ខេត្តបាត់ដំបង ៖ ក្រសួងបរិស្ថានបានដាក់បណ្ដឹងជាផ្លូវការជូនទៅអគ្គស្នងការនគរបាលជាតិ ក្នុងកម្មវត្ថុ សូមឲ្យចាត់ការវិធានការតាមនីតិវិធីច្បាប់ចំពោះឈ្មោះកោ ស៊ុនកាំង អធិការនគរបាលស្រុកសំឡូត ដែលបានកាប់រុករានធ្វើរបងហ៊ុមព័ទ្ធយកដីព្រៃរបស់រដ្ឋនៅតំបន់ការពារធម្មជាតិនៃដែនជម្រកសត្វព្រៃភ្នំសំកុស ប៉ុន្តែរហូតមកដល់ពេលនេះ លោកស្នងការខេត្តនៅមិនទាន់ចាត់វិធានការបែបណានៅឡើយទេ តែបានហៅបុគ្គលរូបនេះ មកសួរនាំម្ដងហើយ ។ នេះបើតាមលោកសៅ សាម៉ុន ស្នងការរងខេត្ត ដែលបានប្រាប់កោះសន្តិភាព នាព្រឹកថ្ងៃទី២៨ ឧសភា ។
លោកសៅ សាម៉ុន ស្នងការរងខេត្តទទួលផែនបុគ្គលិកបានប្រាប់ថា កាលពីថ្ងៃទី២៧ ឧសភា លោកស្នងការខេត្ត បានបញ្ជាឲ្យកោះអញ្ជើញ លោកកោ ស៊ុនកាំង អធិការស្រុកសំឡូត មកកាន់ការិយាល័យជំនាញ ដើម្បីសួរនាំអំពីសំណុំរឿងរុករានដីព្រៃរបស់រដ្ឋនោះហើយ ដែលក្រសួងបរិស្ថានបានប្ដឹងទៅអគ្គស្នងការនគរបាលជាតិ សុំឲ្យចាត់វិធានការតាមនីតិវិធីច្បាប់ ទៅលើលោក កោ ស៊ុនកាំង ។ លោក សៅ សាម៉ុន បានបញ្ជាក់ថា ក្រសួងបរិស្ថានបានដាក់លិខិតជូនអគ្គស្នងការនគរបាលជាតិ ដោយបានចោទលោកកោ ស៊ុន
កាំង ថា បានកាប់រុករានព្រៃ និងធ្វើរបងហ៊ុមព័ន្ធយកដី នៅតំបន់ការពារធម្មជាតិ ក្នុងដែនជម្រកសត្វព្រៃភ្នំសំកុសក្នុងស្រុកសំឡូត។
យោងលិខិតជាផ្លូវការរបស់ក្រសួងបរិស្ថាន លេខ៦០៩ ចុះថ្ងៃទី១៣ ឧសភា ២០២០ ដែលមានបោះត្រា និងហត្ថលេខាលោក សាយ សំអាល់ រដ្ឋមន្ត្រីក្រសួងបរិស្ថាន គោរពជូនលោកនេត សាវឿន អគ្គស្នងការនគរបាលជាតិ ដែលកោះសន្តិភាពទទួលបាន នៅថ្ងៃទី២៨ ឧសភា នេះ មានខ្លិមសារនៅក្នុងកម្មវត្ថុយ៉ាងដូច្នេះថា «ករណីឈ្មោះកោ ស៊ុនកាំង អធិការនគរបាលស្រុកសំឡូត បានរុករានឆ្ការដីព្រៃ ធ្វើរបងហ៊ុមព័ទ្ធនិងសង់រោង ដើម្បីចាប់យកដីសាធារណៈរបស់រដ្ឋក្នុងតំបន់ការពារធម្មជាតិ នៃដែនជម្រកសត្វព្រៃភ្នំសំ
កុស»។
