ថ្ងៃនេះគឺខួប៦ឆ្នាំគត់ នៃអំពើឃាតកម្មបាញ់សម្លាប់លោកឧកញ៉ា អ៊ឹង ម៉េងជឺ ខណៈដែលជនដៃដល់និងអ្នកនៅពីក្រោយនៃអំពើឃាតកម្មដ៍សាហាវរញ្ជួយមេឃកណ្តាលរាជធានីភ្នំពេញកាលពីថ្ងៃទី២២ វិច្ឆិកា ២០១៤ កំពុងស្ថិតនៅទីងងឹតនៅឡើយ ទោះបីកន្លងមកមានការចាប់ខ្លួនមនុស្សជាច្រើនពាក់ព័ន្ឋនឹងឃាតកម្មនេះក្តី ។
អ្នកនាំពាក្យក្រសួងមហាផ្ទៃ លោកនាយឧត្តមសេនីយ៍ ខៀវ សុភ័គ និងលោក ជិន ម៉ាលីន អ្នកនាំពាក្យក្រសួងយុត្តិធ៌ម មិនអាចរកការសុំអត្ថាធិប្បាយតាមទូរសព្ទបានទេ នៅម៉ោង១២និង១៤នាទីថ្ងៃត្រង់ថ្ងៃទី២២ វិច្ឆិកា ២០២០នេះ ។
លោកឧកញ៉ា អ៊ឹង ម៉េងជឺ ថៅកែក្រុមហ៊ុនស៊ីម៉ង់ត៍ត្បូងពេជ្រ ត្រូវបានជនដៃដល់បាញ់សម្លាប់ កាលពីម៉ោង៧និង១៨នាទីយប់ ថ្ងៃទី២២ វិច្ឆិកា ២០១៤ ខណៈលោកឧកញ៉ាចុះពីរថយន្តឡិចស៊ីស៥៧០ ក្នុងបំណង ដើរទៅទិញផ្លែឈើនៅមុខហាងលក់ផ្លែឈើយីហោ« ឡោ តិចសេង» ស្ថិតនៅផ្លូវលេខ២៧៤ សង្កាត់ទួលស្វាយព្រៃទី២ ខណ្ឌចំការមន រាជធានីភ្នំពេញ ។ ឃាតកម្មនេះ បានធ្វើឲ្យមានការភ្ញាក់ផ្អើលដ៍កក្រើករាជធានីភ្នំពេញ និយាយដោយឡែក ក៍ដូចជានៅទូទាំងប្រទេសអំឡុងពេលនោះ ។
គេនៅចាំបានថា ពីរសប្តាហ៍ក្រោយមក សមត្ថកិច្ចបានចាប់ខ្លួនជនសង្ស័យ៤នាក់ ដែលគេអះអាងថាជាអង្គរក្សរបស់លោក ថោង សារ៉ាត់ ដែលគេស្គាល់ថាជាថៅកែល្បីឈ្មោះមួយរូបរកស៊ីច្រើនមុខរបរដូចជាអចលនទ្រព្យជាដើម និងជាមន្ត្រីជាន់ខ្ពស់យោធាមានឋានន្តរស័ក្តិផ្កាយ២នៅក្រសួងការពារជាតិ និងមានងារជាឧកញ៉ាផងដែរ ។
ប៉ុន្មានថ្ងៃ ក្រោយការចាប់ខ្លួនអង្គរក្ស៤នាក់របស់លោកឧកញ៉ា ថោង សារ៉ាត់ សមត្ថកិច្ចក៍ឈានទៅចាប់ខ្លួនលោក ថោង សារ៉ាត់ នៅខេត្តស្វាយរៀង កាលថ្ងៃទី១៧ មេសា ២០១៥ ខណៈដែលលោក ថោង សារ៉ាត់ ត្រូវគេអះអាងថាកំពុងជិះរថយន្តប៉ងចូលទឹកដីវៀតណាម ។
