អ្នកទាំង២នាក់ដែលពាក់ព័ន្ឋព្រឹត្តិការណ៍«សហគមន៍២៨វិច្ឆិកា»និងត្រូវបានក្រសួងសុខាភិបាលរកឃើញឆ្លងកូវីដ១៩នោះ គឺឈ្មោះ អ៊ី តារា ភេទប្រុស អាយុ២១ឆ្នាំ មានអាសយដ្ឋានជិតវត្តសន្សំកុសល សង្កាត់បឹងទំពុនខណ្ឌមានជ័យ ជាអ្នកធ្លាប់ស្នាក់នៅជាមួយអ្នកជំងឺ ឈ្មោះ ញិល សុខកូឡា ដែលធ្វើការនៅហាង Pedro ផ្លូវព្រះមុនីវង្ស និងម្នាក់ទៀត ឈ្មោះ ជី ពេជ្រឆារ៉ា ភេទស្រី អាយុ២៩ឆ្នាំ ស្នាក់នៅសង្កាត់ចាក់អង្រែលើ ខណ្ឌមានជ័យ ជាមន្ត្រីរាជការនៅក្រសួងមហាផ្ទៃ បានចូលហាង Zando ដោយមិនមានការពាក់ម៉ាស់កាលពីម៉ោង៨និង៣០នាទីយប់ថ្ងៃទី២៧ វិច្ឆិកា ២០២០ ។
បើតាមសេចក្តីជូនព័ត៌មានរបស់ក្រសួងសុខាភិបាលបានបញ្ជាក់ឲ្យដឹងទៀតថា គិតពីថ្ងៃទី២៩ ខែវិច្ឆិកា ដល់ ថ្ងៃទី០៦ ធ្នូ ឆ្នាំ២០២០នេះ ក្រសួងសុខាភិបាល បានធ្វើតេស្តអ្នកប៉ះពាល់ក្នុងព្រឹត្តិការណ៍ «សហគមន៍២៨វិច្ឆិកា» សរុបចំនួន១១៣០៥សំណាក ដែលនៅក្នុងចំនួននេះ មានអ្នកវិជ្ជមានកូវីដ១៩ ថ្មីចំនួន ៣២នាក់ ដែលកំពុងសម្រាកព្យាបាលនៅមន្ទីរពេទ្យខ្មែរសូវៀត និងមណ្ឌលសុខភាពចាក់អង្រែ។
គិតត្រឹមម៉ោង៧ព្រឹកថ្ងៃទី០៧ ធ្នូនេះ អ្នកឆ្លងកូវីដ១៩នៅទូទាំងប្រទេសកម្ពុជាបានកើនសរុប៣៤៨នាក់(ស្រី៨១នាក់) ក្នុងនោះអ្នកព្យាបាលជាសះស្បើយចំនួន៣០៦នាក់(ស្រី៦២នាក់) និងអ្នកកំពុងសម្រាកព្យាបាលនៅមន្ទីរពេទ្យរុស្ស៊ីនិងមណ្ឌលសុខភាពចាក់អង្រែក្រោម ចំនួន៤២នាក់(ស្រី១៩នាក់)។
នៅថ្ងៃចន្ទនេះ ក្រសួងសុខាភិបាលក៍បានប្រកាសអញ្ជើញដល់អ្នកប៉ះពាល់ព្រឹត្តិការណ៍«សហគមន៍២៨វិច្ឆិកា»ទាំងអស់ ទៅធ្វើតេស្តលើកទី២ នៅក្នុងបរិវេណទីស្តីការក្រសួងមហាផ្ទៃ នាថ្ងទី០៧ ធ្នូនេះ សម្រាប់បុគ្គលិក-មន្ត្រីរាជការស៊ីវិល និងនៅថ្ងៃស្អែក ០៨ ធ្នូ ទៅធ្វើតេស្តនៅក្នុងបរិវេណពហុកីឡដ្ឋានជាតិអូឡាំពិក សម្រាប់ប្រជាពលរដ្ឋ ដែលជាអ្នកប៉ះពាល់ និងតាមបណ្តាមន្ទីរសុខាភិបាលខេត្ត (ដែលទទួលខុសត្រូវក្នុងការរៀបចំទីកន្លែងដែលពេលនោះ សម្រាប់អ្នកប៉ះពាល់នៅតាមខេត្ត)៕
