រាជធានីភ្នំពេញ ៖ បើទោះបីជាមានធ្លាប់ចុះបង្ក្រាបជាច្រើនលើកច្រើនសារពីសំណាក់អាជ្ញាធរ និងកម្លាំងនគរបាលខណ្ឌមានជ័យ យ៉ាងណាក៏ដោយក៏ទីតាំងសង្វៀនបញ្ជល់មាន់ដ៏ធំ និងមានឥទ្ធិពលមួយកន្លែង នៅតែអាចបើកដំណើរការអោយមនុស្សម្នា ពិសេសក្រុមអ្នកញៀនល្បែងបញ្ចល់មាន់ នាំគ្នាជិះម៉ូតូ ឬរថយន្តចូលទៅលេងយ៉ាងច្រើនកុះករ ដូចផ្សារត្រី ។
សង្វៀនបញ្ជល់មាន់ដ៏ធំនោះ មានទីតាំងស្ថិតនៅក្នុងដីឡូតិ៍ទុកចោលមួយកន្លែង ខាងក្រោយរោងចក្រផលិតស៊ីម៉ង់ដ៏ធំមួយ តាមបណ្តោយផ្លូវសេះស ក្នុងសង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ ។
តាមប្រភពពីពលរដ្ឋនៅតំបន់នោះអោយដឹងថា ទីតាំងខាងលើបើកលេងជារៀងរាល់ថ្ងៃ ហើយភាគច្រើនរាល់ការដំណើរការបញ្ជល់មាន់ គឺចាប់ពីវេលាម៉ោង១រសៀល រហូតដល់ព្រលប់ពេលយប់ ដោយមានមនុស្សជិះឡាន និងម៉ូតូចេញចូលជាបន្តបន្ទាប់រហូត ។
ទន្ទឹមនឹងនោះ សង្វៀនដ៏ធំមួយនេះមិនមែនមានតែការបញ្ជល់មាន់នោះទេ ក៏មានល្បែងបៀ និងអាប៉ោងផងដែរ ។
តាមប្រភពអោយដឹងថា ម្ចាស់សង្វៀនបញ្ជល់មាន់ដ៏មានឥទ្ធិពលខាងលើនេះ មានម្ចាស់ទីតាំងឈ្មោះ « ម៉ាប់ » ដោយគេមិនដឹងថា ឈ្មោះ « ម៉ាប់ » រូបនោះមានតួនាទីអ្វី និងឥទ្ធិពលខ្លាំងប៉ុណ្ណានោះទេ បានជាទីតាំងសង្វៀនរបស់ខ្លួនអាចបើកដំណើរការបានធម្មតាវិញរហូត បន្ទាប់ពីមានការបង្ក្រាបរួចពីសំណាក់កម្លាំងអាជ្ញាធរ មានសមត្ថកិច្ច ។
គួររំលឹកផងដែរថា កាលពីថ្ងៃទី២៥ ខែឧសភា ឆ្នាំ២០២០ កន្លងទៅ កម្លាំងនគរបាលខណ្ឌមានជ័យ ដឹកនាំដោយលោកម៉េង វិមានតារា អធិការនគរបាលខណ្ឌ បានបើកការចុះបង្ក្រាបទីតាំងសង្វៀនបញ្ចល់មាន់ដ៏ធំមួយ ( ដែលមានទីតាំងក្បែរនឹងទីតាំងសង្វៀនបច្ចុប្បន្ន ) ដោយឃាត់ខ្លួនមនុស្សជាង៥០នាក់ ប៉ុន្តែក្នុងនេាះមនុស្សជាច្រើននាក់ត្រូវអប់រំដេាះលែង ដោយឡែកមនុស្សចំនួន២៧នាក់ប៉ុណ្ណេាះដែលត្រូវកសាងសំណំុរឿងបញ្ចូនទៅតុលាការ ចាត់ការទៅតាមផ្លូវច្បាប់ ។
ក្រោយការបង្ក្រាបបានជាង១ខែរួចមក ទីតាំងសង្វៀនក៏លិចចេញរូបរាងថ្មីនៅក្បែរទីតាំងចាស់ដែលធ្លាប់បានបង្ក្រាប យ៉ាងត្រជាក់រហឹមតែម្តង ។ ហើយទីតាំងនេះ គឺឧស្សាហ៍បើកបិទៗជាញឹកញ៉ាប់បំផុត នៅពេលកម្លាំងចុះបង្ក្រាបម្តងៗ៕
