ប្រផ្នូលមិនល្អទេដឹង ខ្យល់កួចដំបូលព្រះឆាយាលក្ខណ៍ព្រះបាទ«នរោត្តម»

ដំបូល​ព្រះ​ស្តូប​អតីត​ព្រះមហាក្សត្រ​ខ្មែរ ព្រះករុណា ព្រះបាទ សម្តេចព្រះ​នរោត្តម ដែល​ជា​ព្រះ​សុវណ្ណកោដ្ឋ​នៃ​ព្រះករុណា ព្រះបាទ សម្តេច ព្រះ​បរមនាថ នរោត្តម​សីហ​មុនី ព្រះមហាក្សត្រ​ខ្មែរ​កំពុង​គ្រងរាជ្យ​បច្ចុប្បន្ន បាន​ត្រូវ​ខ្យល់កួច​បណ្តាល​បែកបាក់​ធ្លាក់​មក​ដី​  ។​

​មិន​អាច​រក​ការ​សុំ​អត្ថាធិប្បាយ​បាន​ទេពី​ខុទ្ទកាល័យ​ព្រះ​បរមរាជវាំង ជុំវិញ​ការ​បែកបាក់​ដំបូល​ព្រះ​ស្តូប​ព្រះ​នរោត្តម ដោយសារ​ខ្យល់​បោកបក់ ក្នុង​ព្រះ​បរមរាជវាំង​កាលពី​ល្ងាច​ថ្ងៃ​ព្រ​ហ​ស្បត៍​ម្សិលមិញ​នេះ ។​

​ពលរដ្ឋ​ខ្មែរ​ដែល​ប្រកាន់​ជំនឿ​តាំងពី​បរម​បុរាណ​មក ខ្លះ​បាន​ចាត់​ទុក​ថា ឧបទ្ទវហេតុ ឬ ហេតុការណ៍​នេះ ជា​ប្រផ្នូល​មិនសូវ​ល្អ​ប៉ុន្មាន​ទេ​សម្រាប់​ព្រះ​នគរ​ទាំងមូល ។​ យ៉ាងណា គ្រាន់តែជាជំនឿរបស់ខ្មែរមួយចំនួន​តែប៉ុណ្ណោះ ។

​ព្រះបាទ​នរោត្តម (១៨៣៤–១៩០៤) សោយរាជ្យ​ជា​ស្តេច​នៃ ព្រះរាជាណាចក្រ​កម្ពុជា ពី​ឆ្នាំ​១៨៥៩ ដល់​ឆ្នាំ ១៩០៤​។ ទ្រង់​ជា​ព្រះរាជបុត្រ​ច្បង​នៃ​សម្ដេចព្រះ​អង្គឌួង ហើយ​ជា​ព្រះ​រៀម​នៃ ព្រះ​អង្គ​ម្ចាស់​ស៊ី​វត្ថា និង ព្រះបាទ​ស៊ី​សុវត្ថិ ដែល​ឡើង​សោយរាជ្យ​បន្ត​ពី​ព្រះ​អង្គ​។ នរោត្តម ជា​ពាក្យ​មក​ពី​ភាសាបាលី សំ​ស្ត្រឹ​ត កើត​ចេញពី​ពាក្យ នរ ប្រែ​ថា មនុស្ស​/​បុរស និង ឧត្តម ប្រែ​ថា​កំពូល ខ្ពង់ខ្ពស់ មាន​ន័យ កំពូល​បុរស ឬ​កំពូល​មនុស្ស​។ ព្រះបាទ​នរោត្តម​ត្រូវ​បាន​គេ​ចាត់​ទុក​ថា​ជា​ស្តេច​ខ្មែរ​ទី​១​នៃ​សម័យ​ខ្មែរ​ទំនើប​ក្រោម​អាណានិគមនិយម​បារាំង​។ ទ្រង់​ត្រូវ​បាន​គេ​ស្គាល់​ច្បាស់​ដោយសារ​ការ​ការពារ​ប្រទេស​កម្ពុជា​កុំ​ឲ្យ​បាត់បង់​ទៅ​ក្នុង​ការ​ដណ្ដើម​គ្នា​រវាង​ប្រទេស​សៀម និង​យួន​។ នៅ​ឆ្នាំ​១៨៦៣ ដើម្បី​រារាំង​ប្រទេស​ជិតខាង​ដ៏​ខ្លាំង​ទាំង​ពីរ គឺ​យួន និង​សៀម កុំ​ឲ្យ​លេប​យក​ទឹកដី​កម្ពុជា​បាន ទ្រង់​បាន​អញ្ជើញ​បារាំង​ឲ្យ​មក​ធ្វើ​ជា​អាណាព្យាបាល​ប្រទេស​កម្ពុជា​ ៕