លោក ហ៊ុន សែន​ ថាកម្ពុជាទទួលបានដីជាង២ពាន់ហិកតាពីការដោះដូរដី

នៅ​ក្នុង​ពិធី​សម្ពោធ​ដាក់​ឲ្យ​ដំណើរការ​នូវ​សួន​ទឹក​ឯកជន​របស់​លោក​ឧកញ៉ា លី យ៉ុ​ង​ផាត់ កាលពី​ព្រឹក​ម្សិលមិញ លោកនាយក​រដ្ឋមន្ត្រី ហ៊ុន សែន បាន​ថ្លែង​ថា កម្ពុជា​ទទួល​បាន​ដី​ជាង ២០០០​ហិ​កតា ដែល​បាន​ពី​ការ​ដោះ​ដូរ​ជាមួយ​វៀតណាម ។​

​បើ​តាម​លោក ហ៊ុន សែន ដី​ជាង​២០០០​ហិ​កតា​នេះ នឹង​ទុក​ប្រគល់​ជូន​កងទ័ព​ការពារ​ព្រំដែន និង​នគរបាល​តាម​ព្រំដែន ក៏​ដូច​ជា​អតីត​យុទ្ធ​ជន ដែល​គ្មាន​ដី​នៅ​។​

​លោក​ប្រមុខ​រាជរដ្ឋាភិបាល​ក៍បាន​បញ្ជាក់​ទៀត​ថា ការ​រៀបចំ​ព្រំដែន​រវាង​កម្ពុជា និង​វៀតណាម បាន​ធ្វើ​តាម​ផែនទី​បោ​ន ១/១០០ ០០០ និង​ផែនទី UTM ១/៥០ ០០០​។ សម្រាប់​ផែនទី ១/២៥ ០០០ គឺ​ធ្វើ​ឡើង​ដើម្បី​ងាយស្រួល​ក្នុង​ការ​មើល​និយាម​ការ​លើ​ព្រំដែន​ជាក់ស្តែង ហើយ​ថ្ងៃ​ទី​២៧ ប្រគល់​ដល់​ខេត្ត​ជាប់​ព្រំដែន​វៀតណាម​។ សម្តេច​តេ​ជោ បាន​ថ្លែង​ថា ព្រំដែន​រវាង​កម្ពុជា និង​ប្រទេស​ជិតខាង មិន​ស្ថិត​នៅ​លើ​មាត់​របស់​ក្រុមប្រឆាំង​ទេ គឺ​ស្ថិត​នៅ​លើ​ច្បាប់​អន្តរជាតិ​។​

​កម្ពុជា និង​វៀតណាម មាន​ព្រំដែន​គោក​ជាមួយ​គ្នា​ប្រវែង​ប្រមាណ ១,២៧០​គីឡូម៉ែត្រ ដោយ​យោង​ទៅ​តាម​ការ​កំណត់​ក្នុង​ផែនទី​បោ​ន​ខ្នាត​១ លើ​១០០​ពាន់ ដែល​បន្សល់​ទុក​ពី​សម័យ​អាណានិគម និង​បាន​តម្កល់​ទុក​នៅ​អង្គការសហប្រជាជាតិ​។​

​ប្រទេស​ទាំង​ពីរ​ក៏​បាន​ចុះ​សន្ធិសញ្ញា​រួម​គ្នា​មួយ​កំណត់ព្រំដែន​ប្រទេស​ទាំង​ពីរ​កាលពី​១៩៨៥ និង​បាន​ធ្វើ​សន្ធិសញ្ញា​បំពេញបន្ថែម​មួយទៀត​កាលពី​ឆ្នាំ​២០០៥​កន្លង​ទៅ ដើម្បី​ឈាន​ទៅ​ការ​កំណត់​ព្រំសីមា និង​ការ​បោះបង្គោល​ព្រំដែន​រួម​គ្នា​។​

​ការ​បោះបង្គោល​ព្រំដែន​នៃ​ប្រទេស​ទាំង​ពីរ បាន​ចាប់ផ្តើម​ធ្វើ​ឡើង​តាំងពី​ឆ្នាំ​២០០៥​មក ដែល​រហូត​មក​ដល់​ពេល​បច្ចុប្បន្ន ការ​បោះបង្គោល​ព្រំដែន​នេះ​សម្រេច​បាន​ប្រមាណ​៨៤% ។​

​បញ្ហា​ព្រំដែន​រវាង​កម្ពុជា និង​វៀតណាម ជា​រឿង​ដ៏​ស្មុគស្មាញ​មួយ​សម្រាប់​ប្រទេស​ទាំង​ពីរ ដោយសារ​តែ​សំណល់​នៃ​វិបត្តិ​ប្រវត្តិសាស្ត្រ​។​

​ប្រជាពលរដ្ឋ​ខ្មែរ​មួយ​ចំនួន​នៅ​តែ​ចង​ចាំ ឈឺចាប់ និង​ចោទប្រកាន់​វៀតណាម​លួច​យក​ទឹកដី​របស់​ខ្លួន​បង្កើត​ទៅ​ជា​វិវាទកម្ម​ផ្លូវចិត្ត​រវាង​ប្រជាជាតិ​ទាំង​ពីរ​។ ក្នុង​នោះ​អ្នកនយោបាយ​នៅ​កម្ពុជា ក៏​តែងតែ​យក​បញ្ហា​នេះ​ធ្វើ​ជា​ឈ្នាន់​ដើម្បី​ស្វែងរក​ប្រជាប្រិយភាព​នយោបាយ​របស់​ពួក​គេ​រៀង​ៗ​ខ្លួន​ផង​ដែរ​៕