ធ្វើដូចខ្មែរដែរ ! មេដឹកនាំវ័យក្មេងកូរ៉េខាងជើង ដកមន្រ្តីពុករលួយ

មន្ត្រី​ជំនាញ​កូរ៉េ​ខាងជើង​ជា​ច្រើន​នាក់ ត្រូវ​បាន​លោក គី​ម ជុង​អ៊ុ​ន មេដឹកនាំ​ជាន់ខ្ពស់​នៃ​សាធារណរដ្ឋ​ប្រជាធិបតេយ្យ​ប្រជាមានិត​កូរ៉េ​ខាងជើង បាន​បណ្តេញ​និង​ដក​តំណែង ដោយសារ​តែ​ប្រព្រឹត្ត​អំពើ​ពុក​រលួយ​ក្នុង​ការ​សាងសង់​មន្ទីរពេទ្យ​មួយ​ឈ្មោះ​Pyongyang General Hospital ។​

​បើ​តាម Reuters លោក គី​ម ជុង​អ៊ុ​ន មានការ​ខឹងសម្បារ​យ៉ាង​ខ្លាំង​ទៅ​នឹង​មន្ត្រី​ក្រោម​ឱវាទ​ជំនាញ​ទទួល​កិច្ច​ការងារ​សាងសង់​មន្ទីរពេទ្យ​ខាងលើ ដែល​ហ៊ាន​ក្បត់​លោក​និង​បក្ស ដោយ​បង្ខំ​និង​ជំរិត​ទារ​លុយ​ពី​ពលរដ្ឋ​ជា​លេស​ចូលរួម​វិភាគទាន​ក្នុង​ការ​សាងសង់​មន្ទីរពេទ្យ​Pyongyang General Hospital ហើយ​ដែល​ការ​សាងសង់​មន្ទីរពេទ្យ​នេះ លោក​ចាត់ទុកជា​ការ​លើកកម្ពស់​កែ​លម្អ​វិស័យ​សុខាភិបាល​សាធារណៈ ខណៈ​ដែល​ប្រទេស​កុម្មុយនីស្ត​មួយ​នេះ​កំពុង​ប្រឈម​នឹង​ការ​ឆ្លង​រីក​រាលដាល​នៃ​មេរោគ COVID-19​។​

​បើ​តាម Reuters លោក គី​ម ជុង​អ៊ុ​ន បាន​ចេញ​បញ្ជា​ឲ្យ​សាងសង់​មន្ទីរពេទ្យ Pyongyang General Hospital ហើយ​ឲ្យ​ការ​សាងសង់​នេះ​រួចរាល់​នៅ​មុន​ខួប​លើក​ទី​៧៥ នៃ​ការ​បង្កើត​គណបក្ស​ពលករ​កូរ៉េ​ខាងជើង ដែល​តាម​គម្រោង​នឹង​ប្រព្រឹត្ត​ទៅ​នៅ​ខែតុលា​ឆ្នាំ​២០២០​ខាង​មុខ​នេះ ៕