ទីបំផុតទៅសំណុំរឿងជម្លោះដីធ្លីដ៍ស្រួចស្រាវនិងរុាំរ៉ៃអាស់រយៈពេលជាង១០ឆ្នាំ បានបិទបញ្ចប់ហើយដោយភាគីម្ខាងត្រូវបានគេស្គាល់ថាជាយោធិនពិការព្រមទទួលយកលុយចំនួន១៧ម៉ឺនដុល្លារ ពីភាគីម្ខាងទៀតដែលគេស្គាល់ថាមានតួនាទីជាអនុរដ្ឋលេខាធិការក្រសួងដែនដីនិងនគរូបនីយកម្មនិងសំណង់ ។
បើតាមគណនីហ្វេសប៊ុកឈ្មោះ Duong Dara បានបញ្ជាក់ថា ការបិទបញ្ចប់សំណុំរឿងដីធ្លីនៅព្រែកព្នៅនេះគឺឈរលើគោលការណ៍សម្របសម្រួល ពិសេសគោលការណ៍ឈ្នះ ឈ្នះ របស់លោកនាយករដ្ឋមន្ត្រី ហ៊ុន សែន ។
ប្រភពដដែលបន្តថា រឿងវិវាទដីធ្លីដ៏ស្មុគ្រស្មាញនេះ គឺបានក្តីក្តាំគ្នាជាង១០ឆ្នាំមកហើយ ហើយក៏មានសាលដីកាស្ថាពរ ដែលនឹងឈានទៅអនុវត្តន៍បញ្ចប់ទៀតផង តែអនុវត្តន៍មិនទាន់បាន។
ដំណោះស្រាយបញ្ចប់វិវាទតាមរយៈការផ្សះផ្សាឈរលើគោលការណ៍ឈ្នះ-ឈ្នះរបស់លោក ហ៊ុន សែន ដែលជាលទ្ធផលគឺ លោក កើត សារ៉េត អនុរដ្ឋលេខាធិការក្រសួងដែនដី ទទួលបានដី ដែលខ្លួនមានប្លង់រឹងកាន់កាប់រួចហើយ រីឯ លោក មាស សុផាត ដែលជាយោធិនពិការគឺទទួលបានថវិកា១៧ម៉ឺនដុល្លារ ដេីម្បីយកទៅទិញផ្ទះនិងនៅសល់លុយមួយចំនួនបង្កើតមុខរបររស់នៅបានសមរម្យ ដែលប្រសើរជាងបន្តក្តីក្តាំគ្នាទៅមុខមិនដឹងថាពេលណាចប់ ៕