ដូចសម្លកំពឹស សំណុំរឿងឃាតកម្មបាញ់សម្លាប់លោក អ៊ឹង ម៉េងជឺ ដដែលនេះ សមត្ថកិច្ចក៍ឈានទៅចាប់ឃុំខ្លួនឪពុកម្តាយ លោក ថោង សារ៉ាត់ គឺ លោក ថោង ចំរើន និងអ្នកស្រី កែវ សាវី ជាប្រធានក្រុមហ៊ុនសង់ផ្ទះល្វែងយីហោ៩៩៩បន្ថែមទៀត ក្រោយរកឃើញថាមានលាក់អាវុធខុសច្បាប់នៅគេហដ្ឋាន ។ ក្រោយមកឪពុកម្តាយលោកថោង សារ៉ាត់ ដែលគេស្គាល់ថាមានដើមកំណើតជាជនជាតិយួននោះ ត្រូវបានចៅក្រមសាលាដំបូងរាជធានីភ្នំពេញ លោក លី សុខលេង ដោះលែងឲ្យនៅក្រៅឃុំបណ្តោះអាសន្នកាលពីថ្ងៃទី០៦ កុម្ភៈ ឆ្នាំ២០១៥ ។
ជាង១០ថ្ងៃក្រោយមក ពោលគឺនៅថ្ងៃទី១៧ កុម្ភៈ ២០១៥ លោកនាយករដ្ឋមន្ត្រី ហ៊ុន សែន បានប្រតិកម្មជុំវិញការដោះលែងឪពុកម្តាយលោក ថោង សារ៉ាត់ ដោយលោកបានអំពាវនាវឲ្យឧត្តមក្រុមប្រឹក្សានៃអង្គចៅក្រមបើកការស៊ើបអង្កេតឡើងវិញលើសំណុំរឿងឪពុកម្ដាយលោកថោងសារ៉ាត់ ដើម្បីរកយុត្តិធម៌ជូនគ្រួសារជងរងគ្រោះ។
ក្នុងពិធីចែកសញ្ញាបត្រជូននិស្សិតនៃសាកលវិទ្យាល័យធនធានមនុស្ស នៅវិទ្យាស្ថានជាតិអប់រំ លោក ហ៊ុន សែន បានបញ្ជាក់យ៉ាងដូច្នេះ « ខ្ញុំអំពាវនាវ ចំពោះឧត្តមក្រុមប្រឹក្សានៃអង្គចៅក្រម ដើម្បីពិនិត្យករណីទាក់ទងជាមួយនឹង សំណុំរឿង បទឧក្រិដ្ឋឃាតកម្ម នៅក្នុងទីក្រុងភ្នំពេញ រឿងនេះរឿងមិនធម្មតាទេ ខ្ញុំគ្មានការគាបសង្កតរឿងអ្វី ជាមួយតុលាការទេ ប៉ុន្តែអំណាច៣ នីតិបញ្ញត្តិ នីតិប្រតិបត្តិ និងតុលាការ ទោះបីនីតិមួយណាក៏ដោយ អង្គមួយណាក៏ដោយ វាត្រូវមានទំនាក់ទំនងគ្នា មិនអាចនៅដាច់ពីគ្នាបានទេ ។ រាជរដ្ឋាភិបាល ប្រឹងដុតដៃដុតជើង បញ្ជាកម្លាំងដើម្បីតាមរកឃាតករ សម្លាប់ឧកញ៉ាអ៉ឹង ម៉េងជឺ ទីបំផុតយើងសម្រេចចាប់បានមួយសំបុក ប៉ុន្តែរឿងដែលមិនយល់ គឺនៅត្រង់ថា ឱ្យឳពុកម្តាយ របស់មេក្លោងដែលបញ្ជាឃាតករ ដែលជាប់ពិរុទ្ធភាព លើបទចោទនេះ ឱ្យនៅក្រៅឃុំ ហើយ អានៅក្រៅឃុំនេះ បើធ្វើត្រូវតាមនីតិវិធី គឺមិនអីទេ ប៉ុន្តែវាខុសនីតិវិធីទៅទៀត ។
ខ្ញុំសួរទៅស្នងការរាជធានីភ្នំពេញ ឱ្យ ឧប.ស ខេង និង លោក អង្គ វង្សវឌ្ឍនា ស្រាវជ្រាវ ថាហេតុផលសុខភាព និង បទល្មើសមជ្ឈឹម ។
