គិតចាប់តាំងពីថ្ងៃទី០១ កញ្ញា មកទល់នឹងព្រឹកថ្ងៃទី២០តុលា មនុស្សចំនួន៣៤នាក់បានស្លាប់(ក្មេង៨នាក់) ដោយសារគ្រោះទឹកជំនន់ទូទាំងប្រទេសកម្ពុជា ។
នេះបើយោងតាមទិន្នន័យផលប៉ះពាល់ខូចខាតដោយជំនន់ទឹកភ្លៀងឆ្នាំ២០២០ របស់នាយកដ្ឋានព័ត៌មានគ្រប់គ្រងគ្រោះមហន្តរាយនៃអគ្គលេខាធិការដ្ឋាននៃគណៈកម្មាធិការជាតិគ្រប់គ្រងគ្រោះមហន្តរាយ ។
បើតាមរបាយការណ៍ដដែល ជំនន់ទឹកភ្លៀងបានបណ្តាលរាជធានី ខេត្តចំនួន១៩រងផលប៉ះពាល់ក្នុងនោះរួមមាន៖រាជធានីភ្នំពេញ ខេត្តពោធិ៍សាត់ ប៉ៃលិន បន្ទាយមានជ័យ បាត់ដំបង ស្វាយរៀង ឧត្តរមានជ័យ សៀមរាប តាកែវ កំពង់ស្ពឺ មណ្ឌលគិរី ព្រះសីហនុ កោះកុង ព្រះវិហារ ស្ទឹងត្រែង កំពង់ចាម កណ្តាល កំពង់ឆ្នាំង និងខេត្តកំពង់ធំ ព្រមទាំងបណ្តាលឲ្យប្រជាពលរដ្ឋជាង៤០ម៉ឺននាក់រងផលប៉ះពាល់ ក្នុងនោះប្រជាពលរដ្ឋជាង១ម៉ឺនគ្រួសារស្មើនឹងមនុស្សជាង៤ម៉ឺននាក់ត្រូវបានជម្លៀសមកទីទួលសុវត្ថិភាព ។
តាមទិន្នន័យដដែល ក្រៅពីប៉ះពាល់ដល់ប្រជាពលរដ្ឋជាង១០ម៉ឺនគ្រួសារ ផ្ទះជិត១០ម៉ឺនខ្នង(ខូចខាត៦៣ខ្នង) ជំនន់ទឹកភ្លៀងដដែលបណ្តាលឲ្យប៉ះពាល់ដំណាំស្រូវនិងដំណាំផ្សេងៗជាង៣០ម៉ឺនហិកតា(ស្រូវជាង២៤ម៉ឺនហិកតា) សាលារៀនលិចទឹក៥៨៩កន្លែង និង ប៉ះពាល់ផ្លូវជាតិ ផ្លូវខេត្តនិងផ្លូវគ្រួសក្រហមរាប់រយគីឡូម៉ែត្រ ៕
