អតីតអ្នកចម្រៀងល្បីឈ្មោះបោះសម្លេងមួយរូបនៅក្នុងវិស័យសិល្បៈនិងចម្រៀងខ្មែរ គឺ កញ្ញា ពៅ បញ្ញាពេជ្រ បានសម្តែងការហត់នឿយក្នុងជីវិតដែលនៅតែលើរទេះរុញមិនដឹងថ្ងៃណាបានជាអាចដើរនឹងគេបាន ។
នៅលើបណ្តាញសង្គមហ្វេសប៊ុក គណនីឈ្មោះ Peouv Panha Pich ដែលគេដឹងថាជាអាក់ខោនរបស់អ្នកចម្រៀងរូបនេះ បានសរសេរបង្ហោះនៅប៉ុន្មានម៉ោងនេះដោយបញ្ជាក់យ៉ាងខ្លីដូច្នេះថា
«ដឹងកាលបើដើរបាន អង្គុយយូរៗធុញណាស់ អង្គុយ13 ឆ្នាំហើយ » ។
សូមបញ្ជាក់ កញ្ញា ពៅ បញ្ញាពេជ្រ ត្រូវបានឃាតកបាញ់ប៉ងសម្លាប់កាលពីឆ្នាំ២០០៧ ប៉ុន្តែនាងមិនស្លាប់ គឺរបួសរហូតធ្លាក់ខ្លួនពិការមកទល់នឹងបច្ចប្បន្នមានរយៈពេល១៣ឆ្នាំហើយ ហើយឃាតកនិងអ្នកនៅពីក្រោយនៃការបាញ់ប្រហារអ្នកចម្រៀងល្បីឈ្មោះកណ្តាលរាជធានីភ្នំពេញនេះ មិនទាន់ត្រូវបានសមត្ថកិច្ចចាប់ខ្លួនយកមកផ្តន្ទាទោសតាមច្បាប់នៅលើយទេ ។
គេមិនដឹងថា ករណីបាញ់ប្រហារកញ្ញា ពៅ បញ្ញាពេជ្រ កាលពី១៣ឆ្នាំមុននោះ ពាក់ព័ន្ឋនឹងរឿងអ្វីនោះដែរ ។
ក្រៅពីកញ្ញា ពៅ បញ្ញាពេជ្រ ក៍មានអ្នកចម្រៀងនិងតារាសម្តែងមួយចំនួនទៀត ក៍ធ្លាប់រងនូវអំពើបាញ់ប្រហារនិងការជះទឹកអាស៊ីតបណ្តាលឲ្យពិការផងដែរ ដូចជា កញ្ញា ទូច ស៊ុននិច និង អ្នកនាង តាត ម៉ារីណា ជាដើម ហើយសំណុំរឿងរបស់ពួកគេក៍មិនទាន់ត្រូវបានផ្តល់យុត្តិធ៌មនៅឡើយដែរ ក្រៅពីរស់ក្នុងពិការភាព ឯឃាតកនិងអ្នកនៅពីក្រោយខ្នង ហាក់នៅឆ្ងាយអើយសែនឆ្ងាយពីសំណាញ់ច្បាប់ ៕
