ទីក្រុងប៊ូសាន ៖ ចៅហ្វាយក្រុងប៊ូសាន ដែលជាទីក្រុងកំពង់ផែ ធំបំផុតរបស់ប្រទេសកូរ៉េខាងត្បូង កាលពីថ្ងៃព្រហស្បតិ៍នេះ បានស្នើសុំលាលែងពីតំណែង និងសុំទោសចំពោះការប្រព្រឹត្តអំពើផ្លូវភេទ នេះបើតាមសារព័ត៌មាន(យ៉ុនហាប់) ចុះផ្សាយថ្ងៃទី២៣ មេសានេះ ។
លោក អូ កែវដុន Oh Keodon អភិបាលក្រុងប៊ូសាន បាននិយាយនៅក្នុងសន្និសីទសារព័ត៌មានមួយថា “នៅក្នុងការប្រជុំខ្លីមួយ ដែលមានរយៈពេល៥នាទី រឿងអាស្រូវផ្លូវភេទកើតឡើងដោយមានទំនាក់ទំនងរាងកាយជាមួយមនុស្សម្នាក់ ។ ខ្ញុំឱនក្បាលសុំទោស” ។
លោក អូ កែវដុន បាននិយាយបន្តថា “ក្នុងនាមជាមន្ត្រីសាធារណៈម្នាក់ ដែលមានទំនួលខុសត្រូវ ខ្ញុំសុំលាឈប់ និងកែប្រែចំពោះកំហុសនេះដោយប្រើជីវិតដែលនៅសេសសល់ ។ ខ្ញុំមានកំហុសធំណាស់” ។
លោក អូ កែវដុន ត្រូវបានគេបោះឆ្នោតជ្រើសរើសជាអភិបាលក្រុង នៅឆ្នាំ ២០១៨ ៕