នៅក្នុងលិខិតនោះ លោកសាយ សំអាល់ រដ្ឋមន្ត្រីក្រសួងបរិស្ថាន បានជម្រាបជូន លោកនេត សាវឿន អគ្គស្នងការនគរបាលជាតិថា ឈ្មោះ កោ ស៊ុនកាំង អធិការស្រុកសំឡូត បានរុករានឆ្ការដីព្រៃធ្វើរបងហ៊ុមព័ទ្ធនិងសង់រោង ដើម្បីចាប់យកដីសាធារណៈរបស់រដ្ឋ ក្នុងតំបន់ការពារធម្មជាតិ នៃដែនជម្រកសត្វព្រៃ«ភ្នំសំកុស» លើផ្ទៃដីទំហំ១៣,៨០០ម៉ែត្រក្រឡា នៅក្នុងភូមិសាស្ត្រ«ភ្នំអូរជុំ» ស្ថិតក្នុងភូមិវាលរលឹម ឃុំកំពង់ល្ពៅ ស្រុកសំឡូត។ លោកសាយ សំអាល់ បានចោទថា សកម្មភាពនេះ ជាទង្វើផ្ទុយនឹងមាត្រា៦២ ចំណុច១ នៃច្បាប់ស្ដីពីតំបន់ការពារធម្មជាតិ និងមាត្រា៤៣នៃច្បាប់ភូមិបាល។
ចំពោះទង្វើខុសច្បាប់របស់មន្ត្រីរាជការរូបនេះ មិនត្រិមតែបំផ្លិចបំផ្លាញធនធានធម្មជាតិដែលជាសម្បត្តិរដ្ឋប៉ុណ្ណោះទេ ថែមទាំងធ្វើឲ្យបាត់បង់កិត្តិយសរបស់មន្ត្រីរាជការ និងជាគំរូមិនល្អដល់ពលរដ្ឋនៅមូលដ្ឋានដែលកំពុងឃ្លាំមើល និងចាំតែអនុវត្តតាមទៀតផង។ លោករដ្ឋមន្ត្រី បានធ្វើការវិនិឆ្ឆ័យថា «ដើម្បីរក្សាការពារភាពថ្លៃថ្នូររបស់មន្ត្រីរាជការ ក្រសួងបរិស្ថានយល់ឃើញថា គួរមានវិធានការវិន័យចំពោះបុគ្គលឈ្មោះ កោ ស៊ុនកាំង តាមនីតិវិធីច្បាប់ជាធរមាន»។
ពាក់ព័ន្ធនឹងសំណុំរឿងលោកកោ ស៊ុនកាំង អធិការស្រុកសំឡូត ដែលសំបូរទៅដោយរឿងអាស្រូវខាងលើនេះ បើតាម លោក កត បូរាណ ប្រធានមន្ទីរបរិស្ថានខេត្ត បានរៀបរាប់ថា សកម្មភាពរុករានរំលោភយកដីរដ្ឋរបស់លោកកោ ស៊ុនកាំង បានកើតឡើងជាបន្តបន្ទាប់ ហើយមន្ត្រីរបស់លោកក៏បានចុះទៅហាមឃាត់ច្រើនលើកហើយដែរ តែលោកកោ ស៊ុនកាំង មិនព្រមដកថយទេ។ មិនត្រិមតែប៉ុណ្ណោះ បុគ្គលរូបនេះថែមទាំងកេណ្ឌសាច់ញាតិ ទៅធ្វើរបងហ៊ុំព័ទ្ធ និងសាងសង់រោងនៅលើដីនោះទៀត ក្នុងគោលបំណងវាទយកដីតំបន់ហាមឃាត់នោះកាន់តែខ្លាំង។
លោកកត បូរាណ បានបញ្ជាក់ថា សកម្មភាពលោកកោ ស៊ុនកាំង ចាប់ផ្ដើមកំរើកកាន់តែខ្លាំង នៅពេលដែលក្រុមហ៊ុនចិន ចាប់ផ្ដើមឈូសឆាយស្ថាបនាផ្លូវជាតិ ចេញពីស្រុកសំឡូត ឆ្ពោះទៅខេត្តពោធិ៍សាត់ ព្រោះដីតំបន់នោះឡើងថ្លៃ។ ប៉ុន្តែយ៉ាងណា លោកប្រធានមន្ទីរបរិស្ថានរូបនេះ បានបញ្ជាក់ថា លោកមិនបានដាក់បណ្ដឹងទៅតុលាការទេ ព្រោះនេះជាចំណាត់ការរបស់ក្រសួងបរិស្ថាន ដែលប្ដឹងឈ្មោះកោ ស៊ុនកាំង នេះទៅអគ្គស្នងការនគរបាលជាតិ សុំឲ្យចាត់វិធានការតាមច្បាប់។ ប៉ុន្តែលោកបានចម្លងជូនទៅអង្គភាព និង ស្ថាប័នពាក់ព័ន្ធមួយចំនួនរួចហើយ រួមទាំងស្ថាប័នតុលាការផង។
