កសិករខំខ្ចីលុយធនាគារទិញគោយន្តដឹកអុសលក់ អាជ្ញាធរចាប់ដុតខ្ទេច

គោ​យន្ត​ដឹកអុស​១​គ្រឿង ត្រូវ​បាន​អាជ្ញាធរ​ស្ទាក់​ចាប់​រឹបអូស​យក​អុស​និង​ដុត​កម្ទេច​គោ​យន្ត​ចោល ដោយ​ចោទ​ថា កសិករ​ដែល​ជា​ម្ចាស់​គោ​យន្ត​កាប់​ឈើ​យក​ដុត​ធ្វើ​អុស​លក់ ។​

​បើ​តាម​គណនី​ហ្វេ​ស​ប៊ុ​ក​ផេ​ក Pheng Vannak News បាន​ឲ្យ​ដឹង​ទៀត​ថា ហេតុការណ៍​នេះ បាន​កើតឡើង​នៅ​ក្នុងភូមិ​អូរ​ចាន់ ឃុំ​ស្វាយសរ ស្រុក​ក្រគរ ខេត្តពោធិ៍សាត់ កាលពី​ថ្ងៃ​ទី​០៥ សីហា ២០២០ ។​

​បើ​តាម​គណនី​ដែល​គេ​ស្គាល់​ថា ជា​របស់​លោក ផែង វណ្ណៈ អ្នកកាសែត​ហ្វេ​ស​ប៊ុ​ក​និង​ជា​អ្នក​ធ្វើ​អត្ថាធិប្បាយ​នៅ​លើ​បណ្តាញ​សង្គម​បាន​បញ្ជាក់​ទៀត​ថា គោ​យន្ត​ដែល​អាជ្ញាធរ​ស្ទាក់​ចាប់​និង​ដុត​កម្ទេច​ចោល​នេះ គឺ​ជន​រង​គ្រោះជា​កសិករ​បាន​ខ្ចី​លុយ​ធនាគារ​យក​មក​ទិញ​ដើម្បី​ដឹកអុស​លក់​ចិញ្ចឹមជីវិត ។​

​លោក ផែង វណ្ណៈ ក៍បាន​និយាយ​រិះគន់​បែបចម្អកផង​ដែរ​ថា​«​បើ​ប្រឹងប្រែង​ការពារ​ព្រៃ​ឈើ​ម្លឹ​ង​ៗ ម្ល៉េះ​ព្រៃឈើ​មិន​ហិនហោច​ដូច​សព្វថ្ងៃ​ទេ ។ ប៉ុន្តែ​អស់លោក​អង្គការ និង អាជ្ញាធរ អា​រក បាន​តែ​ក្ដាម​ខ្យង ចំណែក​តោ និង ខ្លា​មិន​ដែល​ហ៊ាន​ប៉ះ ។​»​។​

​សូម​បញ្ជាក់​ថា ការ​បង្ក្រាប​របស់​សមត្ថកិច្ច​ជំនាញ​ពាក់​ព័​ន្ឋ​ដូច​ករណី​ខាងលើ មាន​ច្រើន​មក​ហើយ​នា​ពេល​កន្លង ធ្វើ​មជ្ឈដ្ឋាន​នានា​រិះគន់​ជា​ហូរហែ​មក​ដែរ ប៉ុន្តែ​សមត្ថកិច្ច​នៅ​តែ​ឆក​ល្វែង​បង្កើត​ឲ្យ​មាន​បញ្ហា​នេះ​កើតឡើង ធ្វើ​ឲ្យ​ពាក្យ​ថា​«​ខ្លាស៊ីគោ ធ្វើ​មិនដឹង ឯ​ឆ្មារ​ស៊ី​ត្រីអាំង វ៉ៃ​ទាល់តែ​ងាប់​» នៅ​តែ​បាន​គេ​យក​មក​ប្រើ​មិនដឹង​ពេល​ណា​លុប​បំបាត់ ៕