ជនជាតិហុងគ្រីម្នាក់សង្ស័យផ្ទុកមេរោគកូវីដ១៩ កំពុងរត់គេចពីខេត្តសៀមរាប

បុរស អាយុ​៧០​ឆ្នាំ ជនជាតិ​ហុង​គ្រី​ម្នាក់ ត្រូវ​បាន​ក្រសួងសុខាភិបាល​ប្រកាស​ថា​សង្ស័យ​ផ្ទុកមេរោគ​កូ​វី​ដ​១៩ នឹង​កំពុង​រត់គេច​ខ្លួន ។​

​ក្រសួងសុខាភិបាល​ក៍បាន​អំពាវនាវ​ដល់​ពលរដ្ឋ​ដែល​ឃើញ​បុរស​ខាងលើ សូម​ផ្តល់​ព័ត៌មាន​មក​កាន់​សមត្ថកិច្ច​ជា​បន្ទាន់ ដើម្បី​ទប់ស្កាត់​ការ​រីក​រាលដាល​ក្នុង​សហគមន៍ ។​

​យោង​តាម​សេចក្តី​ជូន​ព័ត៌មាន​របស់​ក្រសួងសុខាភិបាល​បាន​បញ្ជាក់​ទៀត​ថា ជា​ជនជាតិ​ហុង​គ្រី ស្នាក់​នៅ​ភូមិ​គ្រួ​ស ឃុំ​ស្វាយ​ដង្គំ ក្រុង​សៀមរាប ខេត្តសៀមរាប ។ បុរស​វ័យ​៧០​ឆ្នាំ​រូប​នេះ ជា​អ្នក​ធ្វើ​ដំណើរ​ពី​ប្រទេស​បារាំង បន្ត​ជើងហោះហើរ​តាម​ប្រទេស​កូរ៉េ​ខាងត្បូង បាន​មក​ដល់​កម្ពុជា​នៅ​ថ្ងៃ​ទី​១៣ ខែកញ្ញា ឆ្នាំ​២០២០ ហើយ លទ្ធផល​តេស្ត​របស់​គាត់​នៅ​ពេល​នោះ គឺ​អវិជ្ជមាន​វីរុស​កូ​វី​ដ​-១៩​ ។

បន្ទាប់​មក​គាត់​ត្រូវ​បាន​បន្ត​ធ្វើ​ច​ត្តា​ឡី​ស័ក​នៅ កន្លែង​ស្នាក់​នៅ​របស់​តាម​អាសយដ្ឋាន​ខាងលើ​នេះ នៅ​ខេត្តសៀមរាប រហូត​ដល់​ថ្ងៃ​ទី​១៣​នៃ​ការ​ធ្វើ​ច​ត្តា​ឡី​ស័ក របស់​គាត់​ត្រូវ​នឹង​ថ្ងៃ​ទី​២៥ ខែកញ្ញា ឆ្នាំ​២០២០ ការ​ធ្វើតេស្ត​ឡើង​វិញ​ក៏​បាន​បង្ហាញ​លទ្ធផល​សង្ស័យ​ថា វិជ្ជមាន​វីរុស​កូ​វី​ដ​-១៩ ហើយ​វត្ថុ​សំណាក​របស់​គាត់​ត្រូវ​បាន​បញ្ជូន (​មក​ដល់​នៅ​វេលា​យប់​ម៉ោង​ប្រហែលជា​១១៖០០​យប់ នៃ​ថ្ងៃ​ទី​២៥ ខែកញ្ញា ឆ្នាំ​២០២០) ធ្វើការ​វិភាគ​បញ្ជាក់​នៅ​វិទ្យាស្ថាន​ប៉ាស្ទ័រ​កម្ពុជា រាជធានី​ភ្នំពេញ ហើយ​ការ​វិភាគ​របស់​វិទ្យាស្ថាន​នេះ នឹង​ធ្វើ​នៅ​វេលា​ព្រឹក​នៃ​ថ្ងៃ​ទី​២៦ ខែកញ្ញា ឆ្នាំ​២០២០ រីឯ​លទ្ធផល​រំពឹង​ថា​នឹង​អាច​ទទួល​បាន​នៅ​ល្ងាច​នៃ​ថ្ងៃ​ដដែល​។​

​ទន្ទឹម​នឹង​ពេល​នៃ​ការ​បញ្ជូន​វត្ថុ​សំណាក និង​រង់ចាំ​ការ​វិភាគ​បញ្ជាក់​លើ​ភាព​វិជ្ជមាន​វីរុស​កូ​វី​ដ​-១៩ ពី​វិទ្យាស្ថាន​ប៉ាស្ទ័រ​កម្ពុជា រាជធានី​ភ្នំពេញ ស្រាប់តែ​ក្រុមការងារ​នៃ​មន្ទីរ​សុខាភិបាល​ខេត្តសៀមរាប មិន​អាច​ទាក់ទង​ជាមួយ​បុរស​រូប​នេះ​បាន​ឡើយ ដោយ​បុរស​ខាងលើ​នេះ បាន​រត់គេច​ចេញពី​កន្លែង​ស្នាក់​នៅ​ខាង លើ​របស់​គាត់​បាត់​តែ​ម្ដង​។ បច្ចុប្បន្ន​អាជ្ញា​ធរមាន​សមត្ថកិច្ច​ខេត្តសៀមរាប កំពុង​ព្យាយាម​រុករក​បុរស​ជនជាតិ ហុង​គ្រី​រូប​នេះ តែ​មិន​ទាន់​រក​ឃើញ​នៅឡើយ​ទេ​។​

​ប្រសិនបើ​នៅ​ល្ងាច​នៃ​ថ្ងៃ​ទី​២៦ ខែកញ្ញា ឆ្នាំ​២០២០​នេះ លទ្ធផល​វិភាគ​វត្ថុ​សំណាក​របស់​គាត់ ពិតជា​ឃើញ វិជ្ជមាន​វីរុស​កូ​វី​ដ​-១៩ មែន​នោះ ស្ថានភាព​គេចវេស​របស់​គាត់​បែប​នេះ (​តាំងពី​ម៉ោង​ប្រហែលជា​៩​យប់​នៃ​ថ្ងៃ​ទី ២៥ ខែកញ្ញា ឆ្នាំ​២០២០ រហូត​មក​ទល់​ពេល​នេះ​) នឹង​អាច​មាន​ហានិភ័យ​ឆ្លង​ដល់​សហគមន៍ បើ​គាត់​ធ្វើ​ដំណើរ​ច្រើន និង​ជួប​មនុស្ស​ច្រើន​។ ក្រុម​ឆ្លើយ​តប​បន្ទាន់ និង​ធ្វើការ​ស្រាវជ្រាវ​ភ្លាម​ៗ នៅ​ពេល​រក​ឃើញ​បុរស​នេះ ៕