ទូកនេសាទខ្មែរចំនួន២គ្រឿង ត្រូវបានគេអះអាងថា បានលិចដោយសារទូកនេសាទជនជាតិវៀតណាមបុក ។
យ៉ាងណា ប្រភពមិនបានបញ្ជាក់ថា ហេតុការណ៍ខាងលើនេះ បានកើតឡើងពីពេលណា មានអ្នកស្លាប់ ឬរបួស និងនៅទីតាំងណាពិតប្រាកដនោះទេ គ្រាន់តែប្រភពដែលស្រង់សម្តីមន្ត្រីអាជ្ញាធរមូលដ្ឋានគឺបញ្ជាក់ថា បានកើតឡើងនៅលើទឹកដីនៃខេត្តកំពត ។
បើតាមគណនីឈ្មោះ គួន សំបូរ ដែលបង្ហោះនៅលើបណ្តាញសង្គមហ្វេសប៊ុកកាលពីថ្ងៃទី០៥ សីហាម្សិលមិញ ហើយដែលអះអាងថាខ្លួនបានទទួលព័ត៌មានខាងលើពីអាជ្ញាធរមូលដ្ឋាន បានបញ្ជាក់ទៀតថា ទូកនេសាទយួនដែលបើកបំបុកទូកនេសាទខ្មែរ២គ្រឿង បណ្តាលឲ្យលិចនោះ គឺបានចូលមកក្នុងដែនទឹករបស់ប្រទេសកម្ពុជាដោយខុសច្បាប់ ។
ពាក់ព័ន្ឋនឹងព័ត៌មានខាងលើនេះ នៅល្ងាចថ្ងៃទី០៦ សីហា ២០២០នេះ «អង្រុត» មិនអាចរកការសុំអត្ថាធិប្បាយបានទេពីអ្នកនាំពាក្យគណៈកម្មាធិការជាតិសន្តិសុខលំហរសមុទ្រ ក៍ដូចជាលោក ជាវ តាយ អភិបាលនៃគណៈអភិបាលខេត្តកំពត ។
សូមបញ្ជាក់ថា ជារឿយៗ យើងតែងឃើញមានការចុះផ្សាយអំពីករណីទូកនេសាទជនជាតិវៀតណាមរំលោភបំពានចូលមកដែនទឹកប្រៃកម្ពុជា និងនេសាទដោយប្រើឧបករណ៍ខុសច្បាប់ បណ្តាលឲ្យស្ទើរហិនហោចធនធានមច្ឆជាតិ ដោយមិនមានសមត្ថកិច្ចខាងណាទប់ស្កាត់បានឡើយ ។
តាមប្រភពខ្លះថា ការណ៍ដែលទូកនេសាទជនជាតិវៀតណាមចូលមករំលោភដែនទឹកកម្ពុជានិងប្រើឧបករណ៍នេសាទខុសច្បាប់បានដោយសារតែពួកគេបានបង់លុយឲ្យសមត្ថកិច្ចកម្ពុជាជាថ្នូរនឹងការចូលមកនេសាទ ។ ក្រៅពីជនជាតិវៀតណាម ប្រភពខ្លះថា ក៍មានជនជាតិថៃបានរំលោភចូលដែនទឹកខ្មែរនិងនេសាទនោះផងដែរ នៅតំបន់ព្រំដែនទឹកក្នុងខេត្តកោះកុង ។
នៅកម្ពុជាគេអាចឃើញ ជនជាតិវៀតណាមចូលមកនេសាទនិងប្រព្រឹត្តបទល្មើសនៅលើដែនទឹកខ្មែរបាន ប៉ុន្តែបើនៅឥណ្ឌូនេស៊ី ឬ ហ្វីលីពីន ជនជាតិវៀតណាមដែលរំលោភដែនទឹកចូលទៅនេសាទខុសច្បាប់នោះ តាមព័ត៌មានកន្លងមក ពួកគេច្រើនតែជួបភ័ព្វសំណាងអាក្រក់ ដោយត្រូវកងកម្លាំងឥណ្ឌូនេស៊ី ឬ ហ្វីលីពីន បាញ់កម្ទេចបណ្តាលឲ្យស្លាប់មនុស្សនិងចាប់ខ្លួនជារឿយៗផងដែរ ៕
