មេគុកព្រៃសដែលលោក ហ៊ុន សែន ធ្លាប់ព្រមានដក ឡើងអគ្គនាយកពន្ឋនាគារ

ទីបំផុត​ទៅ​អាប៉ោង​បាន​បើក​គម្រប​ហើយ គឺ​អគ្គនាយក​នៃ​អគ្គនាយកដ្ឋាន​ព​ន្ឋ​នាគារ​ក្រសួងមហាផ្ទៃ​ដែល​ត្រូវ​ចូល​ជំនួស​តំណែង​លោកនាយ​ឧត្តមសេនីយ៍ គតិបណ្ឌិត ចាន់ គី​ម​សេង ដែលត្រូវតែងតាំងជាអនុរដ្ឋលេខា​ធិការ​ក្រសួងមហាផ្ទៃ​គឺ លោក​ផ្កាយ​៣ ឆែម សា​វុ​ធ ប្រធាន​មណ្ឌល​អប់រំ​កែប្រែ​ទី​១(​ម​១) ឬ គុក​ព្រៃ​ស ។​ ចំណែកអ្នកដែលត្រូវជំនួសតំណែងលោក ឆែម សាវុធ នៅមិនទាន់ដឹងច្បាស់នៅឡើយទេ ។

​នេះ​បើ​យោង​តាម​ព្រះរាជក្រឹត្យ​លេខ ន​ស / រក​ត / ០៨២០ / ៨៤៤ ដែល​ឡាយ​ព្រះ​ហ​ស្ថ​លេខា​ដោយ​ព្រះករុណា ព្រះបាទ សម្តេចព្រះ​បរមនាថ នរោត្តម​សីហ​មុនី ព្រះមហាក្សត្រ​នៃ​ព្រះរាជាណាចក្រ​កម្ពុជា កាលពី​ថ្ងៃ​ទី​០៦ សីហា ២០២០ តាម​សំណើ​របស់​លោកនាយក​រដ្ឋមន្ត្រី ហ៊ុន សែន និង​ដែល​ត្រូវ​បាន​គេ​ចែក​ផ្សព្វផ្សាយ​នៅ​ថ្ងៃ​សុក្រ​នេះ ។​

​ប្រភព​ពី​មន្ត្រី​ព​ន្ឋ​នាគារ​បាន​បង្ហើប​ឲ្យ​ដឹង​ថា ចាប់តាំងពី​លោក​ផ្កាយ​៤ ចាន់ គី​ម​សេង ត្រូវ​បាន​ព្រះមហាក្សត្រ​ដាក់​ឲ្យ​ចូល​និវត្តន៍​ប្រមាណ​មួយ​ឆ្នាំ​នោះ​រួច​មក ព័ត៌មាន​ចចាមអារ៉ាម​ពី​អ្នក​ដែល​ត្រូវ​ចូល​ជំនួស​លោក​អគ្គនាយក​រូប​នេះ​គឺ​មាន​បេក្ខភាព​ច្រើន ក្នុង​នោះ​មាន​លោក​ផ្កាយ​៣ ទា បេ​ឡេ​ង បច្ចុប្បន្ន​ជា​អគ្គនាយករង​នៃ​អគ្គនាយកដ្ឋាន​ព​ន្ឋ​នាគារនិងជាអតីតអ្នកកាន់ត្រាំឲ្យលោកប្រមុខមហាផ្ទៃ ស ខេង លោក​ផ្កាយ​៣ ឈ​ន សា​ណាត បច្ចុប្បន្ន​ជា​អគ្គនាយករង​នៃ​អគ្គនាយកដ្ឋាន​ព​ន្ឋ​នាគារ និង អតីត​មេ​គុក​ព្រៃ​ស លោក ម៉ុង គឹ​ម​ហេង ដែល​បច្ចុប្បន្ន​ជា​រដ្ឋលេខាធិការ​ក្រសួង​ការងារ​និង​បណ្តុះបណ្តាល​វិជ្ជាជីវៈ ។​

​សូម​បញ្ជាក់​ថា មុន​កាន់​តំណែង​ជា​រដ្ឋលេខាធិការ លោក ម៉ុង គឹ​ម​ហេង ដែល​គេ​ស្គាល់​ថា​ជា​មិត្ត​ភ័ក្តិ​លោក ហ៊ុន ម៉ា​ណែ​ត កូនប្រុស​ច្បង​លោកនាយក​រដ្ឋមន្ត្រី ហ៊ុន សែន នោះ ក៍​ជា​អគ្គនាយករង​នៃ​អគ្គនាយកដ្ឋាន​ព​ន្ឋ​នាគារ​ផង​ដែរ ។​

​ប្រភព​បន្ត​ថា លោក ឆែម សា​វុ​ធ គឺជា​មេ​គុក​ជា​ច្រើន​ឆ្នាំ​មក​ហើយ ដោយ​លោក​ធ្លាប់​ជា​ប្រធាន​ព​ន្ឋ​នាគារ​ខេត្តសៀមរាប រហូត​ក្លាយជា​ជំនួយការ​ផ្ទាល់​លោក​ឧបនាយករដ្ឋមន្ត្រី ស ខេ​ង រដ្ឋមន្ត្រី​ក្រសួងមហាផ្ទៃ ឋានៈ​ស្មើនឹង​អនុរដ្ឋលេខាធិការ ។​

កាលពី​ថ្ងៃ​ទី​២៧ មីនា ២០១៨ លោក ឆែម សា​វុ​ធ ធ្លាប់​ត្រូវ​បាន​លោកនាយក​រដ្ឋមន្ត្រី ហ៊ុន សែន ស្តីបន្ទោស​និង​ព្រមាន​ដក​តំណែង​ពី​ប្រធាន​ព​ន្ឋ​នាគារ​ព្រៃ (​ម​១) ក្រោយ​បែកធ្លាយ​ឲ្យ​ជនជាប់ចោទ ឈ្មោះ មា​ជ សុ​វ​ណ្ណា​រ៉ា អតីត​ប្រធាន​នាយកដ្ឋាន​ព័ត៌មាន​គណបក្ស​សង្គ្រោះ​ជាតិ​និង​ជា​សកម្មជន​បក្ស​ប្រឆាំង​ដ៍​ល្បីឈ្មោះ​ប្រើ​ទូរ​សព្ទ​និយាយ​ចេញ​មក​ខាងក្រៅ ។​

ប្រភព​បញ្ជាក់​ថា ក្រៅ​ជា​មន្ត្រី​ដែល​មានទ្រព្យ​សម្បត្តិ​គួរសម លោក ឆែម សា​វុ​ធ ក៍​ជា​មន្ត្រី​មានបទពិសោធន៍​គ្រប់គ្រាន់​លើ​កិច្ច​ការងារ​ព​ន្ឋ​នាគារ ដែល​អាច​ដឹកនាំ​គ្រប់គ្រង​អគ្គនាយកដ្ឋាន​ព​ន្ឋ​នាគារ​បាន​ប្រកបដោយ​ការ​ទទួលខុសត្រូវ​និង​ប្រ​សិ​ទ្ឋ​ភាព​ខ្ពស់ ៕