ប្រភពច្បាស់ការណ៍បានឲ្យដឹងថា ចៅក្រមដែលបុកចោរស្លាប់ គឺឈ្មោះ លោក គង់ ខេមរា ហើយនៅព្រឹកថ្ងៃទី០៩ កក្កដានេះ សមត្ថកិច្ចខណ្ឌសែនសុខបាននិងកំពុងកសាងសំណុំរឿងបញ្ជូនករណីព្រហ្មទណ្ឌនិងបង្កគ្រោះថ្នាក់ចរាចរណ៍ទៅសាលាដំបូងចាត់ការតាមផ្លូវច្បាប់ហើយ ។
តាំងពីព្រឹកព្រលឹមរហូតមកទល់នឹងវេលាថ្ងៃត្រង់ថ្ងៃព្រហស្បតិ៍ នៅលើបណ្តាញសង្គមហ្វេសប៊ុក មហាជនជាច្រើននៅតែលើកឡើងដោយប្រៀបធៀបករណីចោរឆក់និងស្ត្រីជនគ្រោះជាជនជាតិចិនម្នាក់បុកចោរ ដូចករណីខាងលើនេះ មកបង្ហាញ ដោយហាក់ចង់ឲ្យមានការផ្តន្ទាទោសតាមច្បាប់ដូចគ្នា ធ្វើយ៉ាងណាកុំឲ្យមានការអនុវត្តច្បាប់ស្តង់ដារពីរ ។
មិនអាចរកការសុំអត្ថាធិប្បាយបានទេពីអ្នកនាំពាក្យអគ្គស្នងការដ្ឋាននគរបាលជាតិ ក៍ដូចជាអ្នកនាំពាក្យសាលាដំបូងរាជធានីភ្នំពេញ នៅវេលាថ្ងៃត្រង់ថ្ងៃទី០៩ កក្កដានេះ ។
គួររំឮកថា កាលពីម៉ោងជាង២រសៀលថ្ងៃទី០៨ កក្កដា ២០២០ នៅតាមបណ្តោយផ្លូវភ្នំពេញហាណូយ ស្ថិតក្នុងភូមិរោងចក្រ សង្កាត់គោកឃ្លាង ខណ្ឌសែនសុខ រាជធានីភ្នំពេញ មានករណីចោរឆក់កាបូបមានលុយប្រមាណ១ម៉ឺនដុល្លារមួយបានកើតឡើង ជនសង្ស័យជាចោរនិងជាជនរងគ្រោះមិនទាន់ស្គាល់អត្តសញ្ញាណនៅឡើយ ត្រូវបានគេអះអាងថាជាស្ត្រីតែងខ្លួនជាបុរស ហើយត្រូវស្លាប់ បន្ទាប់ពីជនរងគ្រោះ(ម្ចាស់កាបូបលុយ)បើករថយន្តដេញបំបុកពីក្រោយ ។ ជនរងគ្រោះត្រូវបានសមត្ថកិច្ចថា ជិះម៉ូតូមួយគ្រឿង ពណ៌ខ្មៅ ពាក់ស្លាកលេខ ភ្នំពេញ ១HQ-២៥៤៦ ។ ចំណែកជនរងគ្រោះជាម្ចាស់កាបូប ហើយក្នុងកាបូបមានលុយជិត១ម៉ឺនដុល្លារនោះ បើករថយន្តម៉ាកហាយឡែនឌ័រ ពណ៌ស ពាក់ស្លាកលេខ ភ្នំពេញ ២AF-៧០០៦ ។
រង់ចាំតាមដានជា«អង្រុត»បន្តទៀត ថាតើលោក គង់ ខេមរា ចៅក្រមសាលាដំបូងខេត្តកោះកុង នឹងមានវាសនាដេកក្នុងពន្ឋនាគារដូចស្ត្រីជនជាតិចិនដែរឬក៍យ៉ាងណា ? ៕
