ចាប់ខ្លួនយុវជនម្នាក់ទៀត ខណៈព្រះតេជគុណ កើត សារ៉ាយ ត្រូវឃុំខ្លួននៅព្រៃស

ក្រុម​យុវជន​«​ថាវរៈ​» កញ្ញា សូ មេត្តា ត្រូវ​បាន​សមត្ថកិច្ច​ចាប់ខ្លួន​នៅ​វេលា​ម៉ោងជាង​៦​ល្ងាច​ថ្ងៃ​ទី​០៧ កញ្ញា ២០២០​នេះ ។​

​មក​ទល់​នឹង​ពេល​នេះ យុវជន​នៃ​ក្រុម​យុវជន​«​ថាវរៈ​» និង ក្រុម​យុវជន​ចលនា​មាតា​ធម្មជាតិ​ជាង​១០​នាក់​ហើយ ត្រូវ​បាន​សមត្ថកិច្ច​រដ្ឋាភិបាល​ចាប់ខ្លួន ពាក់​ព័​ន្ឋ​នឹង​ការ​ចូលរួម​ធ្វើ​បាតុកម្ម​តវ៉ា​ឲ្យ​មានការ​ដោះ​លែង​លោក រ៉ុ​ង ឈុ​ន ប្រធាន​សហភាព​សហជីព​កម្ពុជា​និង​សង្គម​ស៊ី​វិល​មួយ​ចំនួន​ទៀត ។​

​ដោយឡែក​បើ​តាម​លោក​ឧត្តមសេនីយ៍ឯក ឆាយ គឹ​ម​ខឿន អ្នកនាំពាក្យ​អគ្គស្នងការ​នគរបាល​ជាតិ​បាន​ប្រាប់ Thmey Thmey ឲ្យ​ដឹង​ថា ព្រះ​តេជគុណ កើត សា​រ៉ា​យ ត្រូវ​បាន​ចាប់​ផ្សឹក មុន​នឹង​ត្រូវ​បញ្ជូន​ទៅ​តុលាការ​រាជធានី​ភ្នំពេញ​ជាមួយ​យុវជន​ម្នាក់​ទៀត​ឈ្មោះ មាន ព្រហ្ម​មុនី កាលពី​ព្រឹក​ថ្ងៃ​៧ កញ្ញា​នេះ ។​

​សូម​បញ្ជាក់​ដែរ​ថា ព្រះ​តេជគុណ កើត សា​រ៉ា​យ និង​យុវជន មាន ព្រហ្ម​មុនី ដែល​ជា​សមាជិក​នៃ​ក្រុម​យុវជន​ខ្មែរ​ថាវរៈ ត្រូវ​បាន​សមត្ថកិច្ច​ចូល​ទៅ​ចាប់​កាលពី​រសៀល​ថ្ងៃ​ម្សិលមិញ ក្នុង​ទីស្នាក់ការ​របស់​សមាគមនិស្សិត​បញ្ញវន្ត​ខ្មែរ ស្ថិត​នៅ​ជាប់​ផ្សារ​ស៊ី​ខេ (CK Market) ខណ្ឌ​ពោធិ៍​សែន​ជ័យ រាជធានី​ភ្នំពេញ​។ អ្នក​ទាំង​ពីរ​ត្រូវ​ចាប់ខ្លួន បន្ទាប់​ពី​ប្រកាស​ជំហរ​ថា នៅ​តែ​ចូលរួម​ដឹកនាំ​ធ្វើ​បាតុកម្ម​ទាមទារ​ឲ្យ​ដោះ​លែង​លោក រ៉ុ​ង ឈុ​ន និង​ទាមទារ​ឲ្យ​មាន​យុត្តិធម៌​សង្គម ។​

​កាលពី​ថ្ងៃ​ទី​០២ កញ្ញា ២០២០ សាលា​រាជធានី​ភ្នំពេញ បាន​ចេញ​លិខិត​មួយ​ដោយ​មិន​អនុញ្ញាត​ឲ្យ​មានការ​ធ្វើ​បាតុកម្មអហិង្សា​ដើម្បី​ទាមទារ​តវ៉ា​រក​យុ​ត្តិ​ធ៌​ម​សង្គម រៀបចំ​ឡើង​ដោយ​ក្រុម​យុវជន​«​ថាវរៈ​»​និង​សង្គម​ស៊ី​វិល​មួយ​ចំនួន​ទៀត​នោះ​ទេ ។​

​ការ​មិន​អនុញ្ញាត​ឲ្យ​លោក មាន ព្រហ្ម​មុនី លោក ថា ឡា​វី និង កញ្ញា អេ​ង ម៉ា​ឡៃ ដឹកនាំ​ការ​ធ្វើ​បាតុកម្ម​រយៈពេល​០៩​ថ្ងៃ ដោយ​ផ្តើម​ពី​ថ្ងៃ​ទី​០៧​នេះ​ដល់​ថ្ងៃ​ទី​១៥ កញ្ញា ២០២០ វេលា​ម៉ោង ៨​ព្រឹក​ដល់​ម៉ោង​៦​ល្ងាច​នោះ ដោយ​សាលា​រាជធានី​ភ្នំពេញ​សំអាង​ថា មេដឹកនាំ​បាត​កម្ម​ទាំង​៣​រូប​ខាងលើ មិន​អាច​កំណត់​សមាសភាព​និង​ចំនួន​អ្នកចូលរួម​ច្បាស់លាស់ ដែល​អាច​ធ្វើ​ឲ្យ​បាតុកម្ម​នេះ​ប៉ះពាល់​ដល់​សន្តិសុខ​ធ្ងន់ធ្ងរ និង​សណ្តាប់ធ្នាប់​សាធារណៈ​តាម​ច្បាប់​ស្តី​ពី​បាតុកម្ម និង​ម្យ៉ាង​អ្នកចូលរួម​ធ្វើ​បាតុកម្ម​នេះ បាន​ធ្វើការ​អំពាវនាវ​តាម​បណ្តាញ​សង្គម​ផេ​ក​ឈ្មោះ «​ពលរដ្ឋ​សកម្ម​»​ដែល​ខ្លឹមសារ​មាន​ចរិត​បំផុស ញុះញង់​ឲ្យ​ប្រឆាំង​ជាមួយនឹង​ដំណើរការ​នីតិវិធីតុលាការ ៕