ប្រធានក្រុមអ្នកនាំពាក្យរាជរដ្ឋាភិបាលខ្មែរ លោក ផៃ ស៊ីផាន បានស្រង់ប្រសាសន៍របស់អ្នកតំណាងរាស្ត្រដោយបញ្ជាក់ថា យុវជននៅក្នុងក្រុមឧទ្ទាមក្រៅច្បាប់ គ្មានវាសនាបានបន្តវេនដឹកនាំប្រទេសនោះទេ ។
បើតាមលោក ផៃ ស៊ីផាន យុវជននៅក្នុងក្រុមឧទ្ទាមក្រៅច្បាប់ កុំថាឡើយគ្មានវាសនាបានបន្តវេនដឹកនាំប្រទេស សូម្បីតែចូលបម្រើក្នុងក្របខ័ណ្ឌរដ្ឋក៍គ្មានដែរ ។
ការលើកឡើងរបស់លោករដ្ឋលេខាធិការទីស្តីការគណៈរដ្ឋមន្ត្រីខាងលើនេះ ត្រូវបានលោកបញ្ជាក់នៅលើបណ្តាញសង្គមហ្វេសប៊ុកផ្លូវការរបស់លោកថាជាមតិរបស់តំណាងរាស្ត្រ តែលោកមិនបញ្ជាក់អត្តសញ្ញាណនោះទេ ។
នៅលើបណ្តាញសង្គមលោក ផៃ ស៊ីផាន បានសរសេរបញ្ជាក់យ៉ាងខ្លីថា«យុវជននៅក្នុងក្រុមឧទ្ទាមក្រៅច្បាប់ = គ្មានវាសនាចូលក្នុងក្របខ័ណ្ឌរដ្ឋនិងក៏គ្មានវាសនាបានបន្តវេនដឹកនាំប្រទេសដែរ។ ស្នេីរង់ចាំទទួលកេរ្ត៏មរត៌កពីក្រុមឧទ្ទាមក្រៅច្បាប់ទៅ ។» ។
ការលើកឡើងរបស់លោកប្រធានក្រុមអ្នកនាំពាក្យរាជរដ្ឋាភិបាលខាងលើនេះដែរ បានធ្វើឡើងក្រោយពេលដែលប៉ុន្មានឆ្នាំចុងក្រោយនេះ គណបក្សប្រជាជនកម្ពុជា(CPP) ដឹកនាំដោយលោកនាយករដ្ឋមន្ត្រី ហ៊ុន សែន បានតែងតាំងកូនក្មួយនិងសាច់ញាតិសណ្តានរបស់ថ្នាក់ដឹកនាំកំពូលៗ ក៍ដូចជាសមាជិកគណៈកម្មាធិការអចិន្ត្រៃយ៍បក្ស ឲ្យកាន់មុខតំណែងនិងតួនាទី ក៍ដូចជាដំឡើងតួនាទីនិងឋានន្តរស័ក្តិខ្ពស់ក្នុងជួររាជរដ្ឋាភិបាល និងស្ថាប័ននីតិបញ្ញត្តិជាច្រើនរូប ៕
