សម្តេច​តេ​ជោ ប្រសិទ្ធិ​នាម​ឲ្យ ជញ្ជាំង​ភ្នំ​, ថ្ម​១​ផ្ទាំង និង​ឈើ​១​ដើម មានឈ្មោះ​ជា​ផ្លូវការ

រាជធានី​ភ្នំពេញ ៖ នៅ​ព្រឹក​ថ្ងៃ​ទី​១ មិថុនា ២០២០ នៅ​ពេល​សម្តេច​តេ​ជោ ហ៊ុន សែន នាយក​រដ្ឋមន្ត្រី​កម្ពុជា អញ្ជើញ​ធ្វើ​ដំណើរ​ឆ្លងកាត់​ពី​ទីតាំង​ឆ្នេរសមុទ្រ​រាម ឆ្ពោះ​មក​កាន់​ឆ្នេរ​អូរ​ត្រេះ បាន​ប្រសិទ្ធិ​នាម​ឈ្មោះ​ដែល​ទាក់ទាញ​ទេសចរណ៍​ចំនួន​៣​ជា​ផ្លូវការ រួម​មាន ៖

១) “​ខ្មែរ​ធ្វើ​បាន​” ពាក្យ​នេះ​នឹង​ឆ្លាក់​នៅ​លើ​ជញ្ជាំង​ភ្នំ ដែល​បាន​កាត់​ពុះ​ជ្រែក​ភ្នំ ធ្វើ​ផ្លូវ​ចុះ​មក​ក្រោម ហើយ​បត់​ឆ្វេង​ឡើង​ទៅ​លើ​ភ្នំ បត់​ចុះ​ក្រោម​ឆ្ពោះទៅ​កាន់​ឆ្នេរ​អូ​ត្រេះ ។

២) “​សិលា​ចាំ​ស្នេហ៍​” គឺ​មាន​ផ្ទាំង​ថ្ម​ធំ​មួយ​ផ្ទាំង នៅ​ចំ​កណ្តាលផ្លូវ ពេល​ធ្វើ​ដំណើរ​ចុះ​មក​ពី​ផ្លូវ​លើ​ទួល​ភ្នំ​ចុះ​មក​ក្រោម ។

៣) “​ដើមឈើ​ចាំ​ស្នេហ៍​” គឺ​ក្រោយ​ពី​ឆ្លងកាត់​សិលា​ចាំ​ស្នេហ៍​រួច​ហើយ ចុះ​មក​ក្រោម​បន្តិច គឺ​មាន​ដើមឈើ​ធំ​មួយ​ដើម ដុះ​នៅ​ចំ​កណ្តាលផ្លូវ ដែល​មាន​ចាក់​បេតុង​ព័ទ្ធ​ជុំវិញ​ការពារ​សុវត្ថិភាព រួច​ស្រេច​ទៀត​ផង ។

ទេសភាព​ធម្មជាតិ​ដ៏​ស្រស់​ស្អាត នៅ​តាម​ដងផ្លូវ​បត់បែន ឡើង​ចុះ​ឆ្លងកាត់​ភ្នំ នៅ​តំបន់ឆ្នេរ​សមុទ្រ​រាម គឺ​មានការ​ទាក់ទាញ​ទេសចរណ៍​យ៉ាង​ខ្លាំង ដែល​សង្ឃឹមថា នឹង​ក្លាយទៅជា​តំបន់​ទេសចរណ៍ ដ៏​មាន​ប្រជាប្រិយ និង​ទាក់ទាញ​ខ្លាំង​បំផុត​នា​ពេល​អនាគត ឆាប់​ៗ​នេះ ៕