រាជធានីភ្នំពេញ ៖ គណៈសង្ឃនាយក នៃព្រះរាជាណាចក្រកម្ពុជា ចាត់ទុកថា ភិក្ខុ ឡុង ចន្ថា ជាបុគ្គលរបឹងរឹងរុស (ទុព្វចជាតិកភិក្ខុ) មិនលុះក្នុងធម៌វិន័យ និងការអប់រំ ជាអ្នកប្រទូស្តសារ៉ាយសាសនា ជាអ្នកមិនចម្រើនដល់សាសនា និងជាអ្នកទម្លុះរដ្ឋបាលសង្ឃ ពុំអាចឱ្យស្ថិតនៅក្នុងភេទជាបព្វជិត ក្នុងព្រះពុទ្ធសាសនា បន្តទៀតបានឡើយ ។
អាស្រ័យហេតុនេះ គណៈសង្ឃនាយក បានប្រគេនមកព្រះមេគណទាំង ២៥ រាជធានី-ខេត្ត ទូទាំងប្រទេស កុំផ្តល់អាវាស(វត្ត) ដល់បុគ្គលរូបនេះឲ្យស្នាក់នៅបន្តក្នុងសាសនាតទៅទៀត ផ្ទុយទៅវិញ បើឃើញបុគ្គលរូបនេះ ក្នុងដែនសមត្ថកិច្ចរបស់ខ្លួន ត្រូវសហការជាមួយអាជ្ញាធរពាក់ព័ន្ធ ចាត់វិធានការឲ្យលាចាកសិក្ខាបទ(សឹក)តាមកិច្ចសន្យារបស់ខ្លួនដែលបានធ្វើជាមួយសាលាគណខេត្តតាកែវ ។
សូមរម្លឹកថា កាលពីថ្ងៃទី១៤ ឧសភា ២០២០នេះ គឺជាថ្ងៃដែល ភិក្ខុ ឡុង ចន្ថា សុំមកលាចាកសិក្ខាបទ(សឹក)ដោយខ្លួនឯង នៅវត្តភ្នំបុរី ប៉ុន្តែគិតមកត្រឹមម៉ោង០៩ព្រឹកថ្ងៃនោះ ពោលគឺដល់ថ្ងៃសន្យា«លាចាកសិក្ខាបទ» បែរបាត់ដំណឹងភិក្ខុ ឡុង ចន្ថា ឈឹង ។
កោះសន្តិភាពជួបផ្ទាល់ជាមួយព្រះសង្ឃ នៅវត្តភ្នំបុរី ស្ថិតក្នុងកន្លែងត្រូវធ្វើពិធីសឹក បានមានសង្ឃដីកា បញ្ជាក់ថា លោកឡុង ចន្ថា បានចេញទៅវត្ត «គោកពោធិ៍» ជាស្រុកកំណើតលោកគង់នៅវត្តភ្នំបុរី ឃុំព្រែកផ្ទោល ស្រុកអង្គរបុរី ខេត្តតាកែវ ដោយមិនបានដឹងដំណឹងយ៉ាងណានោះទេមកទល់ថ្ងៃនេះ ។
យោងតាមព្រះអង្គនៅវត្តភ្នំបុរី មានសង្ឃដីកាទៀតថា លោកឡុង ចន្ថា ទើបមកគង់នៅវត្តភ្នំបុរីនេះ បានរយៈជាង១ឆ្នាំប៉ុណ្ណោះ ។ ហើយបើតាមលោកឡុង ចន្ថា ធ្លាប់មានសង្ឃដីកាប្រាប់កន្លងមកថា បើលោកបួសឧបជ្ឈានៅវត្តណា នោះលោកត្រូវទៅសឹកវត្តនោះវិញ ។ ក៏ប៉ុន្តែមិនមានប្រភពច្បាស់លាស់ណាមួយថា គាត់សឹកនៅវត្តណានោះឡើយ ។
នៅក្នុងកិច្ចសន្យា ដែលបានធ្វើឡើងនៅវត្តតុំ ជាវត្តព្រះមេគណ មានទីតាំងនៅភូមិតុំ សង្កាត់រកាក្រៅ ស្រុកដូនកែវ ភិក្ខុ ឡុង ចន្ថា មានសង្ឃដីកាថា «បើគិតជាទោសក្នុងព្រះវិន័យ មិនដល់ថ្នាក់សឹកទេ ប៉ុន្តែកុំឱ្យខូចតម្លៃព្រះពុទ្ធសាសនា ភិក្ខុ ឡុងចន្ថា សម្រេចលាចាកសិក្ខាបទដោយខ្លួនឯង នៅថ្ងៃទី១៤ ខែឧសភា ឆ្នាំ២០២០ខាងមុខនេះ» ។ កិច្ចសន្យាសម្រេចចិត្តលាចាកសិក្ខាបទដោយខ្លួនឯង ក្រោយមានការបែកធ្លាយវីដេអូឆាតញ៉ែស្រីតាម Facebook ៕
