ដល់ក! លោកស្នងការរងម្នាក់ លក់អាវុធឲ្យជនល្មើសចេញប្លន់

លោក​ឧត្តមសេនីយ៍ត្រី ថោ​ង វណ្ណ​ឌី ស្នងការ​រង​នៃ​ស្នងការដ្ឋាន​នគរបាល​ខេត្តព្រៃវែង ទទួល​បន្ទុក​គ្រឿងញៀន ត្រូវ​បាន​សាលាដំបូង​ខេត្តព្រៃវែង​ចោទប្រកាន់​ពី​បទ​«​លក់​អាវុធ​ដោយ​គ្មាន​ការ​អនុញ្ញាត​» តាម​មាត្រា​២០​នៃ​ច្បាប់​ស្តី​ពី​ការ​គ្រប់គ្រង​អាវុធ​គ្រឿងផ្ទុះ​និង​គ្រាប់រំសេវ ក្រោយ​លោក​ផ្កាយ​១​រូប​នេះ ត្រូវ​បាន​គេ​រក​ឃើញ​ថា បាន​លក់​អាវុធ​ឲ្យ​ជនសង្ស័យ​ម្នាក់​ចេញ​ធ្វើ​សកម្មភាព​ប្លន់​រថយន្ត​តាក់ស៊ី​មួយ​គ្រឿង​នោះ​រួច​មក ។​

​ប្រភព​ថា លោក ថោ​ង វណ្ណ​ឌី បាន​លក់​អាវុធ​ឲ្យ​ជនសង្ស័យ នៅ​ភោជនីយដ្ឋាន​ម្លប់​ស្វាយ ភូមិ​កំពង់លាវ សង្កាត់​កំពង់លាវ ក្រុង​ព្រៃវែង ខេត្តព្រៃវែង កាលពី​អំឡុង​ខែឧសភា ឆ្នាំ​២០១៩​។​

​ការ​បែកធ្លាយ​នូវ​ព័ត៌មាន​ខាងលើ​នេះ បាន​ធ្វើ​ឡើង​បន្ទាប់​ពី​មេ​ប៉ូលិស​ជាតិ លោក​ផ្កាយ​៤ នេ​ត សា​វឿ​ន កាលពី​ថ្ងៃ​ទី​២៧ កក្កដា ២០២០ បាន​សម្រេច​ផ្អាក​ការងារ​ជា​បណ្តោះអាសន្ន​លើ​លោក ថោ​ង វណ្ណ​ឌី និង កូនចៅ​៦​នាក់​ទៀត ពាក់ព័ន្ធ​ករណី​ធ្វើ​ទារុណកម្ម​និង​ជំរិត​ទារប្រាក់​ពី​ប្រជាពលរដ្ឋ​ស្លូតត្រង់ ។​

​ចំណែក​ជនសង្ស័យ​ដែល​ទិញ​អាវុធ​ពី​លោក​ផ្កាយ​១ ថោ​ង វណ្ណ​ឌី អាយុ​៤៣​ឆ្នាំ គឺ​ឈ្មោះ ជុ​ត ជី​វ័​ន្ត ភេទ​ប្រុស អាយុ​២៧​ឆ្នាំ​  មាន​តួនាទី​ជា​នាយ​រង​ការិយាល័យ​បច្ចេកទេស​វិទ្យាសាស្ត្រ​នៃ​ស្នងការដ្ឋាន​នគរបាល​ខេត្តព្រៃវែង​ក៍​ត្រូវ​បាន លោក សាយ ណូ​រ៉ា ព្រះរាជអាជ្ញា​រង​អម​សាលាដំបូង​រាជធានី​ភ្នំពេញ​ចោទប្រកាន់​ផង​ដែរ​ពី​បទ «​លួច​មាន​ស្ថាន​ទម្ងន់ទោស​ដោយ​ការ​ប្រព្រឹត្ត​អំពើ​ហិង្សា​និង​បទ​កាន់កាប់​អាវុធ​ដោយ​គ្មាន​ការ​អនុញ្ញាត​» ប្រព្រឹត្ត​នៅ​ចំណុច​ដី​ឡូ​តិ៍​គ្មា​លលេ​ខ ផ្លូវ​ថៃ​ហ្គ័​រ ភូមិ​បោះ​អង្កាញ់ សង្កាត់​ព្រែក​ឯង ខណ្ឌ​ច្បារ​អំពៅ កាលពី​ថ្ងៃ​ទី​១២ ខែវិច្ឆិកា ឆ្នាំ​២០១៩ វេលា​ម៉ោង​១​និង​៣០​នាទី​រំលង​អធ្រាត្រ តាម​មាត្រា​៣៥៣​និង​មាត្រា​៣៥៧ នៃ​ក្រមព្រហ្មទណ្ឌ និង មាត្រា​២០​នៃ​ច្បាប់​ស្តី​ពី​ការ​គ្រប់គ្រង​អាវុធ​គ្រឿងផ្ទុះ​និង​គ្រាប់រំសេវ ។​

មិនអាចរកការសុំអត្ថាធិប្បាយតបបានទេពីលោក ថោង វណ្ណឌី ជុំវិញការបែកធ្លាយព័ត៌មានខាងលើនេះ ។

​នៅ​ពេល​នេះ ជនសង្ស័យ​ទាំង​ពីរ​នាក់​កំពុង​ត្រូវ​បាន​សមត្ថកិច្ច​ជំនាញ​បន្ត​នីតិវិធី​ចាត់ការ​តាម​ផ្លូវច្បាប់ ៕