រាជធានីភ្នំពេញ ៖ យោងតាមហ្វេសប៊ុកផេករបស់លោក ផែង វណ្ណៈ ដែលបង្ហោះនៅថ្ងៃទី២៥ មិថុនា ២០២០នេះ មានខ្លឹមសារថា «៣ឆ្នាំមុន លោកជំទាវសមាជិកព្រឹទ្ធសភាប្ដឹង បន្ទាប់មក លោកជំទាវសមាជិកព្រឹទ្ធសភានោះ ក៏អស់តំណែងលែងជាសមាជិកព្រឹទ្ធសភា ទៀតហើយ ។ ឥឡូវ ៣ឆ្នាំក្រោយ លោកជំទាវសមាជិករដ្ឋសភាប្ដឹងម្ដង ។ ហេហេ គិតសព្វៗទៅការងារខ្ញុំ អត់មានរាស្ត្រណាប្ដឹងសោះ មានតែលោកជំទាវៗ ប្ដឹងរហូតហ្មង» ។
ហ្វេសប៊ុកផេកដដែល ក៏បានអោយដឹងដែរថា លោក ផែង វណ្ណៈ ឡើងតុលាការថ្ងៃ៣០ មិថុនា ២០២០ តាមបណ្ដឹងរបស់លោកជំទាវ ឡោក ខេង ។ លោកជំទាវ ឡោក ខេង ជាតំណាងរាស្ត្រមណ្ឌលភ្នំពេញ នៅថ្ងៃទី២១ ខែមេសា ឆ្នាំ២០២០ បានប្ដឹង លោក ផែង វណ្ណៈ ទៅអយ្យការអមសាលាដំបូងរាជធានីភ្នំពេញ ពីបទញុះញង់អោយមានការរើសអើង, បរិហារកេរ្តិ៍ជាសាធារណៈ និងជេរប្រមាថជាសាធារណៈ ។
ការប្ដឹងនេះបានកើតឡើងបន្ទាប់ពីលោក ផែង វណ្ណៈ បានផ្សាយព័ត៌មានអំពីក្រុមលួចលក់ដីប្រជាពលរដ្ឋ ទំហំជាង២ហិកតា នៅភូមិ សំរោងខាងត្បូង សង្កាត់សំរោង ខណ្ឌព្រែកព្នៅ រាជធានីភ្នំពេញ ។ មេក្លោងលួចលក់ដីឈ្មោះ ឡុង ដារា ត្រូវបានសមត្ថកិច្ចចាប់ខ្លួនបញ្ជូនទៅ អយ្យការអមសាលាដំបូងរាជធានីចាត់ការតាមផ្លូវច្បាប់ និងត្រូវបានចៅក្រមចេញដីកាឃុំខ្លួនដាក់ពន្ធនាគាររួចហើយ ។
តាមចម្លើយសារភាពរបស់ ឡុង ដារា គឺ ឡុង ដារា បានលួចលក់ដីទំហំជាង ២ហិកតា អោយទៅឧត្ដមសេនីយ៍ឯក ស ថាវី ហើយឧត្ដមសេនីយ៍ឯក ស ថាវី លក់បន្តទៅអោយលោកជំទាវ ឡោក ខេង ដែលមានលោកស្រី យស មាលីណា ជាតំណាង ។
លោក ផែង វណ្ណៈ រីករាយនឹងឡើងទៅឆ្លើយបំភ្លឺ ចំពោះបណ្ដឹងរបស់លោកជំទាវ ព្រោះលោកមិនបានប្រព្រឹត្តបទល្មើសញុះញង់អ្វីនោះទេ ។
សូមរម្លឹកឡើងវិញថា លោក ផែង វណ្ណៈ បានថ្លែងប្រាប់អ្នកសារព័ត៌មាន កាលរសៀលថ្ងៃទី២១ ខែមីនា ឆ្នាំ២០១៦ ថា «នៅរសៀលថ្ងៃនេះ ខ្ញុំឡើងតុលាការសារជាថ្មីតាមពាក្យបណ្តឹង របស់លោកជំទាវ កែវ ម៉ាលី ដែលបានប្តឹងខ្ញុំ ពីបទបរិហារកេរ្តិ៍ តាមរយៈការផ្សាយបន្តពីលោក ព្រំ សាន ជុំវិញរឿងរ៉ាវទំនាក់ទំនងស្នេហារ វាងលោកជំទាវ និងលោកឧត្តមសេនីយ៍ សៀក សុជាតិ»។ សម្រាប់លោក ផែង វណ្ណៈ នៅតែអះអាងថា លោកមិនបានធ្វើអ្វីខុសនោះទេ ហើយលោកស្រី កែវ ម៉ាលី ក៏បានប្តឹងលោកម្តងរួចមកហើយ ប៉ុន្តែត្រូវបានតុលាការសម្រេចឲ្យកាត់របៀប ស្រាប់តែពេលនេះគាត់ប្តឹងម្តងទៀត ។
ពាក់ព័ន្ធនឹងករណីខាងលើនេះ អង្រុតព័ត៌មាន រង់ចាំការបំភ្លឺគ្រប់ភាគីពាក់ព័ន្ធទាំងអស់ជានិច្ច ៕
