កម្មករនេសាទជនជាតិយួនរាប់សិបនាក់ ក្នុងនោះមានជនជាតិខ្មែរផងដែរ ត្រូវបានអាជ្ញាធរឥណ្ឌូនេស៊ីចាប់ខ្លួន ក្រោយការប៉ះទង្គិចគ្នាអស់រយៈពេលប្រមាណ២ម៉ោង នាព្រឹកថ្ងៃសុក្រនេះ ។
បើតាម The Jakarta Post ម្ចាស់ទូកនេសាទជនជាតិវៀតណាម២នាក់ ក៍ត្រូវបានចាប់ខ្លួនដែរ ក្រោយពួកគេនិងក្រុមកម្មករដែលចាប់ខ្លួន បានចូលមកនេសាទខុសច្បាប់នៅតាមតំបន់ជាយៗសមុទ្រចិនខាងត្បូង ដែលឥណ្ឌូនេស៊ីថាជាទឹកដីរបស់ខ្លួន ។
បើតាមមេបញ្ជាការកងនាវាចម្បាំងការពារដែនដទឹកឥណ្ឌូនេស៊ី បានបញ្ជាក់ថា អ្នកទទួលខុសត្រូវជនជាតិវៀតណាមម្នាក់ក្នុងចំណោម២នាក់ដែលចាប់ខ្លួន បានវ៉ៃតដៃជាមួយកងកម្លាំងឥណ្ឌូនេស៊ី ហើយក៍ត្រូវបានខាងតបតវិញនិងគ្រប់គ្រងស្ថានការណ៍បាន ដោយរឹបអូសទូកនេសាទវៀតណាម២គ្រឿង និងចាប់ខ្លួនមនុស្សរប់សិបនាក់ ក្នុងនោះក៍មានជនជាតិខ្មែរផងដែរ ប៉ុន្តែមិនបានបញ្ជាក់ថា តើមានជនជាតិខ្មែរប៉ុន្មាននាក់នោះទេ ហើយក៍មិនដឹងថាពួកគេ(ខ្មែរ) ជាកម្មករស៊ីឈ្នួលនេសាទឲ្យថៅកែយួន ឬក៍យ៉ាងណានោះដែរ ។
មកទល់នឹងម៉ោង១១និង៣៧នាទីថ្ងៃត្រង់ ថ្ងៃទី២៤ កក្កដា ២០២០ដដែលនេះ «អង្រុត» មិនអាចរកការសុំអត្ថាធិប្បាយបានទេពីមន្ត្រីអ្នកនាំពាក្យក្រសួងការបរទេសខ្មែរ ជុំវិញព័ត៌មានអំពីការចាប់ខ្លួនកម្មករខ្មែរខាងលើនេះ ។
កាលពីខែមីនាកន្លងមកនេះ មានទូកនេសាទវៀតណាម៥គ្រឿង ដែលចូលនេសាទខុសច្បាប់ក្នុងដែនទឹកឥណ្ឌូនេស៊ី ត្រូវបានអាជ្ញាធរឥណ្ឌូនេស៊ីរឹបអូសនិងបាញ់កម្ទេច ហើយក្នុងនោះកម្មករនេសាទយួនជិត៧០នាក់ ក៍ត្រូវបានចាប់ខ្លួនដូចគ្នានេះដែរ ៕