រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា កម្លាំងនគរបាលអន្តរាគមន៍ បានបើកការចុះបង្ក្រាបទីតាំងកត់ឆ្នោតវៀតណាមខុសច្បាប់មួយកន្លែង នៅចំណុចទីតាំងវេរលុយ «ទ្រូម៉ាន់នី» ស្ថិតតាមបណ្តោយផ្លូវលេខ៣៧១ ក្នុងភូមឬស្សីទី១ សង្កាត់ស្ទឹងមានជ័យទី៣ ខណ្ឌមានជ័យ កាលពីម៉ោង៣និង៣០នាទីរសៀល ថ្ងៃទី២៥ ខែឧសភា ឆ្នាំ២០២០ ។
សេចក្តីរាយការណ៍បន្តថា ជនសង្ស័យជាអ្នកឆ្នោតមានឈ្មោះ ពេជ្រ ពន្លក ភេទប្រុស អាយុ៣៩ឆ្នាំ មុខរបរបើកសេវាកម្មវេរលុយទ្រូម៉ាន់នី មានទីលំនៅភូមិត្នោតជ្រុំ សង្កាត់បឹងទំពន់២ ខណ្ឌមានជ័យ ។
បើតាមមន្ត្រីសមត្ថកិច្ចឱ្យដឹងថា ដោយទទួលព័ត៌មានរាយការណ៍ពីពលរដ្ឋថា មានការលួចលាក់កត់ឆ្នោតវៀតណាមខុសច្បាប់នៅចំណុចទីតាំងខាងលើរួចមក កម្លាំងនគរបាលខណ្ឌ សហការជាមួយនគរបាលប៉ុស្តិ៍ និងមានការសម្របសម្រួលនីតិវិធីច្បាប់ដោយព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ បានបើកការចុះបង្ក្រាបជាក់ស្តែងតែម្តង ដោយមានការឃាត់ខ្លួនអ្នកកត់ឆ្នោតម្នាក់ ដែលជាអ្នកប្រកបរបររកស៊ីអាជីវកម្មវេរលុយ «ទ្រូម៉ាន់នី» នៅចំណុចចុះបង្ក្រាបនោះ ។
ប្រភពដដែលបន្តថា ក្នុងការចុះបង្ក្រាបខាងលើនេះ សមត្ថកិច្ចធ្វើការដកហូតបានក្រដាសមានសរសេរលេខឆ្នោតវៀតណាមចំនួន០៣សន្លឹក, ក្រដាសតូចៗសម្រាប់កត់លេខឆ្នោតមួយចំនួន, ត្រា សម្រាប់ចុះថ្ងៃខែឆ្នាំ ចំនួន០១, ប៊ិចពណ៌ខៀវមួយចំនួន, ម៉ាស៊ីនគិតលេខចំនួន២គ្រឿង, ទូរស័ព្ទដៃចាស់ ចំនួន២គ្រឿង និងលុយខ្មែរចំនួន២៩០០០០រៀល។
បច្ចុប្បន្នជនសង្ស័យត្រូវបានឃុំខ្លួនបណ្តោះអាសន្ននៅប៉ុស្តិ៍រដ្ឋបាលនគរបាលស្ទឹងមានជ័យទី៣ រង់ចាំកសាងសំណុំរឿងបញ្ជូនទៅតុលាការ ដើម្បីចាត់ការទៅតាមនីតិវិធីច្បាប់នៅពេលក្រោយ ៕ (កែសម្រួលដោយ ៖ បុប្ផា)
