តើខ្មែរទទួលបានអ្វីខ្លះពីដំណើរទស្សនកិច្ចផ្លូវការរបស់ប្រមុខការទូតជប៉ុននៅថ្ងៃនេះ ?

បើ​គ្មាន​អ្វី​ប្រែប្រួល​នោះ​ទេ រដ្ឋមន្ត្រី​ការ​បរទេស​ជប៉ុន លោក ម៉ូ​តេ​ហ្គី តូ​ស៊ី​មី​សឹ (Toshimitsu Motegi )​នឹង​អញ្ជើញ​មក​ដល់​ព្រះរាជាណាចក្រ​កម្ពុជា​នៅ​រសៀល​ថ្ងៃ​សុក្រ​នេះ ដើម្បី​បំពេញ​ដំណើរ​ទស្សនកិច្ច​ផ្លូវការ​រយៈពេល​៣​ថ្ងៃ ។​

​បើ​តាម​សេចក្តី​ជូន​ព័ត៌មាន​របស់​ក្រសួងការបរទេស​និង​សហប្រតិបត្តិការ​អន្តរជាតិ​របស់​ប្រទេស​កម្ពុជា ក្នុង​ដំណើរ​ទស្សនកិច្ច​ពី​ថ្ងៃ​ទី​២១​ដល់​ថ្ងៃ​ទី​២៣ សីហា​នេះ លោក ម៉ូ​តេ​ហ្គី តូ​ស៊ី​មី​សឹ នឹង​ចូល​ជួប​សម្តែង​ការ​គួរសម​ជាមួយ​លោកនាយក​រដ្ឋមន្ត្រី ហ៊ុន សែន មុន​ពេល​ជួប​ពិភាក្សា​ផ្លូវការ​ទ្វេភាគី​ជាមួយ​លោក ប្រាក់ សុ​ខុន រដ្ឋមន្ត្រី​ក្រសួងការបរទេស​និង​សហប្រតិបត្តិការ​អន្តរជាតិ ។​

​យ៉ាងណា​សេចក្តី​ជូន​ព័ត៌មាន​របស់​ក្រសួងការបរទេស​ចុះ​ថ្ងៃ​ទី​១២ សីហា មិន​បាន​បញ្ជាក់​លម្អិត​អំពី​ដំណើរ​ទស្សនកិច្ច​របស់​លោក​ប្រមុខ​ការទូត​ជប៉ុន​នោះ​ទេ ដោយ​គ្រាន់តែ​បញ្ហា​ទ្វេភាគី​និង​ពហុភាគី​មួយ​ចំនួន ដែល​ជា​ចំណាប់អារម្មណ៍​រួម នឹង​ត្រូវ​លើកយក​មក​ពិ​ភក្សា​នៅ​ក្នុង​ជំនួប​រវាង​ប្រមុខ​ការទូត​ទាំង​ពីរ ។​

​ក្រសួងការបរទេស​ខ្មែរ​បាន​បញ្ជាក់​បន្ថែម​ទៀត​ថា ដំណើរ​ទស្សនកិច្ច​ផ្លូវការ​របស់​លោក ម៉ូ​តេ​ហ្គី តូ​ស៊ី​មី​សឹ នឹង​ជួយ​ពង្រឹងពង្រីក​ថែម​ទៀត​នូវ​ចំណងមិត្តភាព​និង​កិច្ច​សហប្រតិបត្តិការ​ដែល​មាន​ស្រាប់​រវាង​ប្រទេស​ទាំង​ពីរ​នៅ​លើ​គ្រប់​វិស័យ ទាំង​ក្នុង​ក្របខ័ណ្ឌ​ទ្វេភាគី​និង​ពហុភាគី ហើយក៍​ជា​ការ​បង្ហាញ​នូវ​សាមគ្គីភាព​ក្នុង​ការ​ប្រ​យុ​ទ្ឋ​ប្រឆាំង​នឹង​ជំងឺ​រាតត្បាត​សកល​កូ​វី​ដ​-១៩ ក៍​ដូច​ជា​កិច្ច​សហប្រតិបត្តិការ​ក្នុង​ការ​ស្តារ​សេដ្ឋកិច្ច​ឡើង​វិញ​ក្រោយ​វិបត្តិ​ជំងឺ​កូ​វី​ដ​-១៩ ។​

​ចំណែក​ក្រុម​អង្គការ​សង្គម​ស៊ី​វិល​មួយ​ចំនួន​ទាំង​ក្នុង​និង​ក្រៅ​ស្រុក ដូចជាអង្គការ​ឃ្លាំមើល​សិ​ទ្ឋិ​មនុស្ស (Human Right Watch) ដែល​មាន​មូលដ្ឋាន​នៅ​ក្រៅប្រទេស នៅ​មុន​ដំណើរ​មក​ដល់​របស់​លោក ម៉ូ​តេ​ហ្គី តូ​ស៊ី​មី​សឹ បាន​ស្នើ​ឲ្យ​លោក​ប្រមុខ​ការទូត​ជប៉ុន លើក​ឡើង​អំពី​បញ្ហា​គោរព​សិ​ទ្ឋិ​មនុស្ស​ជាមួយនឹង​រដ្ឋមន្ត្រី​ការ​បរទេស​ខ្មែរ​ផង​ដែរ ។​

​ជាមួយ​គ្នា​នេះ ដំណើរ​ទស្សនកិច្ច​របស់​លោក​រដ្ឋមន្ត្រី​ការ​បរទេស​ជប៉ុន ក៍​ធ្វើ​ឡើង​ចំ​ពេល​ដែល​បញ្ហា​សមុទ្រ​ចិន​ខាងត្បូង បាន​និង​កំពុង​តែ​ឡើងក​ម្តៅ​បន្តិច​ម្តង​ៗ នៅ​ពេល​ដែល​ចិន​ហាក់​បង្ហាញ​ឥ​ទ្ឋិ​ពល​កាន់តែ​ខ្លាំង មាន​ទាំង​ការ​បញ្ជូន​យន្តហោះ​ទម្លាក់​គ្រាប់បែក​ទៅ​កាន់​សមុទ្រ​ចិន​ខាងត្បូង ធ្វើ​ឲ្យ​ភាគី​នៅ​ក្នុង​ជម្លោះ​ដូច​ជា​វៀតណាម​ជាដើម បាន​ប្រកាស​ចោទប្រកាន់​ចិន​ពី​ការ​បង្ក​អសន្តិសុខ​នៅ​ក្នុង​តំបន់​៕