ជនសង្ស័យម្នាក់មានតួនាទីជាអនុប្រធានាយកដ្ឋានក្រសួងមហាផ្ទៃ ត្រូវបានសមត្ថកិច្ចនាំខ្លួនសួរនាំ ក្រោយធ្វើសកម្មភាពដកកាំភ្លើងគំរាមបាញ់ស្ត្រីម្នាក់ ព្រោះតែសុំស្នេហ៍នាងមិនបាន ។
ហេតុការណ៍នេះ បានបង្កឱ្យមានការភ្ញាក់ផ្អើលកាលពីម៉ោងជាង១រំលងអធ្រាត្រ ឈានចូលថ្ងៃទី១២ សីហា២០២០ នៅហាងផឹកស៊ី យីហោ «វិមានព្រិល» ស្ថិតនៅតាមបណ្តោយផ្លូវ ១៦៣ សង្កាត់ទួលទំពូងទី១ ខណ្ឌចំការមន។
បើតាមសមត្ថកិច្ច ជនសង្ស័យឈ្មោះ ជិន សាមីឌី អាយុ៣២ឆ្នាំ ឋានន្តរស័ក្តិឧត្តមសេនីយ៍ត្រី (ផ្កាយ១)មានតួនាទីជាអនុប្រធាននាយកដ្ឋាន ទីលំនៅផ្ទះលេខ ១៥V ភូមិវាលស្បូវ សង្កាត់វាលស្បូវ ខណ្ឌច្បារអំពៅ។
នៅមុនពេលកើតហេតុ គេឃើញបុរសម្នាក់ ស្លៀកពាក់ស៊ីវិល បានជិះរថយន្តម៉ាក ឡិចស៊ីស ពណ៌ទឹកប្រាក់ ពាក់ផ្លាកលេខ នគរបាល 2.7119 បានចូលទៅហាងផឹកស៊ីខាងលើ ខណៈស្រវឹងស្រឿងៗ បុរសម្នាក់នោះបានសុំស្នេហ៍ពីម្ចាស់ហាង ក៏ប៉ុន្តែស្ត្រីម្ចាស់ហាងបានប្រតិកម្ម ដើម្បីការពារសិទ្ធិ និងកិត្តិយសរបស់ខ្លួន បង្កឱ្យបុរសនោះមានភាពអាម៉ាស់ និងខឹងសម្បាយ៉ាងខ្លាំង ដោយសារការចែចង់សុំស្នេហ៍មិនបាន ហើយក៏ស្រាប់តែផ្ទុះហិង្សាជាមួយម្ចាស់ហាង មួយប្រាវ រួចក៏បើករថយន្ត ចេញបាត់ទៅ ។
ប្រភពបន្តថា មួយសន្ទុះក្រោយមក ស្រាប់តែបើករថយន្តមកហាងផឹកស៊ី ” វិមានព្រិល ” វិញ បានដកកាំភ្លើងគំរាមបាញ់ ត្រូវបានម្ចាស់ហាង រាយការណ៍ទៅកងកម្លាំងនគរបាល និងអាវុធហត្ថចំការមន ឱ្យជួយធ្វើអន្តរាគមន៍។ កងកម្លាំងមានសមត្ថកិច្ច បានចុះទៅដល់កន្លែងភ្លាមៗ តែជនបង្កបានឡើងរថយន្ត បើកគេចចេញ ពីកន្លែងកើតហេតុ ហើយក៏ត្រូវបានសមត្ថកិច្ចដេញតាមពីក្រោយ រហូតដល់ផ្លូវជាតិលេខ១ ស្ថិតក្នុងសង្កាត់ច្បារអំពៅ ខណ្ឌច្បារអំពៅ ទើបឃាត់រថយន្ត និងបុរសម្នាក់ ដែលជាខ្មាន់កាំភ្លើងនោះបាន ហើយក៏បាននាំខ្លួនមកកាន់អធិការដ្ឋានខណ្ឌចំការមនវិញ។
មកទល់នឹងម៉ោង១២និង២០នាទីថ្ងៃត្រង់ថ្ងៃពុធដដែលនេះ មិនទាន់មានព័ត៌មានណាទម្លាយឲ្យដឹងពីដំណោះស្រាយ ឬ វិធានការច្បាប់បែបណានៅឡើយទេ ក្រោយពេលលោកផ្កាយ១ ចិត្តភ្លើង និង ស្ត្រីម្ចាស់ហាងដែលគេមិនបញ្ចេញអត្តសញ្ញាណ ត្រូវបានសមត្ថកិច្ច នាំមកសាកសួរពីមូលហេតុ និងចាត់ការតាមផ្លូវច្បាប់នោះរួចមក ៕