អាកាំភ្លើង៨ដើម គេថានេះ ជាបទល្មើសមជ្ឈឹមទេ អាកាំភ្លើង៨ដើម គេចាត់ទុកថា ជាបទល្មើសមជ្ឈឹម បានខ្ញុំស្រែកតែម្តង ចុះអាកាន់ព្រនង់ម៉េចបានជាប់គុក កាន់ព្រនង់ជាប់ឃុំ ចុះអានេះកាន់កាំភ្លើង៨ដើម វាទៅជារួចខ្លួន។ ដំណើរការរបស់តុលាការ លើរឿងឳពុកម្តាយថោងសារ៉ាត់ ថ្ងៃណា? រហូតដល់ដោះលែង និងចាប់ខ្លួនឡើងវិញល្បឿននៃការ ដោះស្រាយរឿងនេះ លឿនពេក គឺលឿនរហូតដល់យើងគួរឆ្ងល់ ឥឡូវយើង ពិនិត្យអញ្ចេះ អ្វីទៅជាសាលដីការ របស់តុលាការក្រុងខ្លួនឯង អ្វីទៅជាសាលដីការ របស់ សាលាឧទ្ធរណ៍ តើចៅក្រមសាលាដែល អនុញ្ញាតឱ្យនៅក្រៅឃុំនេះ បំពានលើសាលដីការបស់ សាលាឧទ្ធរណ៍ និងសាលក្រម របស់ខ្លួនឯងដែរឫទេ សុទ្ធតែជាចំណោទនៃបញ្ហាទាំងអស់ ខ្ញុំមិនសុខចិត្តទេ ខ្ញុំស្នើឱ្យឧត្តមក្រុមប្រឹក្សានៃអង្គចៅក្រម ចាត់វិធានការបន្ទាន់លើសំណុំរឿងមួយនេះ ហើយទោះបីជាត្រូវដាក់ជណ្តើរឡើង បើថាចុងត្នោតវាខ្ពស់ ដាក់ជណ្តើរឡើង ក៏ឡើង បើថាត្រូវចុះ ក្នុងទឹក ក៏ត្រូវពាក់ស្អីៗ ចុះក្នុងទឹក» ។
ប៉ុន្មានថ្ងៃនេះ សាធារណមតិ មិនទាំងបានវ៉ៃតុលាការ មកវ៉ៃតែក្បាលហ៊ុន សែន ថាហ៊ុនសែន បញ្ជាឱ្យនៅក្រៅឃុំ មកឆ្កុយទៅអញ្ចឹងហ្មង ខ្ញុំមិនសុខចិត្តទេ មិនសុខចិត្តដាច់ខាតហើយ។
លោកប្រមុខរាជរដ្ឋាភិបាលបានបញ្ជាក់ទៀតថា« ខ្ញុំមិនអាចទទួលយកបានទេ សមត្ថកិច្ចចាប់មនុស្សខុសទាំងអស់ បើតាមខ្ញុំស្តាប់បានទៅទៀត ចៅក្រមតុលាការភ្នំពេញ ហ៊ានអះអាងថា ថោង សារ៉ាត់ មិនជាប់ពាក់ព័ន្ធ ហ៊ានយកក្បាល មកធានាទៀត រឿងអត់ទាន់កាត់ក្តីផង សំណុំរឿងកំពុងស្រាវជ្រាវ បែរជាចៅក្រម នៅសាលាដំបូង ក្រុងភ្នំពេញ ហើយរឿងនេះខ្ញុំស្តាប់ផ្ទាល់ តែហ៊ានចាប់ហ្នឹង ត្រូវតែមួយទេខុស៣នាក់ ក្នុងចំណោម ៤នាក់ ថោង សារ៉ាត់គ្មានពាក់ព័ន្ធ បើអញ្ចឹងអ្នកដែលពាក់ព័ន្ធគឺ ជួន សុវណ្ណ ត្រូវតែជាប់គុក ព្រោះចាប់គេខុស… អញ្ចឹងអ្នកដែលជាប់គុកគឺអ្នកដែលចាប់គេ អញ្ចឹងស ទៅជាខ្មៅ ខ្មៅទៅជាស គាត់ជាអ្នកកាត់ក្តី អំណាចឯករាជ្យរបស់គាត់ ហើយបើគាត់កាត់តែធន់ហ្នឹង យើងចាប់គាត់លែង យើងចាប់គាត់លែង ខ្ញុំថាតែដល់ម៉ោង