ឧកញ៉ា តាំង ផេងប៉ោ ចេះរបៀបស្វាស៊ីបាយលាបមាត់ពពែ

ប្រឡាយ​ទឹក​មួយ​ខ្សែ ដែល​ប្រជាពលរដ្ឋ​ទុក​ប្រើប្រាស់​ជា​ប្រយោជន៍​រួម​សម្រាប់​យក​ទឹក​ស្រោចស្រព​ស្រែ​និង​ដំណាំ​ផ្សេង​ៗ​ត្រូវ​បាន​ឈ្មួញ​ងារ​ជា​ឧកញ៉ា​ម្នាក់ ត្រូវ​ពលរដ្ឋ​ចោទ​រំលោភ​ចាក់​ដី​លុប ។​

​ប្រឡាយ​ទឹក​ខាងលើ​នេះ ស្ថិត​នៅ​ក្នុងភូមិ​វាយ​ឈ្នះ ឃុំរ​វៀង ស្រុក​សំរោង ខេត្តតាកែវ ។ បើ​តាម​ប្រជាពលរដ្ឋ ឧកញ៉ា​ដែល​រំលោភ​ចាក់​ដី​លុប​ប្រឡាយ​នោះ ឈ្មោះ លោក​ឧកញ៉ា តាំង ផេង​ប៉ោ អគ្គនាយក​ក្រុមហ៊ុន តាំង ផេង​ប៉ោ Co., Ltd ដែល​ជា​ក្រុមហ៊ុន​ចែកចាយ​នូវ​ថ្នាំលាប Dulux ។​

​ជុំវិញ​ការ​ចោទប្រកាន់​ខាងលើ​នេះ «​អង្រុត​» មិន​អាច​រក​កា​រសុំបំភ្លឺ​តបបាន​ទេពី​លោក​ឧកញ៉ា តាំង ផេង​ប៉ោ ក៍​ដូច​ជា​មន្ត្រី​អាជ្ញាធរ​មូលដ្ឋាន ។​

​យ៉ាងណា​ក៍ដោយ លោក​ឧកញ៉ា តាំង ផេង​ប៉ោ បាន​ថ្លែងប្រាប់​ប្រ​ព័​ន្ឋ​ផ្សព្វផ្សាយ​ក្នុងស្រុក​កាលពី​ថ្ងៃ​ម្សិលមិញ​ថា លោក​មិន​បានដឹង​រឿង​ចាក់​ដី​លុប​ប្រឡាយ​ទឹក​ខាងលើ​នេះ​ទេ ពោល​គឺ​អ្វី​ៗ​ទាំងអស់​អ្នកម៉ៅការ​ជា​អ្នក​ធ្វើ ហើយ​លោក​ឧកញ៉ា សូម​អរគុណ​អាជ្ញាធរ​ដែល​មាន​វិធានការ​បញ្ហា​នេះ ។​

​លោក​ឧកញ៉ា តាំង ផេង​ប៉ោ បន្ត​ថា តាម​ការ​សាកសួរ​ទៅ គឺ នេះ​មិនមែន​ជា​ការ​ចាក់​ដី​រំលោភ​ប្រឡាយ​ទឹក នោះ​ទេ គ្រាន់តែ​ដាក់​ទម្រ​គ្រឿងចក្រ ប៉ុណ្ណោះ ហើយ​ក្រោយ​រួចរាល់​គឺ នឹង​ដក​ចេញ​វិញ ភ្លាម មិន​អោយ​មានការ​រំលោភ​ដី​ប្រឡាយ​ទឹក ឡើយ ។​

​លោក​ឧកញ៉ា តាំង ផេង​ប៉ោ បន្ត​ទៀត​ថា «​ដី​នេះ​ក៏​មិនមែន​ជា​ដី​កម្មសិទ្ធិ​ក្រុមហ៊ុន​របស់​លោក​ដែរ ហើយ​ក៏​មិន​មាន​គម្រោង​សាងសង់ រោងចក្រ​អ្វី នោះ​ទេ​» ។​

​អគ្គនាយក​ក្រុមហ៊ុន តាំង ផេង​ប៉ោ អះអាង​ទៀត​ថា លោក​មិន​មាន​ចេតនា ចង់​រំលោភ​ប្រឡាយ​ទឹក​របស់​ប្រជាពលរដ្ឋ ឬ ធ្វើ​អោយ​ប្រជាពលរដ្ឋ ក្តៅក្រហាយ និង អោយ​អាជ្ញាធរ​ឈឺក្បាល ព្រោះតែ​បញ្ហា​បន្តិចបន្តួច នេះ​ទេ ៕