ស្នងការខេត្តកំពង់ធំ ទំនងគេចមិនផុតពីធ្លាក់តំណែងនិងជាប់ឃុំ

ទីបំផុត​ទៅ សំណុំរឿង​លោក អ៊ុ​ក កុសល ស្នងការ​នគរបាល​ខេត្តកំពង់ធំ បាន​ទៅ​ដល់​ដៃ​លោក​ឧបនាយករដ្ឋមន្ត្រី ស ខេ​ង រដ្ឋមន្ត្រី​ក្រសួងមហាផ្ទៃ​សារ​ជា​ថ្មី​ម្តងទៀត​ហើយ ហើយ​ពេល​នេះ​លោក នេ​ត សា​វឿ​ន អគ្គស្នងការ​នគរបាល​ជាតិ​និង លោក សុខ លូ អភិបាលខេត្ត​កំពង់ធំ កំពុង​ចាត់ការ​ស៊ើបអង្កេត​ហើយ ។​

​នេះ​បើ​យោង​តាម​លោក ស ខេ​ង ដែល​ប្រាប់​ក្រុម​អ្នកកាសែត​នៅ​ក្រោយ​បញ្ចប់​ពិធី​ប្រកាស​ចូល​កាន់​តំណែង​សមាជិក​គណៈកម្មាធិការ​ជាតិ​ប្រឆាំង​ទារុណកម្ម បំពាក់​ឋានន្តរស័ក្តិ និង បំពាក់​គ្រឿង​ឥស្សរិយយស នៅ​ទីស្តីការ​ក្រសួងមហាផ្ទៃ នា​ព្រឹក​ថ្ងៃ​ទី​១១ សីហា ២០២០​នេះ ។​

​លោក ស ខេ​ង បាន​ថ្លែង​ទៅ​កាន់​សំណួរ​របស់​អ្នកកាសែត​យ៉ាង​ដូច្នេះ​«​ព័ត៌មាន​ជាបឋម​ទាក់ទង​នឹង​បញ្ហា​នេះ មិនមែន​រឿង​ថ្មី​ទេ រឿង​យូរ​មក​ហើយ ក៏​ប៉ុន្តែ​អាច​មាន​បញ្ហា ពីព្រោះ​នៅ​ក្នុង​ស្នងការដ្ឋាន​កំពង់ធំ​គឺ​វា​មាន​បញ្ហា​។ ដូច្នេះ មក​ដល់​ពេល​នេះ ខ្ញុំ​មិន​ទាន់​សម្រេច​ដោះស្រាយ​យ៉ាងណា​នៅឡើយ រង់ចាំ​ក្រុមការងារ​ដើម្បី​ត្រួតពិនិត្យ​»​។​លោក​ប្រមុខ​មហាផ្ទៃ​បញ្ជាក់​បន្ថែម​ទៀត​ថា​«​តាម​ពិត​ទៅ ខ្ញុំ​បាន​ធ្វើ​លិខិត​ព្រមាន​ម្ដង​រួច​មក​ហើយ គ្រប់​គ្នា​ហ្នឹង ហើយ​ខ្ញុំ​ក៏​បាន​សន្យា​ថា ក្រោយ​ពី​ការ​ព្រមាន​ហើយ បើ​មិន​កែប្រែ អាហ្នឹង មាន​តែ​ឈាន​មួយ​ជំហាន​ទៀត គឺ​ការ​ដក​ឬ​ការ​ចាត់វិធានការ​រដ្ឋបាល​ណាមួយ​ដែល​ធ្ងន់​ជាង​នេះ​»​។​

​លោក​ឧត្តមសេនីយ៍ទោ អ៊ុ​ក កុសល ស្នងការ​នគរបាល​ខេត្តកំពង់ធំ បាន​រង​ការ​ចោទប្រកាន់​ពី​នគរបាល​នារី​ជា​ច្រើន​រូប​ថា​បាន​ប្រព្រឹត្ត​អំពើ​អ​សីល​ធ៌​ម​បំពាន​ផ្លូវភេទ​យ៉ាងធ្ងន់ធ្ងរ ។​