ខ្ញុំអត់ចាប់តុលាការ ខ្ញុំចាប់ចោរ ព្រោះមានតុលាការខ្លះ ឃុបឃិតជាមួយចោរ អញ្ចឹងយើងអត់ទៅចាប់តុលាការទេ យើងចាប់ចោរ វាជ្រុលពេក បើសិនជាធុនហ្នឹង.. ខ្ញុំថាបើសិនជា ឳពុកម្តាយរបស់ថោង សារ៉ាត់ រត់រួច គឺអ្នកដែលចុះហត្ថលេខា លែងហ្នឹង លោកឯងឃុបឃិតជាមួយចោរ អញ្ចឹងខ្ញុំចាប់លោកឯង ព្រោះនេះមិនមែនចាប់ចៅក្រមទេ គឺចាប់ចោរ។»។
ក្រោយលោកនាយករដ្ឋមន្ត្រី ហ៊ុន សែន ប្រតិកម្មខ្លាំងខាងលើ ក៍ស្រាប់តែ លោក អាំង មាលតី ប្រធានសាលាដំបូងរាជធានីភ្នំពេញនាពេលនោះ ក៍បានបាត់បង់តំណែងផងដែរ ក្រោយពីឪពុកម្តាយលោក ថោង សារ៉ាត់ ត្រូវបានចៅក្រមដោះលែង ។
បន្ទាប់ពីចៅក្រមស៊ើបសួរសាលាដំបូងរាជធានីភ្នំពេញ លោក លី សុខលេង សម្រេចឲ្យនៅក្រៅឃុំបណ្តោះអាសន្ន ដោយសំអាងថា ឪពុកម្តាយលោក ថោង សារ៉ាត់ មានជំងឺប្រចាំកាយធ្ងន់ធ្ងរ ដូចជា ជំងឺងងឹតភ្នែក ទឹកនោមផ្អែម និងរោគសរសៃប្រសាទជាដើមនោះរួចមក ០៩ថ្ងៃក្រោយមក ពោលគឺនៅយប់ថ្ងៃទី១៥ កុម្ភៈ ២០១៥ លោក ថោង ចំរើន និង អ្នកស្រី កែវ សារី ត្រូវបាន សមត្ថកិច្ចចាប់ឃាត់ខ្លួនជាថ្មីនៅម្តុំកំពង់ចម្លងអ្នកលឿងត្រើយខាងកើត គ្រាដែលអ្នកទាំងពីរត្រូវបានគេះអះអាងថា កំពុងភៀសខ្លួនទៅប្រទេសវៀតណាមដែលជាទឹកដីកំណើតរបស់អ្នកទាំងពីរ។
ក្រោយការឃាត់ខ្លួន លោកចៅក្រម លី សុខលេង ដដែល ក៍បានសម្រេចដាក់ជនសង្ស័យទាំងពីរ ឲ្យជាប់ពន្ធនាគារជាថ្មី កាលពីថ្ងៃទី១៦ ខែកុម្ភៈ ឆ្នាំ២០១៥ ក្រោមបទចោទកាន់កាប់អាវុធដោយគ្មានការអនុញ្ញាត ដែលបានប្រព្រឹត្តកាលពីថ្ងៃទី០៣ ធ្នូ ២០១៤ នៅ គេហដ្ឋានរបស់ខ្លួន ផ្ទះលេខ៩២១ ផ្លូវជាតិលេខ២ សង្កាត់ចាក់អង្រែក្រោម ខណ្ឌមានជ័យ។ ជនសង្ស័យទាំង ពីរ ត្រូវផ្តន្ទាទោសតាមមាត្រា ៤៩០ នៃក្រមព្រហ្មទណ្ឌ។
ដោយសារសំណុំរឿងវែងឆ្ងាយ«អង្រុត» សូមយកសាវតានៃរឿងឃាតកម្មដ៍កក្រើកនេះ មកបញ្ជាក់រំឮកត្រឹមថ្ងៃកាត់ទោសនិងដោះលែងលោក ថោង សារ៉ាត់។
