នាយទាហានជាន់ខ្ពស់១រូបនៃទីបញ្ជាការដ្ឋានកងទ័ពជើងអាកាស លោកវរៈសេនីយ៍ឯក ហ៊ីម សំបូរ បានរងការចោទប្រកាន់ពីស្ត្រីអ្នកផ្ទះជិតខាងម្នាក់ ពីបទគំរាមបាញ់សម្លាប់មួយគ្រួសារ ។
នេះបើយោងតាមពាក្យបណ្តឹងរបស់ស្ត្រីឈ្មោះ អ៊ុក ស្រីរិន ស្នាក់ផ្ទះលេខ១៤៧B ផ្លូវ២៧១ ភូមិអូរបែកក្អម សង្កាត់អូរបែកក្អម ខណ្ឌសែនសុខ រាជធានីភ្នំពេញ ដែលប្តឹងចូលទៅកាន់ទីបញ្ជាការដ្ឋានកងរាជអាវុធហត្ថខណ្ឌសែនសុខ និង ត្រូវបានគេផ្សព្វផ្សាយនៅរសៀលថ្ងៃទី១៨ វិច្ឆិកា ២០២០នេះ ។
នៅរសៀលថ្ងៃព្រហស្បតិ៍ដដែលនេះ «អង្រុត» មិនអាចរកការសុំអត្ថាធិប្បាយបំភ្លឺតបបានទេពីលោកស័ក្តិ៥ ហ៊ីម សំបូរ ជុំវិញការចោទប្រកាន់របស់ដើមបណ្តឹងខាងលើនេះ ។
ចំណែកមេបញ្ជាការកងរាជអាវុធហត្ថរាជធានីភ្នំពេញ លោកឧត្តមសេនីយ៍ឯក រ័ត្ន ស្រ៊ាង បានប្រាប់អង្គភាព«នគរដ្រេហ្គន»ថា លោកបាននិងកំពុងចាត់ចែងរឿងនេះហើយ ។
នៅក្នុងពាក្យបណ្តឹងរបស់ស្ត្រីឈ្មោះ អ៊ុក ស្រីរិន ដែលអះអាងថាជាជនរងគ្រោះបានរៀបរាប់ពីដំណើររឿងថា កាលពីថ្ងៃទី១៦ វិច្ឆិកា ២០២០ វេលាម៉ោង២០៖២០នាទី នៅចំណុចមុខ ផ្ទះលេខ២៤៦ ផ្លូវ២៧១ ភូមិអូរបែកក្អម សង្កាត់អូរបែកក្អម ខណ្ឌសែនសុខ រាជធានីភ្នំពេញ ឈ្មោះ ហ៊ីម សំបូរ កើតថ្ងៃទី១៥ មេសា ១៩៦២ បច្ចុប្បន្នស្នាក់នៅផ្ទះលេខ១៤៥ ផ្លូវ២៧១ ភូមិអូរបែកក្អម សង្កាត់អូរបែកក្អម ខណ្ឌសែនសុខ បច្ចុប្បន្នបម្រើការងារនៅបញ្ជាការដ្ឋានកងទ័ពជើងអាកាស មានឋានន្តរស័ក្តិថ្នាក់វរសេនីយ៍ឯក ដែលមានដីផ្ទះជិតផ្ទះនាងខ្ញុំ បានដើរកាន់អាវុធខ្លីមិនស្គាល់ម៉ាកចំនួន ០១ (មួយ) ដើម កាន់ដើរកាត់មុខផ្ទះនាងខ្ញុំ ឆ្ពោះទៅហាងអ៊ុតសក់នាងខ្ញុំយីហោ( ជី ជី សាឡន ) ដោយបានធ្វើការសម្លុត និងគំរាមកំហែងសម្លាប់ទាំងគ្រួសារដោយអាវុធខ្លី។
នាងខ្ញុំសូមបញ្ជាក់ផងដែរថា ឈ្មោះ ហ៊ីម សំបូរ តែងតែរករឿងឈ្លោះជាមួយក្រុមគ្រួសារនាងខ្ញុំជាញឹកញាប់ ចាប់តាំងពីនាងខ្ញុំបានសាងសង់ផ្ទះ ល្វែងអំពីថ្មរួចមក ឈ្មោះនេះតែងតែមិនពេញចិត្តនឹងក្រុមគ្រួសារនាងខ្ញុំ។ លើសពីនេះទៅទៀត ឈ្មោះ ហ៊ីម សំបូរ នេះ តែងតែកាន់អាវុធខ្លីដើរគំរាមកំហែងអ្នកជិតខាងណាដែលបានឈ្លោះជាមួយគេ ហើយសម្លុតនិងបានបោះពាក្យសម្តីថា «អ្ហែងធ្វើមិនឈ្នះអញទេ» ។
ទង្វើទាំងអស់នេះធ្វើឱ្យនាងខ្ញុំរស់នៅមិនបានសុខ ដោយការគំរាមកំហែងថាសម្លាប់ទាំងគ្រួសារ ហើយបុរសនោះតែងនិយាយថា សុខចិត្តស្លាប់នោះថែមទៀត៕
