អ្នកភូមិចាប់បានកូនក្រពើ១ក្បាល សម្លាប់ធ្វើម្ហូបក្លែម

កូន​ក្រពើ​១​ក្បាល ត្រូវ​បាន​អ្នក​ភូមិ​ក្នុង​សង្កាត់​លេខ​២ ក្រុង​-​ខេត្ត​ព្រះ​សីហ​នុ​ចាប់​បាន​និង​សម្លាប់​យក​ធ្វើ​ម្ហូប​បាត់​ហើយ ។​

​បើ​តាម​សមត្ថកិច្ច​មូលដ្ឋាន​បាន​បញ្ជាក់​ថា អ្នក​ភូមិ​ដែល​ចាប់​កូន​ក្រពើ​ទម្ងន់​៦​គីឡូក្រាម​នេះ ឈ្មោះ កង វ៉ា​ន់​រិ​ទ្ធ ភេទ​ប្រុស អាយុ​៣៩​ឆ្នាំ មុខរបរ កម្មករ​សំណង់ ស្នាក់​នៅ ក្រុម​ទី​១២ ភូមិ​៣ សង្កាត់​លេខ​២ ក្រុងព្រះសីហនុ និង​បាន​សម្លាប់​កូន​ក្រពើ​នេះ​ធ្វើអាហារ ។​

​បើ​តាម​ពលរដ្ឋ​កូន​ក្រពើ​១​ក្បាល​នេះ ទំនងជា​រួច​ចេញពី​កន្លែង​ចិញ្ចឹម​ក្រពើ​ណាមួយ​ក្រោយ​ទឹក​លិច​ដោយសារ​ភ្លៀង​ខ្លាំង​នា​ពេល​កន្លង​មក ។ យ៉ាងណា បើ​តាម​មន្ត្រី​មូលដ្ឋាន​បាន​បញ្ជាក់​ថា នៅ​ក្រុងព្រះសីហនុ​មិន​មាន​កន្លែង​ចិញ្ចឹម​ក្រពើ​នោះ​ទេ ។​

​អ្នក​ភូមិ​បន្ត​ថា កូន​ក្រពើ​នេះ ត្រូវ​បាន​គេ​ប្រទះ​ឃើញ​កាលពី​ព្រលប់​ថ្ងៃ​ទី​២០ តុលា ២០២០ ស្ថិត​នៅ​ក្រោយ​ផ្ទះ​ក្បែរ​អូរ ជាប់ជើង​ភ្នំ ម្តុំ​ខាងក្រោយ​មន្ទីរ​ព័ត៌មាន​ខេត្ត ក្នុង​សង្កាត់​លេខ​២​ក្រុងព្រះសីហនុ ៕