​នេះ​បើ​យោង​តាម​លិខិត​មួយ​ច្បាប់​ចុះ​ថ្ងៃ​ទី​៣០ កក្កដា ២០២០ របស់​នគរបាល​នារី​ដែល​អះអាង​ថា​ខ្លួន​ជា​ជន​រង​គ្រោះ​និង​បាន​ដាក់​លិខិត​ទៅ​លោក​ឧបនាយករដ្ឋមន្ត្រី ស ខេ​ង រដ្ឋមន្ត្រី​ក្រសួងមហាផ្ទៃ ដើម្បី​ចាត់វិធានការ​លើ​រូប​លោក អ៊ុ​ក កុសល ។​

​បើ​តាម​លិខិត​នគរបាល​ជានា​រី​ជា​ច្រើន​រូប ដែល​អះអាង​ថា​ខ្លួន​ជា​ជន​រង​គ្រោះ​បាន​រៀបរាប់​អំពើ​អ​សីលធម៌​របស់​លោក អ៊ុ​ក កុសល ដូច​ជា​ពេល​នារី​ចូល​ទៅ​ជួប​គាត់ មួយ​ចំនួន​គឺ​ជួបនឹង​រឿង​បែប​នេះ ហើយ​ក៏​មាន​នគរបាល​ជានា​រី​ខ្លះ ជួប​រឿង​ឈឺចាប់ ត្រូវ​បែកបាក់​គ្រួសារ ហើយ​កន្លង​មក​នារី​ជា​នគរបាល​បាន​ទៅ​បំភ្លឺ​នៅ​នាយកដ្ឋាន​បុគ្គលិក​រួច​ហើយ ប៉ុន្តែ​ពុំ​ទទួល​បាន​យុត្តិធម៌​ទេ​។ ក្រៅពី​ការ​ចោទប្រកាន់​ផ្លូវភេទ ក្នុង​លិខិត​ក៍បាន​ចោទ​លោក​ផ្កាយ អ៊ុ​ក កុសល បង្កើត​បក្ខពួក​និយម ខ្សែស្រឡាយ ប្រព្រឹត្ត​អំពើ​ពុក​រលួយ និង បញ្ហា​ជា​ច្រើន​ទៀត ។​

​កាលពី​ថ្ងៃ​ម្សិលមិញ​«​អង្រុត​»​បាន​ទំនាក់ទំនង​តាម​ទូរ​សព្ទ​ដោយ​ភ្ជាប់​បាន​ហើយ តែ​លោក អ៊ុ​ក កុសល មិន​លើក​ទូរ​សព្ទ ។ ចំណែក​នៅ​មុន​នេះ «​អង្រុត​» បាន​ព្យាយាម​សុំ​ការ​បំភ្លឺ​តប​ពី​លោក​ផ្កាយ​២ អ៊ុ​ក កុសល​ជា​ថ្មី​ម្តងទៀត ប៉ុន្តែ​នៅ​តែ​មិន​អាច​ទាក់ទង​បាន ។​

​លោក អ៊ុ​ក កុសល ក៍​ធ្លាប់​រង​ការ​ចោទប្រកាន់​ពី​ការ​ប្រព្រឹត្ត​អំពើ​ពុក​រលួយ​និង​បក្សពួក​ផង​ដែរ​និង​ត្រូវ​បាន​នគរបាល​មួយ​ចំនួន​ទម្លាយ​ព័ត៌មាន​រឿង​ពុក​រលួយ​និង​បង្កើត​បក្ខពួក​ផង​ដែរ​នា​ពេល​កន្លង​មក ។ បើ​តាម​ការ​មន្ត្រី​នគរបាល​ខ្លះ​បាន​ទម្លាយ​ថា លោក អ៊ុ​ក កុសល បាន​ពង្រាយ​មនុស្ស​ជំនិត​របស់​ខ្លួន​ឲ្យ​ចាំ​រាប់​ក្បាល​រថយន្ត​ដឹក​ទំនិញ និង​ដឹកឈើ​ឆ្លងកាត់​ខេត្តកំពង់ធំ យក​លុយ​តាម​របៀប​ពុក​រលួយ​យ៉ាង​គឃ្លើន​ដោយ​ក្នុង​រថយន្ត​មួយ​គ្រឿង​ត្រូវ​បង់លុយ​ពី​២០​ដុល្លារ​ទៅ​៥០​ដុល្លារ​រហូត​ដល់​១០០​ដុល្លារ​ទៀត​ផង ។ ក្រុម​មនុស្ស​ជំនិត​របស់​លោក អ៊ុ​ក កុសល បាន​បង្ហាញ​នូវ​ភាព​ក្រអឺតក្រទម​យ៉ាង​ខ្លាំង ព្រោះ​ពួក​គេ​ធ្វើ​អ្វី​ៗ​តាម​បញ្ជា​របស់​លោក អ៊ុ​ក កុសល ហើយ​គ្មាន​ឈ្មួញ​ឈើ​ឬ​ឈ្មួញ​ដឹក​ជញ្ជូន​ទំនិញ​ឆ្លងកាត់​ខេត្តកំពង់ធំ ណា​ម្នាក់​ហ៊ាន​តវ៉ា​នោះ​ទេ ។​