សូមបញ្ជាក់ថា នេះមិនមែនលើកទី១ទេ ដែលលោកកោ ស៊ុនកាំង អធិការស្រុកសំឡូត សំបូរទៅដោយរឿងអាស្រូវរូបនេះ បានប្រព្រឹត្តកំហុសក្នុងនាមខ្លួនជាមន្ត្រីរាជការសាធារណៈ ហើយលោកស្នងការខេត្ត ក៏ធ្លាប់បានបញ្ជាឲ្យការិយាល័យជំនាញ កោះហៅបុគ្គលនេះ ឲ្យចូលខ្លួនទៅបំភ្លឺពាក់ព័ន្ធនឹងកំហុស និងធ្វើកិច្ចសន្យាយ៉ាងតិចចំនួន០២លើកមកហើយដែរ។ ប៉ុន្តែបុគ្គលរូបនេះមិនស្ដាប់ការណែនាំ ឬ បទបញ្ជារបស់មេកើយ និង មិនគោរពកិច្ចសន្យាកែប្រែខ្លួនឡើយ។ ផ្ទុយទៅវិញ លោកអធិការដ៏មហិមានេះ បានធ្វើគ្រប់សកម្មភាពផ្គើនថ្នាក់ដឹកនាំ ផ្គើននឹងច្បាប់កាន់តែខ្លាំង រហូតត្រូវបានក្រសួងបរិស្ថានប្ដឹងទៅអគ្គស្នងការនគរបាលជាតិ ឲ្យចាត់វិធានការតាមផ្លូវច្បាប់ទៅលើមន្ត្រីរំលោភអំណាចរូបនេះ។
មន្ត្រីមួយចំនួនបានហៅទង្វើ និងសកម្មភាពលោកស័ក្ដិ៥ កោ ស៊ុនកាំង ថា ជាបុគ្គលមួយរូបគ្មានលក្ខណៈសម្បត្តិគ្រប់គ្រាន់ធ្វើជាមន្ត្រីក្នុងការដឹកនាំ ។ ហើយថែមទាំងបានលើកឡើងចំៗថា នេះក៏ដោយសារតែថ្នាក់ដឹកនាំ ដែលចេះតែអោបក្រសោបមន្ត្រីខិលខូច មិនព្រមកាត់សាច់ស្អុយចោល ទើបធ្វើឲ្យមន្ត្រីខិលខូចដូចលោកកោ ស៊ុនកាំង នេះហ៊ានប្រព្រឹត្តកំហុសបំពានច្បាប់កាន់តែជ្រៅទៅៗ ម្ដងហើយម្ដងទៀត ធ្វើឲ្យប៉ះពាល់មុខមាត់ថ្នាក់ដឹកនាំ ប៉ះពាល់កិត្តិយស និងសេចក្ដីថ្លៃថ្នូរដល់មន្ត្រីនានានៅក្នុងអង្គភាពបែបនេះ។ ហើយមកដល់ពេលនេះ បើថ្នាក់ដឹកនាំនៅតែបន្តអោមក្រសោប ថ្នាក់ថ្នមមន្ត្រីខិលខូចបែបនេះ មិនហ៊ានចាប់ដុះក្អែលចេញទេ ថ្ងៃក្រោយអាចនឹងមានមន្ត្រីខិលខូចបែបនេះ រីកលូតលាស់ដូចផ្កា លំអរពេញស្នងការខេត្តតែម្ដង។
កោះសន្តិភាព មិនអាចទំនាក់ទំនងសុំការបំភ្លឺពីលោក កោ ស៊ុនកាំង ដែលរងការចោទប្រកាន់ពីក្រសួងបរិស្ថានខាងលើនេះបានទេ នៅព្រឹកថ្ងៃទី២៨ ឧសភា នេះ ។ ប៉ុន្តែយ៉ាងណា លោកសៅ សាម៉ុន ស្នងការរងខេត្ត បានបញ្ជាក់ប្រាប់កោះសន្តិភាពហើយថា លោកស្នងការខេត្ត បានបញ្ជាឲ្យកោះហៅ លោកកោ ស៊ុនកាំង ចូលមកបំភ្លឺនៅការិយាល័យជំនាញរួចម្ដងហើយ កាលពីថ្ងៃទី២៧ ឧសភា។ ប៉ុន្តែចំណាត់ការបន្តយ៉ាងណានោះ លោកកំពុងរង់ចាំបទបញ្ជាលោកស្នងការខេត្ត ៕
