សត្វគោចំនួន០៨ក្បាលបានងាប់ភ្លាមៗនៅកន្លែងកើតហេតុ ដោយសារអ្នកបើកបរគោយន្តបើកគេចចង្ហុកក៍រេទៅបុកពេញៗតែម្តង ខណៈគោទាំងនោះកំពុងដើរលើផ្លូវ ។
ឧបទវហេតុនេះ បានកើតឡើងកាលពីព្រឹកថ្ងៃទី១៣ កក្កដា ២០២០ នៅលើផ្លូវក្រាលគ្រួសក្រហម លេខ៥១C ចំណុច អូរធំ ស្ថិតក្នុងភូមិកង្កែប ឃុំច្រណូក ស្រុកកំពង់លែង ខេត្តកំពង់ឆ្នាំង ដែលជាផ្លូវតភ្ជាប់ពីខេត្តកំពង់ធំ ។
បើតាមសមត្ថកិច្ចបានឲ្យដឹងថា ក្រោយបង្កហេតុអ្នកបើកបរគោយន្តកន្ត្រៃ មិនស្គាល់អត្តសញ្ញាណបានចុះរត់គេចខ្លួនបាត់ ដោយទុកគោយន្តកែច្នៃនៅនឹងកន្លែងកើតហេតុ។ចំណែក ម្ចាស់គោដែលងាប់ទាំង៨ក្បាល(គោញី៥ក្បាល) ក៍មិនទាន់ស្គាល់អត្តសញ្ញាណនៅឡើយដែរ ។
ករណីនេះសមត្ថកិច្ច បានយកគោយន្តមករក្សាទុកនៅអធិការដ្ឋាននគរបាលស្រុកកំពង់លែង ដើម្បីបន្តចាត់ការតាមនីតិវិធីច្បាប់ ។
ជាការកត់សម្គាល់ ម្ចាស់សត្វគោមួយចំនួន ហាក់មិនទទួលខុសត្រូវក្រោយគោរបស់ខ្លួនដើរលើទ្រូងផ្លូវដែលច្បាប់ហាមឃាត់ និងបានបង្កឲ្យកើតមានគ្រោះថ្នាក់ចរាចរណ៍ញឹកញាប់នៅតាមបណ្តោយផ្លូវជាតិ ក៍ដូចជាផ្លូវលំនានា ហើយជាច្រើនដងគេកម្រឃើញម្ចាស់គោចេញមុខដោះស្រាយណាស់ នៅពេលបង្កគ្រោះថ្នាក់ចរាចរណ៍បណ្តាលឲ្យមានមនុស្សស្លាប់ ៕