មេការ សំណង់បុរី ខេអិន ដែលមានទីតាំងស្ថិតនៅតាមបណ្តោយមហាវិថីឈ្នះ ឈ្នះ ភូមិស្រែតេជៈ សង្កាត់សំរោងក្រោម ខណ្ឌពោធិ៍សែនជ័យ បានរងការចោទថា បានដកកាំភ្លើងបាញ់ដីចំនួន២គ្រាប់ គំរាមបាញ់សម្លាប់កម្មករសំណង់២នាក់ បណ្តាលឲ្យរងរបួសជើង ។
ហេតុការណ៍នេះ បានបង្កឲ្យមានការភ្ញាក់ផ្អើលកាលពីម៉ោងជាង៣រសៀលថ្ងៃទី១១ កក្កដា ២០២០ ។
ប្រភពបានស្រង់សម្តីជនរងគ្រោះបន្តថា មុនពេលកើតហេតុ ជនរងគ្រោះទាំង២នាក់ បានទៅសុំបើកលុយចុងសប្តាហ៍ពីមេការសំណង់ឈ្មោះ អុឹង ឆេងវ៉េង ភេទប្រុស អាយុ៤០ឆ្នាំ ចំនួន៥០០ដុល្លារ តែមេការនោះបានឲ្យតែ១៥០ដុល្លារ ទើបជនរងគ្រោះតវ៉ា ព្រោះមិនអាចយកលុយ១៥០ដុល្លារនោះទៅចែកឲ្យកម្មករផ្សេងៗទៀតគ្រប់នោះទេ កកើតជម្លោះពាក្យសម្តី រហូតដល់ជនដៃដល់ខឹងក្រោធ ទាញដកកាំភ្លើងខ្លីមិនស្គាល់ម៉ាក បាញ់ភ្ជុចផ្លូវបេតុង២គ្រាប់ បណ្តាលឲ្យផ្លាតខ្ទាតបំណែកត្រូវចំជើងហូរឈាមជនរងគ្រោះឈ្មោះប៊ុន ច័ន្ទតុលា ភេទប្រុស អាយុ៣៣ឆ្នាំ មុខរបរ កម្មករសំណង់បុរីខាងលើ ផ្នែកខាងប្រព័ន្ធលូ មានទីលំនៅភូមិប្រាសាទ សង្កាត់ស្នោរ ខណ្ឌកំបូល រាជធានីភ្នំពេញ ។ ក្រោយធ្វើសកម្មភាពជនដៃដល់បានទាញម៉ូតូជិះគេចខ្លួនបាត់ស្រមោល ។
ក្រោយកើតហេតុភ្លាមៗ កម្លាំងនគរបាលប៉ុស្តិ៍ កម្លាំងជំនាញខណ្ឌចុះទៅសាកសួរ ពិនិត្យស្លាកស្នាមបន្សល់ទុក ហើយរកឃើញសំបកគ្រាប់១ ដែលស្គាល់ជាសំបកគ្រាប់កាំភ្លើងGlock ។ ចំណែកសំបកគ្រាប់មួយទៀត ត្រូវជនរងគ្រោះអះអាងថា ជនសង្ស័យរើសយកដាក់ហោប៉ាវមុនគេចខ្លួន ។
បន្ទាប់មក សមត្ថកិច្ចនាំជនរងគ្រោះទៅសាកសួរ និងដាក់ពាក្យបណ្តឹងនៅប៉ុស្តិ៍ ដើម្បីបន្តស្រាវជ្រាវតាមចាប់ខ្លួនជនដៃដល់យកមកផ្តន្ទាទោសតាមច្បាប់ ៕