​ប្រភព​បាន​សង្កត់ធ្ងន់​ទៀត​ថា គ្រប់​ប្រធាន​ការិយាល័យ​ជំនាញ​នៅ​ក្នុង​ស្នងការដ្ឋាន​នគរបាល​ខេត្តកំពង់ធំ ត្រូវ​បាន​លោក អ៊ុ​ក កុសល ប្រើ​អំណាច​គាបសង្កត់​សព្វបែបយ៉ាង​តែ​ម្តង ។ ជាង​នេះ​ទៅ​ទៀត​សូ​ម្បី​តែ​អធិការ​នគរបាល​ក្រុង​ស្ទឹង​សែន និង​អធិការ​នគរបាល​តាម​បណ្ដា​ស្រុក​នានា​ក្នុង​ខេត្តកំពង់ធំ ក៏​ត្រូវ​លោក អ៊ុ​ក កុសល ប្រើ​អំណាច​គាបសង្កត់​យ៉ាង​កំរោល​ផង​ដែរ ។ ប្រការ​នេះ​ហើយ ដែល​ធ្វើ​ឲ្យ​មន្ត្រី​នគរបាល​ក្នុង​ស្នងការដ្ឋាន​នគរបាល​ខេត្តកំពង់ធំ អត់ធ្មត់​តទៅ​ទៀត​លែង​បាន​ហើយ​បើក​កកាយ​រឿងអាស្រូវ​ពុក​រលួយ និង​ទ​ង្វើ​មិន​ប្រក្រតី​របស់​លោក អ៊ុ​ក កុសល ដើម្បី​ឲ្យ​នាយ​ឧត្តមសេនីយ៍ នេ​ត សា​វឿ​ន អគ្គស្នងការ​នគរបាល​ជាតិ ចាត់វិធានការ​ទប់ស្កាត់​ឲ្យ​បាន​ទាន់​ពេលវេលា ។​

​រឿងអាស្រូវ​ពុក​រលួយ​របស់​លោក​ឧត្តមសេនីយ៍ទោ អ៊ុ​ក កុសល ស្នងការ​នគរបាល​ខេត្តកំពង់ធំ ត្រូវ​បាន​លាតត្រដាង​ជា​បន្តបន្ទាប់ ហើយ​លោក​ឧបនាយករដ្ឋមន្ត្រី រដ្ឋមន្ត្រី​ក្រសួងមហាផ្ទៃ កាលពី​ថ្ងៃ​ទី​២៦ មីនា ២០២០ ក៏​ធ្លាប់​ចេញ​លិខិត​ព្រមាន​លើក​ទី​១​ទៅ​លើ​លោក អ៊ុ​ក កុសល ស្នងការ​នគរបាល​ខេត្តកំពង់ធំ ផង​ដែរ ប៉ុន្តែ​រហូត​មក​ដល់​ពេល​នេះ​លោក អ៊ុ​ក កុសល នៅ​តែ​អាច​ធ្វើ​ជា​ស្នងការ​នគរបាល​ខេត្តកំពង់ធំ យ៉ាង​សុខ​ស្រួល​ហើយ​ហ៊ាន​ប្រព្រឹត្ត​បំពាន​ផ្លូវភេទ​លើ​នគរបាល​នារី​នោះ​ថែម​ទៀត ៕