ចាប់ពីខែសីហា ឆ្នាំ២០២០តទៅ ក្រសួងសាធារណការនិងដឹកជញ្ជូននឹងចាប់ផ្តើមចេញប័ណ្ណបើកបរអន្តរជាតិជូនប្រជាពលរដ្ឋខ្មែរ ដើម្បីផ្តល់ភាពងាយស្រួលក្នុងបើកបររថយន្តនៅក្រៅប្រទេស ។
នេះបើយោងតាមលោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការនិងដឹកជញ្ជូនដែលថ្លែងក្នុងប្រជុំបូកសរុបលទ្ធផលការងារសុវត្ថិភាព ចររាចរណ៍ផ្លូវគោក ប្រចាំឆមាសទី១ ឆ្នាំ២០២០ នៅទីស្តីការក្រសួងមហាផ្ទៃ នាព្រឹកថ្ងៃទី០៧ កក្កដា ២០២០ ។
បើតាមលោក ស៊ុន ចាន់ថុល កម្ពុជាជាសមាជិកអង្គការសហប្រជាជាតិ ដូច្នេះយើងអាចចេញប័ណ្ណបើកបរអន្តរជាតិ ជូនបងប្អូនប្រជាពលរដ្ឋដែលមានប័ណ្ណបើកបរ ហើយយកមកដូរសុំធ្វើប័ណ្ណបើកបរបណ្តោះអាសន្ន។ បើតាមលោកទេសរដ្ឋមន្ត្រី ប័ណ្ណបើកបរយើងមានប្រភេទ A B C នៅខាងក្រោយ ដូច្នេះ យើងបោះត្រាតាមប្រភេទដែលប្រជាពលរដ្ឋស្នើសុំ ៕
