រដ្ឋាភិបាលថាខ្លួនត្រៀមលុយជាង១ពាន់លានដុល្លារ ដើម្បីទប់ការកាត់EBA

មួយ​ថ្ងៃមុន​ពេល​សហភាព​អឺរ៉ុប​(EU) សម្រេច​កាត់ ឬ​មិន​កាត់​ផ្នែក​ខ្លះ​នៃ​ប្រ​ព័​ន្ឋ​អនុគ្រោះ​ព​ន្ឋ​ពី​កម្ពុជា រដ្ឋាភិបាល​ថា​ខ្លួន​បាន​ត្រៀម​ថវិកាជាតិ​ជាង​១០០០​លាន​ដុល្លារ ដើម្បី​ទប់ទល់​សេដ្ឋកិច្ច​របស់​ខ្លួន ប្រសិនបើ EU សម្រេច​កាត់​ផ្នែក​ខ្លះ​នៃ​ប្រ​ព័​ន្ឋ​អនុគ្រោះ​ព​ន្ឋ​នោះ ។​

​នេះ​បើ​យោង​តាម​អ្នកនាំពាក្យ​ក្រសួង​សេដ្ឋកិច្ច​និង​ហិរញ្ញវត្ថុ លោក​មាស សុខ​សេន​សាន ដែល​ថ្លែងប្រាប់ FN នៅ​ថ្ងៃ​ទី​១១ សីហា ២០២០ ។

អ្នកនាំពាក្យ​ក្រសួង​សេដ្ឋកិច្ច និង​ហិរញ្ញវត្ថុ បាន​បញ្ជាក់​យ៉ាង​ដូច្នេះ «​ពាក់ព័ន្ធ​នឹង EBA នេះ ក្រសួង​សេដ្ឋកិច្ច បាន​ត្រៀម​ថវិកា​តាំងពី​ដើមឆ្នាំ​២០១៩​មក​ម្ល៉េះ មុន​ពេល​មាន​កូ​វី​ដ​១៩​ទៅ​ទៀត យុទ្ធសាស្ត្រ​ទាំងអស់​ដែល​បាន​រៀបចំ​មុន​ពេល​កូ​វី​ដ​យើង​នៅ​ប្រើ ហើយ​បូក​ថែម​នឹង​កូ​វី​ដ​១៩​ទៀត […] សំខាន់​បំផុត​ក្នុង​ក្រប​ខណ្ឌ​ក្រសួង​សេដ្ឋកិច្ច និង​ហិរញ្ញវត្ថុ គឺ​យើង​ត្រៀម​ថវិកា​រាប់​លាន ដើម្បី​ទប់ទល់​នឹង EBA ប៉ុន្តែ​បើសិន​យើង​គិត​ទាំង EBA និង​កូ​វី​ដ​១៩ មាន​ថវិកា​១,១៦៤​លាន​ដុល្លារ​»​។​

​តាម​ការ​គ្រោង​នៅ​ថ្ងៃ​ទី​១២ សីហា​ស្អែក​នេះ គឺជា​ថ្ងៃ​កំណត់​ដែល​សហភាព​អឺរ៉ុប​នឹង​សម្រេច​ថា​តើ​ដក ឬ​មិន​ដក ប្រព័ន្ធ​អនុគ្រោះ​ពន្ធ​អ្វី​ៗ​គ្រប់យ៉ាង​លើកលែងតែ​អាវុធ (EBA) ពី​ប្រទេស​កម្ពុជា បន្ទាប់​ពី EU កាលពី​ថ្ងៃ​ទី​១២ កុម្ភៈ ២០២០ បាន​ចេញ​សេចក្តីសម្រេច​របស់​ខ្លួន កាត់​ផ្នែក​ខ្លះ​នៃ​ប្រព័ន្ធ​អនុគ្រោះ​ពន្ធ​ពី​កម្ពុជា​។​

លោក ផៃ ស៊ី​ផា​ន ប្រធាន​ក្រុម​អ្នកនាំពាក្យ​រាជរដ្ឋាភិបាល មិន​អាច​រក​ការ​សុំ​អត្ថាធិប្បាយ​បញ្ជាក់​បន្ថែម​បាន​ទេ​នៅ​យប់​ថ្ងៃ​អង្គារ​នេះ ។​

​យ៉ាងណា​ក៍ដោយ លោកនាយក​រដ្ឋមន្ត្រី ហ៊ុន សែន ធ្លាប់​បាន​ប្រកាស​ជា​សាធារណៈ​ជា​ច្រើន​ដង​មក​ហើយ​ថា​  កម្ពុជា​មិន​យក​អធិបតេយ្យ​ជាតិ ទៅ​ដោះ​ដូរ​នឹង​ការ​អនុគ្រោះ​ពន្ធ EBA របស់​អឺរ៉ុប​នោះ​ទេ ព្រោះ​យូរ និង​ឆាប់ EBA វា​គង់តែ​នឹង​បាត់​។​

ការ​សម្រេច​កាត់ EBA គឺ​សហភាព​អឺរ៉ុប ដោយសារ EU យល់​ថា កម្ពុជា​ធ្វើ​ឱ្យ​ធ្លាក់​នូវ​ការ​គោរព​សិទ្ធិ​មនុស្ស សិទ្ធិ​នយោបាយ និង​លទ្ធិប្រជាធិបតេយ្យ និង​ទាមទារ​ឱ្យ​រាជរដ្ឋាភិបាល​កម្ពុជា​ធ្វើ​ឲ្យ​ប្រសើរ​ឡើង​វិញ​នូវ​បញ្ហា​គោរព​សិ​ទ្ឋិ​មនុស្ស ដោះលែងអ្នកទោសនយោបាយ ពិសេស​ដោះ​លែង​លោក កឹ​ម សុខា អតីត​ប្រធាន​គណបក្ស​សង្គ្រោះ​ជាតិ និង អនុញ្ញាត​ឲ្យ​គណបក្ស​​សង្គ្រោះ​ជាតិ​ចូលរួម​បោះ​ឆ្នោត​ឡើង​វិញ ៕