នៅរសៀលថ្ងៃទី២៦ មីនា ២០១៩ ប្រធានក្រុមប្រឹក្សាចៅក្រមជំនុំជម្រះនៃសាលាដំបូងរាជធានីភ្នំពេញ លោក តុប ឈុនហេង បានប្រកាសសាលក្រមផ្ដន្ទាទោស លោក ថោង សារ៉ាត់ និងបក្ខពួកចំនួន៤នាក់ ដាក់ពន្ធនាគារអស់មួយជីវិត ពាក់ព័ន្ធនឹងករណីឃាតកម្មសម្លាប់ ឧកញ៉ា អ៊ឹង ម៉េងជឺ ។ ជនជាប់ចោទមានឈ្មោះ ទី១)ឈ្មោះ ថោង សារ៉ាត់ ជាមេក្លោង ទី២)ឈ្មោះ ស៊ាង វាសនា ទី៣)ឈ្មោះ មាស សម្បត្តិ ទី៤)ឈ្មោះ កុយ ចាន់ថុល និងទី៥)ឈ្មោះ ឈុំ ចិត្រា។
ក្រោយមកនៅថ្ងៃទី០៦ វិច្ឆិកា ២០១៩ សាលាឧទ្ធរណ៍បានសម្រេចដោះលែង លោក ថោង សារ៉ាត់ និងបក្ខពួកចំនួន៣នាក់ទៀត ឱ្យនៅក្រៅឃុំជាបណ្តោះអាសន្ន លើកលែងតែឈ្មោះ សៀង វាសនា ដែលជាជនដៃដល់បន្តស្ថិតនៅក្នុងឃុំ។
បើតាមសេចក្តីប្រកាសអ្នកនាំពាក្យសាលាឧទ្ធរណ៍ អ្នកដែលត្រូវដោះលែងឲ្យក្រៅឃុំជាបណ្តោះអាសន្នចំនួន៤នាក់នោះរួមមាន ទី១៖ ថោង សារ៉ាត់, ទី២៖ ហួយ ចាន់ថុល, ទី៣៖ មាស សម្បត្តិ ហៅ ទូច និង ទី៤៖ ឈ្មោះ ឃុន ចិត្រា ដោយតុលាការបានដាក់លក្ខខណ្ឌ៤ចំណុចដូចជា៖
១៖ ជនជាប់ចោទមិនត្រូវចាកចេញពីព្រះរាជាណាចក្រកម្ពុជា ដោយមិនមានការអនុញ្ញាតពីតុលាការ។
២៖ ហាមផ្លាស់ប្តូរលំនៅដ្ឋាន។
៣៖ ត្រូវបង្ហាញខ្លួននៅការិយាល័យស្នងការនគរបាលរាជធានីភ្នំពេញរៀងរាល់សប្តាហ៍ទី១ រៀងរាល់ខែ ។
៤៖ ចូលបង្ហាញខ្លួនតាមការកោះហៅរបស់តុលាការ ឬ អាជ្ញាធរមានសមត្ថកិច្ចដែលចាត់តាំងដោយតុលាការ ។
អ្នកនាំពាក្យសាលាឧទ្ធរណ៍ បានពន្យល់ថា ក្រុមប្រឹក្សាជំនុំជម្រះបានជំនុំជម្រះលើសំណុំរឿងព្រហ្មទណ្ឌលេខ ៧២៣ ចុះថ្ងៃទី១៩ ខែមិថុនា ឆ្នាំ២០១៩ អស់រយៈពេល ០៥លើក ដែលមានជនជាប់ចោទឈ្មោះ ១៖ ថោង សារ៉ាត់ ២៖ សៀង វាសនា ៣៖ កួយ ចាន់ថុល ៤៖ មាស សម្បត្តិ ហៅ ទូច និង ៥៖ ឈ្មោះ ឃុន ចិត្រា ដែលត្រូវបានជាប់ចោទពីបទ ផ្តើមគំនិតក្នុងអំពើឃាតកម្មគិតទុកជាមុន តាមមាត្រា២៨, មាត្រា ២០០ នៃក្រមព្រហ្មទណ្ឌ អំពើឃាតកម្មគិតទុកជាមុន តាមបញ្ញត្តិមាត្រា ២០០ នៃក្រមព្រហ្មទណ្ឌ សមគំនិតក្នុងអំពើឃាតកម្មគិតទុកជាមុន តាមបញ្ញត្តិមាត្រា ២៩ មាត្រា ២០០ នៃក្រមព្រហ្មទណ្ឌ។
