លោក ខៀវ កាញារីទ្ឋ រដ្ឋមន្ត្រីក្រសួងព័ត៌មានហាក់សម្តែងការយល់ឃើញផ្ទាល់ខ្លួនរបស់លោកអំពីអ្នកមានទ្រព្យសម្បត្តិមហាសាលមួយចំនួននៅក្នុងប្រទេសខ្មែរ គឺបានមកពីការប្រព្រឹត្តអំពើអាក្រក់ដូចជាពុករលួយ កាប់បំផ្លាញព្រៃឈើ លក់រ៉ែ លក់ដីនិងបន្លន់ពីរាស្ត្រជាដើម ។
នៅលើបណ្តាញសង្គមហ្វេសប៊ុកផេកផ្លូវការរបស់លោករដ្ឋមន្ត្រី ដែលទទួលបានការចុច Like និង Share ជាច្រើនពីសំណាក់Friendsរបស់លោក លោកបានសរសេរភ្ជាប់ជាមួយរូបភាពថ្លុកដែលជាតួអង្គយមរាជប្រាប់អ្នកដែលស្លាប់ថា«សូមទោសហាមមិនឲ្យយកអីវ៉ែអីវ៉ាន់ទៅជាមួយទេ លុយលក់ឈើ លក់រ៉ែ លក់ដី វីឡានាឡិកា តម្លៃរាប់លាន បន្លន់ពីរាស្ត្រមិនអាចយកទៅជាមួយទេ »។
ក្នុងន័យខាងលើនេះ លោក ខៀវ កាញារីទ្ឋ ដែលគេស្គាល់ថាអ្នកដែលមានចំណេះដឹងជ្រៅជ្រះនិងខ្ពង់ខ្ពស់ និងចូលចិត្តសប្បាយក្រៅម៉ោងធ្វើការ ទំនងជាលោកចង់ប្រាប់ទៅអ្នកមានអំណាចនិងលុយកាក់រាប់លានដុល្លារថា ស្លាប់ទៅមិនអាចយកអ្វីទៅតាមខ្លួនបាននោះទេ គឺមានតែអំពើបាបនិងបុណ្យប៉ុណ្ណោះដែលអាចយកទៅតាមខ្លួនបានដូចពុទ្ឋឱវាទប្រៀនប្រដៅ។ ដូច្នេះ ត្រូវសាងអំពើណាដែលល្អជាកុសលដើម្បីជាស្ពានចម្លងទៅកាន់និព្វាន ។
យ៉ាងណា លោក ខៀវ កាញារីទ្ឋ មិនអាចរកការសុំអត្ថាធិប្បាយបានទេ ជុំវិញសំណេររបស់លោកនៅលើបណ្តាញសង្គមហ្វេសប៊ុកកាលពីថ្ងៃទី១៦ មេសាកន្លងទៅ ៕
