រាជធានីភ្នំពេញ ៖ តារាសម្តែង ពីន រ៉ូហ្សា បានទទួលមរណភាពហើយ នាវេលាម៉ោង៧និង៣០នាទីព្រឹក នាថ្ងៃទី១ ខែឧសភា ឆ្នាំ២០២០នេះ ក្នុងមន្ទីរពេទ្យលោកសង្ឃ នៅរាជធានីភ្នំពេញ ។
ដំណឹងមរណៈភាពដែលកើតឡើងបើកឆាកខែថ្មី របស់តារាសម្តែង កញ្ញាពីន រ៉ូហ្សា មានឈ្មោះពិត អេង ស្រីភ័ក្រ ហៅអាស្រស់ វ័យ៣១ឆ្នាំ បានបង្កអោយមានការ សោកសៅពីសំណាក់មិត្តភក្តិ បងប្អូនសិល្បកររួមជំនាន់ ខណៈដែលខកខានជួបជុំមួយរយៈសោះ បែរជា រូបនាងលារហូត តែម្តង ។
យោងតាមការបង្ហោះរបស់អ្នកនាង ចន ច័ន្ទលក្ខិណា បានសរសេរថា «ប្អូនស្រី Ping Roza បានទទួលមរណភាព កាលពីព្រឹកមិញវេលាម៉ោង 7.30 នាទី ដោយជំងឺ ខូចតម្រងនោម, ជំងឺថ្លើម និងផ្នែកប្រព័ន្ធប្រសាទធ្ងន់ធ្ងរ សូមបងប្អូនមិត្តភក្តិ សិល្បករសិល្បការីទាំងអស់ អញ្ជើញចូលរួមរំលែកទុក្ខសពរបស់គាត់ផង
ទីតាំងតំកល់សព នៅវត្តពោធ៌ចិនតុង ដើម្បីរង់ចាំការបូជាល្ងាចនេះ» ។
ដំណឹងដ៏ក្តៅនេះ ធ្វើឲ្យអ្នកសិល្បៈដែលស្គាល់គាត់ ខ្លះមិនជឿ ខ្លះស្រឡាំងកាំង ខ្លះទន់ដៃជើង ដោយសារនឹកស្មានមិនដល់ថា តារាស្រីរូបនេះជួបរឿងអកុសល បែបនេះឡើយ ។
សូមរម្លឹកថា ស្ទើរមិនគួរឱ្យជឿ តារាសម្តែង ពីន រូហ្សា ទទួលមរណភាពហើយទាំងក្មេងខ្ចី ៕