តាមរយៈសវនាការនេះ ក្រោយពីបានពិនិត្យសំណុំរឿង និងលទ្ធផលនៃការសួរតទល់នាពេលសវនាការ និងភស្តុតាង ក្រុមប្រឹក្សាជំនុំជម្រះយល់ថា មានភាពចាំបាច់ត្រូវធ្វើការអង្កេតបន្ថែម ដើម្បីជាប្រយោជន៍យុត្តិធម៌នៃសំណុំរឿង និងបានសម្រេចចាត់របៀបស៊ើបអង្កេត ហើយក្នុងអំឡុងពេលនៃកិច្ចស៊ើបអង្កេតនេះ មេធាវីការពារក្តីរបស់ជនជាប់ចោទ០៤រូប បានដាក់ពាក្យសុំនៅក្រៅឃុំបណ្តោះអាសន្ន និងមានការបញ្ជាក់ពីមូលហេតុជាអំណះអំណាង។
អ្នកនាំពាក្យបានពន្យល់បន្តថា ការបើកការស៊ើបសួរបន្ថែម អាចត្រូវការរយៈពេលយូរបន្ថែមទៀត ដោយសារសំណុំរឿងនេះមានលក្ខណៈស្មុគ្រស្មាញ ព្រមជាមួយគ្នានេះកម្រិតនៃភស្តុតាងទាក់ទងនឹងជនជាប់ចោទ ដែលបានដាក់ពាក្យសុំនៅមានកម្រិត ហើយក្រុមប្រឹក្សាយល់ថា ការឲ្យនៅក្រៅឃុំបណ្តោះអាសន្ននេះ ដោយសារពុំមានតម្រុយភស្តុតាងណាមួយ ដែលបញ្ជាក់ពីមូលហេតុចាំបាច់នៃការឃុំខ្លួនបណ្តោះអាសន្នតាមមាត្រា ២០៥ នៃក្រមនីតិវិធីព្រហ្មទណ្ឌទេ។
ក្នុងចំណោមជនជាប់ចោទទាំង០៤នាក់នេះក៏មានជនជាប់ចោទដែលមានសុខភាពទ្រុឌទ្រោម គប្បីមានភាពងាយស្រួលក្នុងការថែទាំព្យាបាល ដោយពេទ្យជំនាញឯកទេសផងដែរ។ ការដោះលែងឲ្យនៅក្រៅឃុំបណ្តោះអាសន្ននេះ ត្រូវបានជំនួសដោយការដាក់ឲ្យជនជាប់ចោទស្ថិត ក្រោមការត្រួតពិនិត្យតាមផ្លូវតុលាការ តាមលក្ខខណ្ឌចំពោះជនជាប់ចោទឈ្មោះ ១៖ ថោង សារ៉ាត់ ២៖ ហួយ ចាន់ថុល ៣៖ មាស សម្បត្តិ ហៅ ទូច និង ៤៖ ឈ្មោះ ឃុន ចិត្រា។
ការសម្រេចរបស់សាលាឧទ្ធរណ៍បែបនេះ ដោយផ្អែកទៅលើមាត្រា ៣៨ នៃរដ្ឋធម្មនុញ្ញ មាត្រា ២០០៣ មាត្រា ២០៥ មាត្រា ២២០ មាត្រា ២២៣ មាត្រា ២២៦ មាត្រា ៣០៧ មាត្រា ៣៨៧ មាត្រា ៣៩៦នៃក្រមនីតិវិធីព្រហ្មទណ្ឌ ។
តើសំណុំរឿងឃាតកម្មរញ្ជួយមេឃកាលពី៦ឆ្នាំមុន ( ២២ វិច្ឆិកា ២០១៤-២២ វិច្ឆិកា ២០២០) នឹងត្រូវបិទបញ្ចប់នៅពេលណា ហើយគិតត្រឹមពេលនេះដែរ តើយុត្តិធ៌មសម្រាប់ក្រុមគ្រួសារលោកឧកញ៉ា អ៊ឹង ម៉េងជឺ មានកម្រិតណា ? ៕
