុស អាយុ៣៤ឆ្នាំ មកសាកសួរពាក់ព័ន្ធនឹងករណីកាច់ដៃ កាច់ជើងកុមារាម្នាក់ ត្រូវជាកូនចុងរបស់ខ្លួន។
សូមបញ្ជាក់ថា កាលពីថ្ងៃ២៨ មេសា ២០២០ ជនដៃដល់ជាឪពុកចុងឈ្មោះ ធួន ផាណា បានចាប់កាច់ដៃកាច់ជើងកូនចុងរបស់ខ្លួន ដែលមានអាយុមិនទាន់បាន១ឆ្នាំស្រួលបួលផង ។ ក្រោយកើតហេតុ ស្ត្រីជាម្ដាយកុមាររងគ្រោះបាននាំកូនទៅពេទ្យ ហើយបានថតរូបទុក ។ ស្ត្រីជាម្តាយមានកូនជាមួយប្តីមុន រូបនេះ បម្រុងលាក់ទុករឿងអំពើហិង្សានេះ ព្រោះគិតថា បុរសនេះ(ឈ្មោះ ធួន ផាណា) មិនដោះដៃចោលខ្លួន… ប៉ុន្តែ មិនដឹងយ៉ាងម៉ែច បានជានៅថ្ងៃម្សិលមិញនេះ ទើបដាច់ចិត្តប្តឹងសមត្ថកិច្ច ហើយក៏ចាប់ខ្លួនបានកាលពីព្រឹកមិញនេះ តែម្តង ។
បច្ចុប្បន្នឈ្មោះ ធួន ផាណា កំពុងសាកសួរនៅការិយាល័យជួញដូរមនុស្ស និងការពារអនីតិជន ។ ទោះជាយ៉ាងណា ស្ត្រីជាម្ដាយកុមាររងគ្រោះក៏បានដាក់ពាក្យបណ្ដឹងនៅស្នងការដ្ឋាននគរបាលខេត្តឧត្ដរមានជ័យផងដែរ ដើម្បីអោយចាត់ការឈ្មោះ ផាណា ទៅតាមផ្លូវច្បាប់ ៕
