ជំនួយការផ្ទាល់លោកនាយករដ្ឋមន្ត្រី ហ៊ុន សែន គឺលោក សេង ទៀង ត្រូវបានព្រះករុណ ព្រះបាទសម្តេច ព្រះបរមនាថ នរោត្តមសីហមុនី ព្រះមហាក្សត្រនៃព្រះរាជាណាចក្រកម្ពុជាឡាយព្រះហស្ថលេខាតែងតាំងមុខតំណែងជារដ្ឋលេខាធិការទីស្តីការគណៈរដ្ឋមន្ត្រី តាមសំណើលោកនាយករដ្ឋមន្ត្រី ហ៊ុន សែន ។
នេះបើយោងតាមព្រះរាជក្រឹត្យលេខ នស/ រកត /០៨២០ /៨៥០ ចុះថ្ងៃទី០៦ សីហា ២០២០ និងដែលត្រូវបានគេផ្សព្វផ្សាយជាសាធារណៈនៅប៉ុន្មាននាទីមុននេះ ។
លោក សេង ទៀង ត្រូវបានគេកត់សម្គាល់ឃើញអមដំណើរលោក ហ៊ុន សែន ជាប្រចាំ ហើយភាគច្រើនគេឃើញលោកនាំយកអំណោយរបស់លោក ហ៊ុន សែន ក៍ដូចជាភរិយា ទៅចែកជូនជនក្រីក្រ ចាស់ជរា កុមារកំព្រានិង ស្ត្រីដែលឆ្លងទន្លេកូនភ្លោះបីជាដើម ។
ការតែងតាំងមុខតំណែងលោក សេង ទៀង ជារដ្ឋលេខាធិការទីស្តីការគណៈរដ្ឋមន្ត្រី នាពេលនេះ ត្រូវបានអ្នកតាមដានសង្គមដាក់ការសង្ស័យថា លោក សេង ទៀង ទំនងជាហត់នឿយនឹងការងារច្រើន ខណៈវ័យកាន់តែចាស់ ឬ ក៍អាចមានបញ្ហាផ្សេងទៀត ព្រោះតាមការកត់សម្គាល់ កន្លងមកមានមន្ត្រីមួយចំនួននៅខុទ្ទកាល័យ ឬ ស្ថិតនៅក្រុមជំនួយការផ្ទាល់លោក ហ៊ុន សែន គឺបើតែងតាំងមុខតំណែងថ្មី ក៍មុខតំណែងនោះបន្ថែមលើតួនាទីដែលមានស្រាប់ ដូចករណីចៅហ្វាយខេត្ត តែងតាំងជាជំនួយការលោក ហ៊ុន សែន បន្ថែមលើមុខតំណែងជាអភិបាលខេត្តជាដើម ។
យ៉ាងណាក៍ដោយ នៅយប់ថ្ងៃសុក្រដដែលនេះ «អង្រុត» មិនអាចរកការសុំអត្ថាធិប្បាយបានទេពីលោក សេង ទៀង ផ្ទាល់ ក៍ដូចជាខុទ្ទកាល័យលោកនាយករដ្ឋមន្ត្រី ហ៊ុន សែន ៕
