អនុប្រធានលេខាធិការដ្ឋានអចិន្ត្រៃយ៍ នៃអាជ្ញាធរជាតិទទួលបន្ទុកកិច្ចការព្រំដែន លោកស្រី កុយ ពិសី ហាក់មិនសប្បាយចិត្តទៅនឹងអ្វីដែលមជ្ឈដ្ឋានមួយចំនួនបាននិងកំពុងធ្វើរិះគន់ទៅលើបញ្ហាព្រំដែនកម្ពុជាវៀតណាម ដោយលោកស្រីបានចាត់ទុកអ្នករិះគន់បញ្ហាព្រំដែនមួយចំនួនតូចគឺជាក្រុមឧទ្ទាម ។
លោកស្រី កុយ ពិសី បានសរសេរនៅលើផេកហ្វេសប៊ុកផ្លូវការរបស់ខ្លួនថា «សមិទ្ឋផលដ៏ធំធេងរបស់ជាតិ និងភក្តីភាពរបស់យើង ចំពោះជាតិមាតុភូមិ ត្រូវបានក្រុមឧទ្ទាមមូលបង្កាច់ បំពុលសង្គមហួសពីការគិត។ ដើម្បីបានផលប្រយោជន៍ គេបោះចោលអស់គុណធម៌ ជាន់ឈ្លីភាពស្មោះត្រង់ បំភ័ន្តអ្នកទន់ខ្សោយយ៉ាងពិសពុល។ ទង្វើអាក្រក់របស់គេ ទឹកដីនេះអាច នឹងមិនទទួលស្គាល់គេឡើយ»។
ការលើកឡើងរបស់លោកស្រីខាងលើនេះ បានធ្វើឡើងក្រោយពេលដែល ប្រទេសកម្ពុជា និងវៀតណាម កាលពីថ្ងៃទី០១ សីហា ២០២០ បានប្រគល់ និងទទួលផែនទីឋានលេខាព្រំដែនគោក ខ្នាត ១/២៥ ០០០ ដែលគណៈកម្មការព្រំដែនខ្មែរអះអាងថាជាផែនទីទំនើបសម័យឌីជីថល។
នៅក្រោយការប្រគល់និងទទួលផែនទីខ្នាតខាងលើនៅឯទឹកដីវៀតណាម មជ្ឈដ្ឋានមួយចំនួនបានសម្តែងការមិនសប្បាយចិត្ត និងខ្លះថា ផែនទីខ្នាត១/២៥ ០០០ នឹងធ្វើឲ្យខ្មែរបាត់បង់ទឹកដីតាមព្រំដែនបន្តទៀត ។ ក្រៅពីការសម្តែងការមិនសប្បាយចិត្ត អ្នករិះគន់មួយចំនួនតូច ក៍ដូចជានៅលើបណ្តាញសង្គមហ្វេសប៊ុកខ្លះបានចោទលោកស្រី កុយ ពិសី ថាជាជនជាតិវៀតណាម មកបង្កប់នៅកម្ពុជានោះថែមទៀត ។
យ៉ាងណា លោកស្រី កុយ ពិសី បានបញ្ជាក់ឲ្យដឹងថា ផែនទីឋានលេខាព្រំដែនកម្ពុជា-វៀតណាម មាត្រដ្ឋាន ១/២៥ ០០០នេះ បានបង្ហាញពេញលេញលទ្ធផលខណ្ឌសីមា និងបោះបង្គោលព្រំដែនប្រមាណជា ៨៤% ដែលប្រទេសទាំងពីសម្រេចបាន។
លោកស្រីបញ្ជាក់ទៀតថា ផែនទីនេះជាផែនទីទំនើបសម័យឌីជីថល ៤.០ ដែលបង្ហាញយ៉ាងច្បាស់លាស់ខ្សែព្រំដែន បង្គោលព្រំដែន រួមនឹងស្ថានភាពភូមិសាស្ត្រនៅលើដីជាក់ស្តែងបានយ៉ាងជាក់លាក់ ងាយស្រួលក្នុងការ ប្រើប្រាស់ មិនដូចផែនទីបោនខ្នាត ១/១០០០០០ ដែលមានតែខ្សែព្រំដែន ហើយមិនមានអ្វីបង្ហាញជាក់លាក់ច្រើនជាងនេះ ៕
