អង្គការ Freedom House ៖ កម្ពុជារឹតត្បិតការបញ្ចេញមតិតាមអ៊ីនធឺណិតគ្រាវិបត្តិកូវីដ១៩

អង្គការ Freedom House បាន​បង្ហាញ​ថា សេរីភាព​បញ្ចេញមតិ​តាម​បណ្តាញ​អ៊ីនធឺណិត​នៅ​កម្ពុជា ស្ថិត​ក្នុង​បរិយាកាស​អាប់អួរ ក្នុង​គ្រា​វិបត្តិ​ជំងឺ​កូ​វី​ដ​១៩ ក្នុង​នោះ​មានការ​ចាប់ខ្លួន​មនុស្ស​ដែល​រិះគន់​ចំណាត់ការ​រដ្ឋាភិបាល និង​ការ​ដក​អាជ្ញា​បណ្ណ​របស់​ប្រព័ន្ធ​ផ្សព្វផ្សាយ​។​

អង្គការ​នេះ​បញ្ជាក់​ថា​៖ «​សេរីភាព​អ៊ីនធឺណិត​នៅ​តែ​រង​ការ​គំរាមកំហែង​ក្នុង​ប្រទេស​កម្ពុជា​។ លំហរ​ព័ត៌មាន​ចម្រុះ និង​ដែល​គួរ​ឲ្យ​ជឿ​ទុកចិត្ត​បាន ត្រូវ​បាន​ធ្វើ​ឲ្យ​អាក់​ដំណើរការ ដោយសារ​ការ​រាំង​ខ្ទប់​គេហទំព័រ ការ​លុប​ចោល​អាជ្ញា​បណ្ណ​ប្រព័ន្ធ​ផ្សព្វផ្សាយ​អន​ឡាញ ចំពោះ​សេចក្តីរាយការណ៍​ដែល​មាន​លក្ខណៈ​រិះគន់ និង​ដែល​ត្រូវ​ចាត់​ទុក​ថា​ជា​ការ​បំផ្លើស​សាច់​រឿង​»​។​

លោក​ឧត្តមសេនីយ៍ឯក ឆាយ គឹ​ម​ខឿន អ្នកនាំពាក្យ​របស់​អគ្គស្នងការ​នគរបាល​ជាតិ ប្រាប់​វី​អូ​អេ​ថា ការ​ចាប់ខ្លួន​អ្នក​ប្រើប្រាស់​បណ្តាញ​សង្គម​ហ្វេ​ស​ប៊ុ​ក​កន្លង​មក ក្នុង​ពេល​មាន​វិបត្តិ​ជំងឺឆ្លង​កូ​វី​ដ​១៩ នេះ ធ្វើ​ឡើង​ដោយសារ​តែ​អ្នក​ប្រើប្រាស់​ទាំងនោះ «​មាន​ចេតនា​ធ្វើ​ឲ្យ​សន្តិសុខ​សង្គម ស្ថិត​ក្នុង​ស្ថានភាព​គ្រោះថ្នាក់​» តាម​រយៈ​ការ​បង្ហោះ​ព័ត៌មាន​មិន​ពិត​។​

ចាប់ពី​ខែមករា ដល់​ខែមេសា អាជ្ញាធរ​កម្ពុជា​បាន​ចាប់ខ្លួន​ពលរដ្ឋ​កម្ពុជា​ជាង ៣០ នាក់ ដោយសារ​ការ​ចោទប្រកាន់​លើ​ការ​បង្ហោះ​ព័ត៌មាន​ក្លែងក្លាយ​។ នេះ​បើ​យោង​តាម​អង្គការ​ឃ្លាំមើល​សិទ្ធិ​មនុស្ស Human Rights Watch​។

អង្គការសិទ្ធិមនុស្ស​ចាត់​ទុក​សកម្មភាព​នេះ​ថា ជា​ការ​ប៉ុនប៉ង ដើម្បី​បង្ក្រាប​មតិ​ប្រឆាំង ដែល​រិះគន់​ការ​ដោះស្រាយ​របស់​រដ្ឋាភិបាល​លើ​ការ​រាតត្បាត​ជំងឺ​កូ​វី​ដ​១៩ និង​ផល​ប៉ះពាល់​លើ​សេដ្ឋកិច្ច​៕

ប្រភព ៖ VOA