គិតត្រឹមម៉ោង៧និង៤០នាទីព្រឹកថ្ងៃទី០៦ សីហានេះ ចំនួនមនុស្សស្លាប់ដោយសារការផ្ទុះឃ្លាំងផ្ទុកសារធាតុគីមីនៅក្បែរកំពុងផែទីក្រុងបេរូតប្រទេសលីបង់បានកើនដល់១៣៥នាក់ របួស៥០០០នាក់និងបាត់ខ្លួន១០នាក់ ។
នេះបើយោងតាមរដ្ឋមន្ត្រីក្រសួងសុខាភិបាលលីបង់ ដែលថ្លែងប្រាប់ទូរទស្សន៍ Al Manar នាព្រឹកព្រលឹមថ្ងៃព្រហស្បតិ៍នេះ ។
លោក Marwan Hamadeh អតីតសមាជិកសភាលីបង់ដែលទើបលាលែងតំណែងកាលពីថ្ងៃអង្គារ បន្ទាប់ពីមានការផ្ទុះដ៍កក្រើននេះរួចមកនោះ បានអំពាវនាវឲ្យក្រុមប្រឹក្សាសន្តិសុខអង្គការសហប្រជាជាតិបង្កើតគណៈកម្មការឯករាជ្យមួយដើម្បីស៊ើបអង្កេតការផ្ទុះដ៍មហន្តរាយដែលមិនធ្លាប់កើតមាននៅលីបង់ពីមុនមកនេះ ។
នៅក្នុងហេតុការណ៍ដ៍រន្ឋត់សម្រាប់លីបង់និងពិភពលោកទាំងមូលនេះ ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជាជាទីគោរពសក្តារៈដ៏ខ្ពង់ខ្ពស់បំផុត កាលពីថ្ងៃម្សិលមិញ ក៍បានសព្វព្រះរាជហឫទ័យព្រះរាជទានព្រះរាជសារចូលរួមរំលែកទុក្ខយ៉ាងក្រៀមក្រំបំផុតក្នុងព្រះនាមព្រះអង្គនិងប្រជារាស្ត្រកម្ពុជាជូនប្រធានាធិបតីលីបង់ នាយឧត្តមសេនីយ៍ MICHEL AOUN ផងដែរ៕
